Akɔhwisɛm: Siantsir a Jehovah Adasefo nndzi Borɔnya nye dɛ wɔnngye Jesus nndzi.

 Nokwasɛm: Yɛyɛ Christianfo. Yɛgye dzi dɛ yɛnam Jesus Christ nkotoo do na yebenya nkwagye.​—Ndwuma 4:12.

 Akɔhwisɛm: Hom kã kyerɛ ebusuamufo dɛ mma wonndzi Borɔnya dze tsetsew mbusua ntamu.

 Nokwasɛm: Yɛdwen mbusua ho paa, na yɛnam Bible no do boa ma mbusua ahorow gyina na wɔyɛ dzen.

 Akɔhwisɛm: Hom nnya “Borɔnya sunsum” a ɔnye ayamuyie, asomdwee wɔ asaase do, nye tsinkwa a wɔdze ma nyimpa no mu kyɛfã.

 Nokwasɛm: Yɛbɔ mbɔdzen dɛ yɛbɛda ayamuyie nye asomdwee edzi dabiara da. (Mbɛbusɛm 11:25; Romefo 12:18) Dɛ nhwɛdo no, ɔkwan a yɛfa do yɛ hɛn nhyiamu ahorow nye asɛnka edwuma no nye Jesus ahyɛdze yi hyia: “hom enya no kwa: hom mfa mma kwa.” (Matthew 10:8) Bio so yɛdan adwen kɔ Nyankopɔn n’Ahenman no do dɛ, ɔno nkotsẽe nye asomdwee a yebenya wɔ asaase yi do ho nokwar enyidado.​—Matthew 10:7.

•   Jesus hyɛɛ hɛn dɛ yɛnkaa no wu no, na nnyɛ n’awo no.​—Luke 22:19, 20.

•   Jesus n’asomafo nye n’esuafo a wodzi kan no enndzi Borɔnya. New Catholic Encyclopedia no kã dɛ “wɔdze Jesus n’awoda ho afahyɛ no sii hɔ bɛyɛ afe 243 wɔ Christ no wu ekyir.” Iyi kyerɛ dɛ asomafo no nyinara wui no ekyir no, bɔbor mfe ɔha twaa mu ana wɔdze Borɔnya no risi hɔ.

•   Adanse biara nnyi hɔ a ɔkyerɛ dɛ wɔwoo Jesus December 25; wɔnnkyerɛɛw n’awoda no wɔ Bible no mu.

•   Yɛgye dzi dɛ Nyankopɔn nngye Borɔnya nnto mu osiandɛ n’ase fi abosonsom amandze ahorow mu.​—2 Corinthfo 6:17.

 Nyimpa pii nyim dɛ Borɔnya fi abosonsom mu na Bible no mmfoa do dze, naaso ne nyinara ekyir no wodzi Borɔnya. Dɛm nkorɔfo yi botum ebisa dɛ: Ebɛnadze ntsi na ɔsɛ dɛ Christianfo dze gyinaesi a ɔtse dɛm haw hɔnho? Ebɛnadze ntsi na ɔsɛ dɛ wɔma iyi so yɛ asɛm?

 Bible no hyɛ hɛn nkuran dɛ hɛnankasa yensusũ nsɛm ho, na hɛn som no aayɛ “som a ɔwɔ siantsir.” (Romefo 12:1, 2) Ɔkyerɛkyerɛ hɛn dɛ yɛmma nokwar no nsom hɛn bo. (John 4:23, 24) Ntsi ɔwɔ mu dɛ yɛdwen mbrɛ afofor bu hɛn no ho dze, naaso yɛdze Bible ngyinadosɛm yɛ edwuma, sɛ iyi ntsi nkorɔfo renngye hɛn nnto mu mpo a.

 Ɔwɔ mu dɛ hɛn dze yesi gyinae dɛ yennkedzi Borɔnya dze, naaso yɛkyerɛ obu ma hokwan a obiara wɔ dɛ nankasa si asɛm yi ho gyinae no. Sɛ afofor ridzi Borɔnya a, yenntwitwa hɔn akwan mu.