Jehôva a nga ve befam ye binenga si : é ne étobgha daa. Nge a nga vele ngal ba n’nôm ôsua, Adam ba Ève, déé mbe naa ba yiane fuiñ édzôô​—abong te a tare-yang man vele b’angel naa ba ning édzôô (Job 38:4, 7). A nga tuè é môr ôsua e mbemba Paradis ba luè naa afup y’Éden (Atargha 2:15-17). A ne a nga ve nye, ye é mvong bôr dzèñ é nga yiane biale, ngakh naa ba ye ning mbèmbèè a si va.​—A lang Bya 37:29 ; 115:16.

Asumgha, afup y’Éden étam éde é mbe Paradis. Adam ba Ève be nga yiane dzale si y’é mvong bôr deba. Melu a si-melu ayôp, be nga yiane belan si se ngura, ye bo naa éé venghan Paradis (Atargha 1:28). Si daa ye ki dzang môs ézing. Da ye tobe mbèmbèè étobgha moan môr a binam.​—A lang Bya 104:5.

Deghe éngengeng Amu dzé Nzame a nga vele si ?

Adam ba Ève be nga bo Jehôva melo, éde é nga ve naa a tsiran be afup. K’ô taa a ne Paradis a nga dzimele, ve moan môr a binam ézing éé bele ki é ngul é ne ve naa a bera nye tuè. Ane Bible aa dzô de : « Si ése ngura é ne é mô mbo abé été. »​—Job 9:24.​—A lang Atargha 3:23, 24.

Ye naa Jehôva a nga voat dzale ôsiman ôsua wèñ, é dzam a nga tare siman, akal moan môt ? Mômô ! A bele ngul ése. Éé se ki vus (Ésaïe 45:18). A ye bo naa moan môr a bera ning aval a nga kômô atargha.​—A lang Bya 37:11, 34.

Paradis a ye bera tobe a si va abong melu m’édjiè Yésu, Ndjiè Nzame a nga tele. A tele b’angel ôsu, a ye mane dzaa é bôr be tele Nzame é ngam ayat, aluman ba luè naa  Armaguédon. Akel te, éde a ye fure Satan a mbokh tang mimbu 1 000. É bôr ba wume Nzame ba ye ning aluman té, amu Yésu a ye be lere zen, ye kame be. Ba ye ning mbèmbèè e Paradis a si va.​—A lang Melere 20:1-3 ; 21:3, 4.

Nzame a ye vaa abé é ne é si nyi ôden ? Yésu a nga ve é « ndem » da lere naa, amanegha é ntoo bebéñ. Bibubua bi mam bi ne si se ngura abong di, ma dure bia awu ô nyôl, dzam te da lere naa bi ntoo “amanegha émo di.”​—A lang Matthieu 24:3, 7-14, 21, 22.

Nté sese a ye djiè si tang 1000 mimbu a too édzôô, Yésu a ye man vaa minzukh mise (Ésaïe 9:6, 7 ; 11:9). A ye ki bo ve ndjiè étam, a ye fe bo Bura Minisee, éto te éde da ye ve naa a dzame minsem é bôr ba nyeghe Nzame. Éde, Nzame a ye nye ve ngul y’a man vaa akoan, ayôm, y’awu.​—A lang Ésaïe 25:8; 33:24.

É Bôr be ne ngang asu Nzame é be ba ye ning e Paradis (1 Jean 2:17). Yésu a nga lôm beyeghe bèñ naa, be ke ba dzeng é bôr be ne asili nyôl, ye yeghle be aval be ne yene mbeng asu Nzame. Abong di, Jehôva aa kôan bizuk bibôt, naa ba ye ning Paradis a si va melu ma zu (Sophonie 2:3). Menda bikôan bengaa, bôr ba yeghe ane be ne tobe mbemba beyôm ye b’ésaa, mbemba beyaa ye benyia. É ne boan ye bebyèñ ba wume Nzame nsama mbokh wéñ, ye yeghe fe ane be ne buan mbemba mefuèñ mete été.​—A lang Michée 4:1-4.