Matthew Asɛmpa 9:1-38
9 Ntsi ɔfoow hɛmba no, na ɔfaa po no do baa nankasa no kurow mu.
2 Na hwɛ, nna wɔdze ɔbarimba bi a oebubu da mpa do reba no hɔ. Aber a Jesus hun hɔn gyedzi no, ɔkaa kyerɛɛ ɔyarfo no dɛ: “Ɔba, ka w’akoma to wo yamu! Wɔdze wo bɔn akyɛ wo.”
3 Na akyerɛwfo no mu binom kekaa kyerɛɛ hɔnho dɛ: “Ɔbarimba yi reka ebususɛm.”
4 Naaso nna Jesus nyim adwen a wɔrodwen, ntsi obisaa hɔn dɛ: “Ebɛnadze ntsi na hom rodwen ndzɛmba bɔn ho wɔ hom akoma mu?
5 Hom hwɛ a, dza ɔwɔ hen na ɔyɛ mberɛw, dɛ ebɛka dɛ, ‘Wɔdze wo bɔn akyɛ wo,’ anaadɛ ebɛka dɛ, ‘Soɛr na nantsew’?
6 Naaso, mbrɛ ɔbɛyɛ a hom bohu dɛ nyimpa Ba no wɔ tum dɛ ɔdze bɔn kyɛ wɔ asaase do ntsi—” afei ɔkaa kyerɛɛ ɔbarimba a oebubu no dɛ: “Soɛr fa wo kɛtɛ na kɔ wo fie.”
7 Ntsi ɔsoɛree kɔr ne fie.
8 Aber a nyimpadɔm no hun dza woesi no, wɔbɔɔ hu, na wɔhyɛɛ Nyankopɔn enyimnyam dɛ ɔdze tum a ɔtse dɛm ama nyimpa.
9 Afei, aber a Jesus rifi hɔ akɔ no, ohun ɔbarimba bi a wɔfrɛ no Matthew dɛ ɔtsena beebi a wɔgyegye tow no, na ɔkaa kyerɛɛ no dɛ: “Bedzi m’ekyir.” Hɔ no ara na ɔsoɛree dzii n’ekyir.
10 Ekyir yi aber a nna oridzidzi* wɔ Matthew ne fie no, hwɛ, atowgyefo nye ndzebɔnyɛfo pii bae, na wɔnye Jesus na n’esuafo no too nsa dzidzii.*
11 Na aber a Phariseefo no hunii no, wobisaa n’esuafo no dɛ: “Ebɛnadze ntsi na hom kyerɛkyerɛnyi no nye atowgyefo na ndzebɔnyɛfo dzidzi?”
12 Aber a ɔtsee dza wɔreka no, ɔkaa dɛ: “Hɔn a wɔtse apɔw nnhia ɔyarsafo, mbom hɔn a wɔyar no na wohia.
13 Afei hom nkɔ, na hom nkosua dza iyi kyerɛ: ‘Mepɛ ehumbɔbɔr, na nnyɛ afɔrbɔ.’ Osiandɛ mammbɛfrɛ atseneneefo, na mbom mebɛfrɛɛ ndzebɔnyɛfo.”
14 Afei John n’esuafo no baa ne nkyɛn na wobisaa no dɛ: “Ebɛnadze ntsi na yɛnye Phariseefo no yɛ akɔnkyen,* naaso w’esuafo no dze wɔnnyɛ akɔnkyen?”*
15 Na Jesus kaa kyerɛɛ hɔn dɛ: “Aber a ayeforkun no wɔ n’anyɛnkofo nkyɛn no, wobotum edzi awerɛhow anaa? Naaso nda bi bɛba a, wɔbɛfa ayeforkun no efi hɔn nkyɛn, na dɛm aber no na wɔbɛyɛ akɔnkyen.
16 Obiara nnyi hɔ a ɔdze tam fofor taa atar dadaw mu. Sɛ ɔba no dɛm a, tam fofor no bɛtsew efi atar no mu na ekyir yi mpo dze, beebi a ɔtsewee no bɛtsew kɛse.
17 Dɛmara so na nkorɔfo mmfa nsa fofor nngu nsa kotoku dadaw mu. Osiandɛ sɛ wɔyɛ no dɛm a, nsa kotoku no bɛpaa ma nsa no egu famu na nsa kotoku no asɛɛ. Mbom, nkorɔfo dze nsa fofor gu nsa kotoku fofor mu, ɔba no dɛm a no mu biara rennsɛɛ.”
18 N’ano gu do a ɔreka dɛm nsɛm yi no, hwɛ, ɔpanyin bi baa ne nkyɛn bɔkotoow no, na ɔkaa dɛ: “Sisei dze ɔbɛyɛ dɛ me babaa no ewu. Naaso bra na fa wo nsa bogu no do, na ɔbɛsan aba nkwa mu bio.”
19 Na Jesus soɛree, na ɔnye n’esuafo no dzii n’ekyir.
20 Na hwɛ, ɔbaa bi a bɔgya etu no mfe 12 faa Jesus n’ekyir dze ne nsa kaa n’atar ngugudo no n’ano ndwow.
21 Asɛm a nna ɔreka kyerɛ noho ara nye dɛ: “Sɛ medze me nsa ka n’atar ngugudo no kɛkɛ mpo a, moho bɔtɔ me.”
22 Jesus daan noho, na aber a ohun no no ɔkaa kyerɛɛ no dɛ: “Babaa, ka w’akoma to wo yamu! Wo gyedzi ama woho atɔ wo.” Na ofitsi dɛm aber no rokɔ no, ɔbaa no noho tɔɔ no.
23 Afei, aber a Jesus dur ɔpanyin no ne fie no, ohun hɔn a wɔrehɛn atɛntɛbɛn nye nyimpadɔm a wɔreyɛ gyigyeegye.
24 Ntsi ɔkaa kyerɛɛ hɔn dɛ: “Hom mfi ha, na basiaba no nnwui mbom ɔada.” Ɔkaa dɛm no, wɔsereew no twee.
25 Na aber a nyimpadɔm no puei no, ntsɛmara na ɔkɔr dan no mu kosuoo basiaba no ne nsa mu, na basiaba no soɛree.
26 Nokwasɛm nye dɛ, dza osii no ho asɛm tahyee wɔ mantɔw no nyinara mu.
27 Aber a Jesus fi hɔ rokɔ no, enyifurafo beenu bi dzii n’ekyir na wɔtseatseaa mu dɛ: “David ne Ba, hu hɛn mbɔbɔr.”
28 Aber a ɔhɛɛn fie no mu no, enyifurafo no baa ne nkyɛn, na Jesus bisaa hɔn dɛ: “Hom gye dzi dɛ mubotum ayɛ iyi a?” Nna woyii no ano dɛ: “Nyew Ewuradze.”
29 Ntsi ɔdze ne nsa kaa hɔn enyiwa, na ɔkaa dɛ: “Dɛ mbrɛ hom gyedzi tse no ɔnyɛ dɛmara mma hom.”
30 Na wohun adze. Afei Jesus bɔɔ hɔn ano dɛ: “Hom nhwɛ na obiara anntse dza woesi yi ho asɛm.”
31 Naaso aber a wofii hɔ no, wɔbɔɔ asɛm no ho dawur wɔ mantɔw no nyinara mu.
32 Aber a worifi hɔ no, hwɛ, wɔdze ɔbarimba bi a ɔyɛ mmum na ɔwɔ sunsum fi brɛɛ no.
33 Na aber a otuu sunsum fi no, ɔbarimba a ɔyɛ mmum no kasae. Na ɔyɛɛ nyimpadɔm no nwanwa ma wɔkaa dɛ: “Yennhun biribi a ɔtse dɛm da wɔ Israel.”
34 Naaso Phariseefo no dze wɔkaa dɛ: “Ɔnam esunsum fi hɔn panyin no tum do na otu esunsum fi.”
35 Na Jesus kekyinkyiin nkurow nye nkuraase nyinara, na ɔkyerɛkyerɛe wɔ hɔn nhyiamudan mu na ɔkaa Ahendzi no ho asɛmpa no. Na hɔn a wɔwɔ nyarba ahorow nye hɔn a wɔnntse apɔw nyina no, ɔsaa hɔn yarba.
36 Aber a ohun nyimpadɔm no, hɔnho yɛɛ no mbɔbɔr, osiandɛ nna wɔtse dɛ nguan a woepirapira hɔn na woegya hɔn egu hɔ a wonnyi hwɛfo biara.
37 Ntsi ɔkaa kyerɛɛ n’esuafo no dɛ: “Nokwasɛm nye dɛ ndɔbaa a ɔsɛ dɛ wotwa no dɔɔ so, naaso edwumayɛfo no suar.
38 Dɛm ntsi hom nserɛ haban no Wura ma ɔnsoma edwumayɛfo mbra ma wombotwa no ndɔbaa no bi.”
Ase Hɔ Nsɛm
^ Anaa “ɔtsena pon ho ridzidzi.”
^ Anaa “tsenaa pon ho dzidzii.”
^ Anaa “dzi mbuada.”
^ Anaa “wonndzi mbuada.”
