February 2, 1973 mu no, wɔhyehyɛɛ efir fofor wɔ Wallkill, New York, U.S.A., a wɔdze betsintsim Ɔweɔn-Aban nye Awake! magazine ahorow no.

Jehovah Adasefo dzii kan tɔɔ dɛm asaase yi wɔ afe 1963 mu dɛ wɔdze bɛyɛ ekuadwuma dze ama hɔn edwumayɛfo a wɔwɔ hɔn edwumayɛbea tsir wɔ Brooklyn, New York no edziban. Naaso seseiara dze, asaase yi ma hɛn edziban fofor so, sunsum afamu edziban, kyerɛ dɛ Christianfo nwoma ahorow.​—Matthew 24:45-​47.

Philip Wilcox a dɛm aber no nna ɔhwɛ nwoma tsintsimbea no do no kãa dza osii wɔ da a odzi kan a nna wɔrosɔ efir no ahwɛ ho asɛm dɛ: “Yɛdze bɛyɛ bosoom kor hyehyɛɛ mfir a hɔn ho yɛ har yie a wɔdze tsintsim nwoma yi. Afei, nna ber asõ dɛ yɛsɔ mfir no hwɛ. Annkyɛr koraa na yetsintsiim magazine nkorkor apem. Yɛdze magazine ahorow yi kɔr Brooklyn nwoma tsintsimbea hɔ ma wɔdze monaa asafo ahorow no. Nna yɛawe ataa do dɛ yɛremma magazine kor mpo nnsɛɛ.”

Jehovah Adasefo sii nwoma tsintsimbea yi mbrɛ ɔbɛyɛ a ɔbɔboa hɔn nwoma tsintsimbea a ɔwɔ Brooklyn a nna no mu retserɛw no. Odur afe 1970 ahyɛse no, nna Bible ho nwoma dodow a wohia no dɔɔ sõ kyɛn dza wobotum etsintsim wɔ da no mu. Dɛm ntsi, wɔyɛɛ edwuma adzekyee nye adzesaa wɔ Brooklyn nwoma tsintsimbea hɔ mbrɛ ɔbɛyɛ a wobotum edzi dɛm ehiadze yi ho dwuma.

Wosii dan a odzi kan wɔ Wallkill wiei no, wɔdze adankora no bi yɛɛ nwoma tsintsimbea a mfir anan na ɔwɔ mu, bea a wɔhwɛ nwoma a wɔdze mona do, nye Ahendzi Asa. Naaso, ansaana nwoma tsintsim edwuma a nna ɔrokɔ do wɔ ha dur ne mpɛmpɛndo no, wɔhyɛɛ ase sii dan a otsĩa ebien kãa dza odzi kan no ho. Bible ho nwoma dodow a nna wohia no kɔr enyim araa ma wɔhyehyɛɛ nwoma tsintsim efir ahorow esia wɔ dan a otsĩa ebien yi mu. Wɔhyehyɛɛ mfir yi mpo ansaana worisi dan no ewie.

Mber rugu mu no, akwan a wɔfa do tsintsim mbuukuu nye Bible ho nwoma dodow a wohia no nyaa nkɔenyim. Mbrɛ ɔbɛyɛ a yebedzi dɛm ehiadze ahorow yi ho dwuma no, nna mpɛn pii no ɔwɔ dɛ yɛyɛ nsesã ahorow na yɛtserɛw nwoma tsintsimbea a ɔwɔ Wallkill hɔ no mu. Ofitsi afe 1980 dze besi afe 1990 mu no, wɔyeyɛɛ mfir a hɔn ho yɛ har a wɔdze tsintsim nwoma, na iyinom bɛhyɛɛ dza nna ɔwɔ hɔ no ananmu.

Wɔtoow nwoma tsintsimbea a ɔwɔ Brooklyn no mu wɔ mfe 2004 mu, na wɔhyɛɛ ase tsintsiim mbuukuu ahorow wɔ Wallkill. Mfe 2010 mu no, woyii magazine tsintsim edwuma no kɔr Jehovah Adasefo edwumayɛbea a ɔwɔ Canada no. Mfir fofor a ɔwɔ hɔ no tum tsintsim magazine 200,000 dɔnhwer kor mu.

Ndɛ a yɛrekasa yi, nwoma tsintsimbea a ɔwɔ Wallkill no wɔ abaɛfor mfir a odzi mu papaapa yie, na mbanyin na mbaa bɛyɛ 280 na woetu hɔnho akyɛ reyɛ edwuma wɔ hɔ. Mbuukuu nye Bible a wotsintsimii wɔ hɔ wɔ mfe 2012 mu no dodow bor ɔpepem 17. Sɛ yɛdze nwoma tsintsimbea a ɔwɔ Wallkill, Canada, nye Mexico a ne nyinara wɔ North America no to nkyɛn a, Jehovah Adasefo san so wɔ nwoma tsintsimbea afofor 12 wɔ Africa, Asia, Australia, Europe, nye South America. Iyinom nyina boa ma nyimpa ɔpepem pii nya hɔn sunsum afamu ehiadze.​—Matthew 5:3.