1. Sɛ obi pɛ dɛ ɔkɔ Persiahen n’enyim a, nna ebɛnadze na ɔwɔ dɛ dɛm nyimpa no yɛ?

FA NO dɛ bɛyɛ mfrenhyia 2,500 a abɛsen kɔ no, nna etse Persiaman mu. Nna ewɔ asɛnhia bi a epɛ dɛ edze to ɔhen a ɔwɔ hɔ no enyim, ntsi ituu kwan kɔr Shushan, beebi a ɔhen no tse no. Naaso, sɛ ɔhen no nankasa amma wo kwan a, irunntum nnkɔ n’enyim. Sɛ ekɔ n’enyim aber a ɔnnkãa dɛ kɔ a, wobotum eku wo!​—Esther 4:11.

2. Jehovah pɛ dɛ yɛtse nka dɛn ber a yɛpɛ dɛ yɛkɔ n’enyim no?

² Yɛda Jehovah ase papaapa, osiandɛ ɔnnyɛ n’adze tse dɛ dɛm Persiahen no! Jehovah wɔ tum kɛse kyɛn ɔhen biara, naaso ɔpɛ dɛ yɛkɔ n’enyim aber biara. Ɔpɛ dɛ yɛnye no kasa a yennsuro. Dɛ nhwɛdo no, Jehovah wɔ abɔdzin akɛse tse dɛ Bɔadze Kɛse, adze nyina do Tumfo, nye Ewuradze Tumfo, naaso ne nyinara mu no, sɛ yɛrokɔ n’enyim a, ɔpɛ dɛ yɛdze kasafua “Egya” a nyimpa piinara nyim dzi dwuma. (Matt. 6:9) Jehovah pɛ dɛ yɛtse nka dɛ yɛbɛn no kɛse, na iyi ma hɛn enyi gye papaapa!

3. Ebɛnadze ntsi na yebotum afrɛ Jehovah dɛ “Egya,” na ebɛnadze na yebosusu ho wɔ adzesua yi mu?

³ Sɛ yɛfrɛ Jehovah dɛ “Egya” a, ɔyɛ no kwan do, osiandɛ ɔno nye hɛn nkwa Farbaa. (Ndw. 36:9) Yɛwɔ asodzi dɛ yɛyɛ setsie ma no, osiandɛ ɔno nye hɛn Egya. Sɛ yɛyɛ dza ɔhwehwɛ fi hɛn hɔ a, yebenya nhyira a ɔkyɛn do. (Heb. 12:9) Nhyira no bi nye onnyiewiei nkwa a yebenya wɔ sor anaa asaase do. Afei so, nhyira no, yenya bi ndɛ. Adzesua yi mu no, yɛbɔhwɛ mbrɛ ndɛ Jehovah  si da noho edzi dɛ Egya a ɔwɔ ɔdɔ. Nkyii so, yɛbɔhwɛ siantsir a yebotum agye edzi dɛ, daakye Jehovah nnkeyi hɛn tokyen da. Naaso, odzi kan no, hom mma yɛnhwɛ siantsir a yebotum enya ahotodo dɛ hɛn sor Egya no dɔ hɛn papaapa, na ɔdwen hɛnho so.

4. Ebɛnadze ntsi na ɔyɛ dzen ma nyimpa binom dɛ wɔbɛgye ato mu dɛ Jehovah yɛ hɔn Egya?

⁴ Ana ɔyɛ dzen ma wo dɛ ebɛgye ato mu dɛ Nyankopɔn yɛ w’Egya? Bi a nyimpa binom bɛtse nka dɛ, sɛ wɔdze hɔnho toto Jehovah ho a, wonndu beebiara. Dɛm ntsi, wɔnngye nndzi dɛ adze nyina do Tumfo Nyankopɔn dwen hɔnho dɛ ankorankor. Naaso, hɛn Egya a ɔwɔ ɔdɔ no mmpɛ dɛ yebenya adwen a ɔtse dɛm. Ɔno na ɔmaa hɛn nkwa, na ɔpɛ dɛ yɛnye no nya ebusuabɔ. Ber a ɔsomafo Paul twee adwen sii dɛm nokwasɛm yi do no, ɔno ekyir no, ɔkyerɛɛ mu kyerɛɛ hɔn a nna woritsie no wɔ Athens no dɛ Jehovah nye “hɛn mu biara ntamu kwan nnwar.” (Andw. 17:24-29) Dɛ mbrɛ abofra nye ne maame anaa ne papa a ɔwɔ ɔdɔ na ɔdwen no ho kasa no, dɛmara na Nyankopɔn pɛ dɛ hɛn mu biara nye no kasa.

5. Ebɛnadze na yesũa fi hɛn akyerɛbaa kor n’asɛm no mu?

⁵ Nyimpa binom wɔ hɔ a, hɔn egyanom annda ɔdɔ na ayamuyie edzi annkyerɛ hɔn. Sɛ hɔn egyanom daa ɔdɔ na ayamuyie edzi kyerɛɛ hɔn mpo a, nna ɔyɛ ketseaba bi. Dɛm ntsi, obotum ayɛ dzen ama hɔn dɛ wɔbɛtse nka dɛ Jehovah yɛ hɔn Egya. Hom mma yensusu asɛm a hɛn akyerɛbaa kor kãe ho nhwɛ. Ɔkãa dɛ: “Nna m’egya ne tsirmu yɛ dzen, ntsi ber a wɔhyɛɛ ase nye me sũaa Bible no, nna ɔyɛ dzen ma me dɛ mobɔtwe abɛn Egya bi a ɔwɔ sor. Naaso, ber a mubohun Jehovah no, m’adwen sesaa koraa.” Aso dɛm na etse nka? Sɛ dɛm a, nya awerɛhyɛmu dɛ wo so botum ebohu Jehovah dɛ Egya a ɔkyɛn egya biara.

6. Dɛ mbrɛ Matthew 11:27 kyerɛ no, ebɛn ɔkwan kor na Jehovah afa do aboa hɛn ma yeehu dɛ ɔyɛ Egya a ɔwɔ ɔdɔ?

⁶ Jehovah ama wɔayɛ nsɛm a Jesus kãe nye dza ɔyɛe ho kyerɛwtohɔ wɔ Bible mu. Iyi yɛ kwan kor a Jehovah afa do aboa ma yeehu dɛ ɔyɛ hɛn Egya a ɔwɔ ɔdɔ. (Kenkan Matthew 11:27.) Jesus daa n’Egya no suban edzi yie, ntsi nna obotum akã dɛ: “Nyia oehu me no, oehu Egya no” so. (John 14:9) Nna Jesus taa kã dwuma a Jehovah dzi dɛ Egya no ho asɛm. Nsɛmpa anan no nkotsee mu no, Jesus frɛɛ Jehovah “Egya” bɛyɛ mpɛn 165. Ebɛnadze ntsi na Jesus kãa Jehovah ho nsɛm pii dɛm? Siantsir kor nye dɛ, nna ɔpɛ dɛ ɔma nkorɔfo gye to mu dɛ Jehovah yɛ Egya a ɔwɔ ɔdɔ.​—John 17:25, 26.

7. Ebɛnadze na yesũa fa Jehovah ho wɔ mbrɛ osii nye ne Ba no dzii no mu?

⁷ Hom mma yɛnhwɛ dza yesũa fa Jehovah ho wɔ mbrɛ osii nye ne Ba Jesus dzii no mu. Nna Jehovah tsie Jesus ne mpaabɔ daa. Naaso, oenntsie Jesus ne mpaabɔ kɛkɛ, mbom ɔmaa no ho mbuae so. (John 11:41, 42) Ɔmmfa ho nsɔhwɛ ahorow a Jesus hyiae no, nna dabaa ɔtse nka dɛ n’Egya dɔ no na ɔtaa n’ekyir so.​—Luke 22:42, 43.

8. Ebɛn akwan do na Jehovah dze Jesus n’ehiadze maa no?

⁸ Jesus gyee too mu dɛ no nkwa fi n’Egya hɔ, na n’Egya na ɔkora no nkwa do. Yehu dɛm nokwasɛm yi ber a Jesus kãa dɛ: ‘Menam Egya no do metse ase.’ (John 6:57) Jesus dze no werɛ nyinara hyɛɛ n’Egya mu, na Jehovah dze ndzɛmba a Jesus hia ama ɔaakɔ do atsena ase no maa no. Dza ɔkyɛn ne nyinara no, Jehovah boaa Jesus ma odzii nokwar kesii ase.​—Matt. 4:4.

9. Ebɛn kwan do na Jehovah kyerɛɛ dɛ ɔyɛ Egya a ɔdɔ Jesus papaapa?

⁹ Osiandɛ Jehovah yɛ Egya a ɔwɔ ɔdɔ ntsi, ɔmaa Jesus hun dɛ ɔtaa n’ekyir. (Matt. 26:53; John 8:16) Ɔwɔ mu dɛ Jehovah ammbɔ Jesus no ho ban emmfi ɔhaw nyinara ho dze, naaso  ɔboaa no ma ogyinaa nsɔhwɛ ahorow ano. Nna Jesus nyim dɛ ɔhaw biara a bi a obehyia no, ɔbɛyɛ ber tsiabaa mu adzeyɛ. (Heb. 12:2) Jehovah tsiee Jesus ne mpaabɔ, ɔdze n’ehiadze maa no, ɔtsetsee no, na ɔboaa no. Ɔyɛɛ dɛm dze kyerɛɛ dɛ ɔdɔ Jesus. (John 5:20; 8:28) Afei, hom mma yɛnhwɛ ndzɛmba a ɔtsetse dɛm a hɛn sor Egya no yɛ dze kyerɛ dɛ ɔdwen hɛnho.

10. Dɛ mbrɛ Ndwom 66:19, 20 kyerɛ no, ebɛn kwan do na Jehovah da no edzi dɛ ɔdɔ hɛn?

¹⁰ Jehovah tsie hɛn mpaabɔ. (Kenkan Ndwom 66:19, 20.) Jehovah nnkyerɛɛ mpɛn dodow pɔtsee a yɛmbɔ mpaa, ndzɛmba pɔtsee a yɛmbɔ ho mpaa, nye ber tsentsen a ɔsɛ dɛ yɛdze bɔ mpaa. (1 Thess. 5:17) Yebotum efi obu mu abɔ hɛn Nyankopɔn mpaa aber biara, ɔmmfa ho beebi a yɛwɔ. Ɔwɔ adagyer a ɔdze tsie hɛn, na dabaa ɔyɛ aso ma hɛn mpaabɔ. Sɛ yehu dɛ Jehovah tsie hɛn mpaabɔ a, ɔma yɛtwe bɛn no kɛse. Ɔdwontofo no kãa dɛ: ‘Modɔ Jehovah osiandɛ oetsie me ndze.’​—Ndw. 116:1.

11. Ebɛn kwan do na Jehovah tsie hɛn mpaabɔ?

¹¹ Ɔnnyɛ hɛn mpaabɔ nkotsee na hɛn Egya tsie, mbom ɔma ho mbuae so. Ɔsomafo John ma hɛn awerɛhyɛmu dɛ: “Sɛ yɛserɛ biribiara dɛ mbrɛ ɔpɛ a, otsie hɛn.” (1 John 5:14, 15) Nokwasɛm nye dɛ, obotum aba dɛ Jehovah rummbua hɛn mpaabɔ dɛ mbrɛ yɛhwɛ kwan. Ɔno na onyim dza oye ma hɛn, ntsi ɔtɔ da a, dza yɛdze to n’enyim wɔ mpaabɔ mu no, ɔremma hɛn mbuae a yɛpɛ anaadɛ ɔbɛma yɛatweɔn kakra.​—2 Cor. 12:7-9.

12-13. Ebɛn kwan ahorow do na hɛn sor Egya no dze hɛn ehiadze ma hɛn?

¹² Jehovah dze hɛn ehiadze ma hɛn. Dza Jehovah hwehwɛ dɛ egyanom nyina yɛ no, dɛmara na ɔno so yɛ. (1 Tim. 5:8) Ɔdze ndzɛmba a ne mba hia ama wɔaakɔ do atsena ase no ma hɔn. Ɔmmpɛ dɛ yɛbɔdwendwen dza yebedzi, dza yɛbɛhyɛ, anaa beebi a yɛbɛda ho. (Matt. 6:32, 33; 7:11) Osiandɛ Jehovah yɛ egya a ɔwɔ ɔdɔ ntsi, ɔayɛ nhyehyɛɛ mpo a ɔbɛma hɛn nsa aka dza yebehia daakye.

¹³ Dza ɔkyɛn ne nyina no, Jehovah ma hɛn dza yehia ama yɛnye no eenya ebusuabɔ pa. Ɔnam Bible no do ama yeehu noho nokwasɛm, tsirmpɔw ntsi a ɔbɔɔ adze nyina, siantsir a ɔbɔɔ nyimpa, nye dza obesi daakye. Ber a odzi kan a yesũaa nokwar no, Jehovah daa no edzi kyerɛɛ hɛn dɛ ɔdwen hɛnho. Ɔnam hɛn awofo anaa afofor do boaa hɛn ma yehun no yie. Afei so, yɛkɔ do nya mboa fi asafo mu mpanyimfo a wɔwɔ ɔdɔ nye enuanom mbarimba na mbaa afofor a hɔnho akokwaa hɔ. Nkyii so, Jehovah nam asafo nhyiamu, beebi a yɛnye hɛn nuanom mbarimba na mbaa bɔ mu sũa adze do kyerɛkyerɛ hɛn. Jehovah nam dɛm akwan yi nye akwan afofor do da no edzi dɛ ɔdwen hɛn nyina ho.​—Ndw. 32:8.

14. Ebɛnadze ntsi na Jehovah tsetse hɛn, na ebɛn kwan do na ɔyɛ dɛm?

¹⁴ Jehovah tsetse hɛn. Yɛnntse dɛ Jesus osiandɛ yenndzi mũ. Ntsi, mbrɛ ɔbɛyɛ a hɛn Egya a ɔwɔ ɔdɔ no bɛtsetse hɛn no, ɔtsẽa hɛn wɔ mber a ɔsɛ mu. N’Asɛm no ma ɔtsena hɛn adwen mu dɛ: ‘Nyia Jehovah dɔ no na ɔtsẽa no.’ (Heb. 12:6, 7) Jehovah nam akwan pii do tsẽa hɛn. Dɛ nhwɛdo no, bi a asɛm bi a yɛbɛkenkan wɔ Bible no mu anaa asɛm bi a yɛbɛtse wɔ asafo nhyiamu ase bɛma yehu dɛ ɔwɔ dɛ yɛyɛ nsesa wɔ hɛn nsusui mu anaa yɛsesa hɛn akwan. Bi so a, yebenya mboa a yɛrohwehwɛ no efi asafo mu mpanyimfo hɔ. Ɔmmfa ho ɔkwan a Jehovah bɛfa do atsẽa hɛn no, ɔdɔ na okenyan no daa ma ɔyɛ dɛm.​—Jer. 30:11.

15. Ebɛn akwan do na Jehovah bɔ hɛnho ban?

¹⁵ Jehovah boa hɛn ma yegyina nsɔhwɛ ano. Dɛ mbrɛ egya a ɔwɔ ɔdɔ boa ne mba ber a wohyia nsɛndzendzen no, dɛmara so na hɛn  sor Egya boa hɛn ma yegyina hɛn nan do wɔ nsɔhwɛ mu. Ɔnam no sunsum krɔnkrɔn do bɔ hɛnho ban fi biribiara a obotum asɛɛ ebusuabɔ a yɛnye no wɔ no ho. (Luke 11:13) Afei so, Jehovah boa hɛn ber a hɛn abaw mu ebu no. Dɛ nhwɛdo no, ɔama hɛn daakye ho enyidado a ɔyɛ enyigye. Dɛm enyidado yi boa hɛn ma yegyina nsɛndzendzen ano. Yɛmma dɛm asɛm yi ntsena hɛn adwen mu: Ɔmmfa ho adze bɔn biara a ɔbɔto hɛn no, hɛn Egya a ɔwɔ ɔdɔ no beyi amandzehu a adze bɔn no dze bɛba hɛn do no efi hɔ. Nsɔhwɛ biara a yerihyia no, ɔyɛ ber tsiabaa mu adzeyɛ, naaso nhyira a Jehovah dze ma hɛn no mmbɔ adze da.​—2 Cor. 4:16-18.

16. Ber a Adam annyɛ setsie amma n’Egya a ɔwɔ ɔdɔ no, ebɛn asɛm sii?

¹⁶ Sɛ yɛhwɛ dza Jehovah yɛe ber a Adam yɛɛ no do asoɔdzen no a, yehu adanse a ɔkyerɛ dɛ Jehovah dɔ hɛn. Ber a Adam annyɛ setsie amma no sor Egya no, ɔhweer ho kwan a nna ɔwɔ wɔ Jehovah n’ebusua mu no. Ne mba so hweer ho kwan a ɔtse dɛm. (Rom. 5:12; 7:14) Naaso, Jehovah yɛɛ biribi dze boaa Adam n’asefo.

17. Ber a Adam tseew etũa no, ebɛnadze na Jehovah yɛɛ ntsɛmara?

¹⁷ Jehovah twee Adam n’aso, naaso ɔmaa ne mba a nna ɔbɔwo hɔn no enyidado. Jehovah hyɛɛ bɔ ntsɛmara dɛ, nyimpa a wɔbɛyɛ setsie no, ɔbɛsan dze hɔn abɛka n’ebusua ho. (Gen. 3:15; Rom. 8:20, 21) Jehovah nam no Dɔba Jesus no werdam afɔrbɔ no do na ɔyɛɛ dɛm. Jehovah nam ne Ba a ɔdze no bɔɔ afɔr maa hɛn no do daa no edzi dɛ ɔdɔ hɛn papaapa.​—John 3:16.

18. Sɛ yɛatwe hɛnho efi Jehovah ho mpo a, ebɛnadze ntsi na yebotum agye edzi dɛ ɔda ho ara pɛ dɛ yɛyɛ ne mba?

¹⁸ Ɔwɔ mu dɛ yenndzi mũ dze, naaso Jehovah pɛ dɛ yɛbɛka n’ebusua ho. Nkyii so, ommbu hɛn dɛ yɛyɛ adzesoa bi ma no. Obotum  aba dɛ yɛbɛma Jehovah ne nsa esi famu anaa yɛbɔtwe hɛnho efi noho kakra, naaso ɔremmpa abaw wɔ hɛnho. Jesus kãa ɔba a ɔyewee no ho asɛm dze kyerɛɛ mbrɛ Jehovah si dɔ ne mba. (Luke 15:11-32) Egya a Jesus kãa noho asɛm wɔ dɛm mfatoho no mu no kɔr do nyaa ahotodo dɛ ne ba no bɛsan aba fie. Ber a ɔba no sanee baa fie no, egya no dze enyigye maa no akɔaba. Sɛ yɛatwe hɛnho efi Jehovah ho, na sɛ yeenu hɛnho a, yebotum enya ahotodo dɛ hɛn Egya a ɔwɔ ɔdɔ no ayɛ krado dɛ ɔbɛgye hɛn ato mu.

19. Ebɛn kwan do na Jehovah besiesie ɔhaw a Adam dze aba no?

¹⁹ Hɛn sor Egya no besiesie ɔhaw a Adam dze aba no nyina. Ber a Adam tseew etũa no, ɔno ekyir no, Jehovah sii gyinae dɛ ɔbɛpaw nyimpa 144,000 efi adasamba mu a wɔbɛka ne Ba no ho wɔ sor ma wɔaasom dɛ ahemfo na asɔfo. Wiadze fofor no mu no, Jesus nye hɔn a wɔnye no bɔbɔ mu edzi hen no bɔboa adasamba a wɔyɛ asomberɛw no ma wɔaayɛ nyimpa a wodzi mũ. Sɛ wɔyɛ setsie na wodzi konyim wɔ nsɔhwɛ a otwa tun no mu a, Nyankopɔn bɛma hɔn nkwa a onnyiewiei. Afei, sɛ hɛn sor Egya no hu dɛ ne mbabanyin nye ne mbabaa a wodzi mũ ahyɛ asaase do mã a, n’enyi bɛgye papaapa. Hwɛ enyigye ara a dɛm ber no bɛyɛ!

20. Ebɛn akwan do na Jehovah ada no edzi dɛ ɔdɔ hɛn papaapa, na ebɛnadze na yebosusu ho wɔ adzesua a odzi hɔ no mu?

²⁰ Jehovah ada no edzi dɛ ɔdɔ hɛn papaapa. Ɔyɛ Egya a ɔkyɛn egya biara. Otsie hɛn mpaabɔ na ɔma hɛn dza yehia ama yaakɔ do atsena ase. Nkyii so, ɔma hɛn dza yehia ama yaakɔ do nye no enya ebusuabɔ. Ɔma hɛn ntsetsee na mboa a yehia. Afei so, daakye ɔbɛma yenya nhyira a ɔyɛ enyigye. Ɔyɛ hɛn enyigye dɛ yebohu dɛ hɛn Egya dɔ hɛn na ɔdwen hɛnho so! Adzesua a odzi hɔ mu no, yɛbɔhwɛ dza yebotum ayɛ dze akyerɛ dɛ, dɛ ne mba no, hɛn enyi sɔ ɔdɔ a ɔda no edzi kyerɛ hɛn no.