1. Ebɛn awerɛhyɛmu na Jehovah dze ma hɔn a woenu hɔnho wɔ hɔn bɔn ho no?

 JEHOVAH nye hɛn Bɔfo, hɛn Mbrahyɛfo nye hɛn Tsɛmbuafo. Ɔsan so yɛ hɛn sor Egya na ɔdɔ hɛn. (Ndw. 100:3; Isa. 33:22) Sɛ yɛyɛ Jehovah bɔn na sɛ yenu hɛnho nokwar mu a, ɔwɔ tum dɛ ɔdze hɛn bɔn bɛkyɛ hɛn, na ɔpɛ paa dɛ ɔbɛyɛ dɛm so. (Ndw. 86:5) Jehovah nam nkɔnhyɛnyi Isaiah do maa hɛn awerɛhyɛmu dɛ: “Kaansa hom bɔn tse dɛ adaaben mpo a, ɔbɔhoa dɛ esukwankyɛba.”​—Isa. 1:18.

2. Sɛ yebotum nye hɛn nuanom atsena asomdwee mu a, ebɛnadze na ɔsɛ dɛ yɛyɛ?

² Yɛyɛ nyimpa a bɔn wɔ hɛnho, ntsi ɔtɔ da a, yɛka asɛm bi anaa yɛyɛ biribi ma ɔhaw afofor. (Jas. 3:2) Naaso, iyi nnkyerɛ dɛ yerunntum nye hɛn nuanom nnya anyɛnkofa a no mu yɛ dzen. Adze a obotum aboa hɛn nye dɛ yɛdze hɛn mfom bɛkyekyɛ hɛnho. (Mbɛ. 17:9; 19:11; Matt. 18:21, 22) Sɛ hɛn nuanom yɛ ndzɛmba ahorow bi ma ɔhaw hɛn, anaa yɛyɛ ndzɛmba ahorow bi ma ɔhaw hɛn nuanom a, Jehovah hwɛ kwan dɛ hɛn nyina begyaa mu ma wɔaaka. (Col. 3:13) Yɛwɔ siantsir papabi ntsi a ɔsɛ dɛ yɛyɛ dɛm. Yɛreka yi ara, Jehovah mpo dze hɛn bɔn kyɛ hɛn ‘ma ɔbor do.’​—Isa. 55:7.

3. Ebɛnadze na yebosusu ho wɔ adzesua yi mu?

³ Adzesua yi mu no, yɛbɔhwɛ kwan a yebotum afa do esuasua mbrɛ Jehovah dze bɔn kyɛ no. Yɛbɛsan so ahwɛ bɔn a ɔsɛ dɛ yɛka ho asɛm kyerɛ asafo mu mpanyimfo no. Bio so, yɛbɔhwɛ siantsir a Jehovah tu hɛn fo dɛ yɛmfa afofor hɔn bɔn nkyɛ hɔn. Afei so, yɛbɔhwɛ dza yebotum esua efi hɛn nuanom binom a afofor hɔn bɔn ntsi woehu amandze paa no hɔ.

4. (a) Sɛ Jehovah no somfo bi yɛ bɔn kɛse bi a, ebɛnadze na ɔsɛ dɛ ɔyɛ? (b) Sɛ mpanyimfo no hyia nyia ɔayɛ bɔn no a, ebɛnadze na wɔyɛ?

⁴ Sɛ onua bi ayɛ bɔn kɛse na sɛ yenyim ho asɛm a, ɔnodze ɔsɛ dɛ yɛma asafo mu mpanyimfo aso tse. Wɔaka bɔn akɛse yi bi ho asɛm wɔ 1 Corinthfo 6:9, 10. Iyinom yɛ bɔn a obi yɛ a ɔkyerɛ dɛ oebu Nyankopɔn ne mbra do koraa. Sɛ onua bi yɛ bɔn a ɔtse dɛm a, ɔsɛ dɛ ɔbɔ mpaa serɛ Jehovah hɔ bɔnfakyɛ. Ɔno ekyir no, ɔsɛ dɛ ɔkɛka ho asɛm kyerɛ mpanyimfo no. (Ndw. 32:5; Jas. 5:14) Ebɛnadze na mpanyimfo no bɛyɛ wɔ ho? Jehovah nkotsee na ɔwɔ tum dɛ ɔdze bɔn kyɛ koraa, na ogyina werdam afɔrbɔ no do na ɔyɛ dɛm. * Naaso, ɔdze hokwan no ama asafo mu mpanyimfo dɛ wongyina Bible no do nhwɛ dɛ onua bi a ɔayɛ bɔn no fata dɛ ɔtsena asafo no mu anaa ɔsɛ dɛ wotu no. (1 Cor. 5:12) Mbrɛ ɔbɛyɛ a wobotum ayɛ dɛm no, wɔyɛ ndzɛmba ahorow bi. No mu kor nye dɛ wobisa hɔnho nsɛm a odzidzi do yi: Ana onua no gyee enyim ara na ɔyɛɛ bɔn no? Aso odzii kan dwendwen ho dɛ onya a ɔbɛyɛ bɔn a ɔtse dɛm? Aso ɔyɛ bɔn a ɔakɔ do ara ayɛ no ber tsentsen bi? Dza no ho hia paa no, ana biribi wɔ hɔ a wobotum egyina do aka dɛ oenu noho nokwar mu? Ana biribi wɔ hɔ a wobotum egyina do aka dɛ Jehovah dze no bɔn no akyɛ no?​—Andw. 3:19.

5. Dza mpanyimfo yɛ aber a onua bi ayɛ bɔn no, ebɛn kwan do na ɔboa asafo no?

⁵ Sɛ asafo mu mpanyimfo nye onua bi a ɔayɛ bɔn hyia a, wɔhwɛ hu dɛ gyinae a wobesi no nye dza Jehovah esi wɔ sor dada no behyia. (Matt. 18:18) Ebɛn kwan do na dɛm nhyehyɛɛ yi boa asafo no? Dɛm nhyehyɛɛ yi bɔ asafo no ho ban, osiandɛ ɔma woyi ndzebɔnyɛfo a wonnu hɔnho no fi asafo no mu amma enuanom eennsuasua hɔn ndzeyɛbɔn no. (1 Cor. 5:6, 7, 11-13; Titus 3:10, 11) Bio so, obotum aboa nyia ɔayɛ bɔn no ma oeenu noho ama Jehovah dze no bɔn aakyɛ no. (Luke 5:32) Mpanyimfo no bɔ mpaa ma nyia oenu noho no na wɔserɛ Jehovah dɛ ɔmboa no ma ɔnye no nnya ebusuabɔ pa bio.​—Jas. 5:15.

6. Sɛ wotu obi fi asafo no mu a, aso obotum ayɛ yie dɛ Jehovah dze no bɔn bɛkyɛ no? Kyerɛkyerɛ mu.

⁶ Sɛ ɔba no dɛ mpanyimfo hyia nyia ɔayɛ bɔn no na biribiara kyerɛ dɛ onnuu noho so ɛ? Sɛ ɔba dɛm a, otu ara na wobotu no efi asafo no mu. Sɛ oebu aban mbra do a, asafo mu mpanyimfo no bɛma kwan ma aban no nye no edzi. Jehovah ama etumfo a wɔwɔ hɔ no hokwan dɛ wɔntwe obiara a obu aban mbra do no aso, ɔno sɛ nyimpa no enu noho o, onnuu noho o, wɔbɔtwe n’aso. (Rom. 13:4) Naaso, sɛ ekyir yi nyia ɔayɛ bɔn no enyi ba noho do na onu noho nokwar mu na ɔdan noho fi no kwan bɔn no ho a, Jehovah so ayɛ krado dɛ ɔdze no bɔn bɛkyɛ no. (Luke 15:17-24) Sɛ bɔn a ɔyɛɛ no yɛ kɛse dɛn ara mpo a, Jehovah dze bɛkyɛ no.​—2 Mber. 33:9, 12, 13; 1 Tim. 1:15.

7. Yebesi dɛn dze obi a ɔafom hɛn no no bɔn akyɛ no?

⁷ Nnyɛ hɛn na ɔsɛ dɛ yesi gyinae dɛ ɔsɛ dɛ Jehovah dze obi no bɔn kyɛ no anaa ɔnnsɛ dɛ ɔdze kyɛ no. Iyi mmfa dadwen biara mmbɔto hɛn do na ɔma hɛn akoma tɔ hɛn yamu! Naaso, gyinae bi wɔ hɔ a ɔnodze hɛn ara na ɔsɛ dɛ yesi. Ɔyɛ ebɛn gyinae? Ɔtɔ da a, obi botum ayɛ hɛn bɔn, bi mpo a na ɔyɛ bɔn kɛse bi. Naaso, bi a ekyir yi ɔbɛpa hɛn kyɛw na ɔaka dɛ yɛmfa no bɔn nkyɛ no. Sɛ ɔba no dɛ nyimpa no ammbɛpa hɛn kyɛw so ɛ? Ɔno mpo no, yebotum esi gyinae dɛ yɛdze bɛkyɛ no na yaayɛ dza yebotum biara dɛ yɛremmfa noho ebufuw  nnhyɛ hɛn mu. Nokwasɛm nye dɛ, iyi ne yɛ nnda famu. Bi a ɔbɛgye mber nye mbɔdzembɔ ana yeetum dze no bɔn akyɛ no tsitsir aber a dza ɔyɛe no ahaw hɛn paa no. September 15, 1994 Ɔweɔn-Aban no kaa dɛ: “Sɛ edze obi no bɔn kyɛ no a, ɔnnkyerɛ dɛ esosɔw bɔn no do. Christiannyi a ɔdze afofor bɔn kyɛ hɔn no, ɔwɔ awerɛhyɛmu dɛ Jehovah nankasa bedzi asɛm no ho dwuma wɔ kwan pa do. Jehovah yɛ amansan yi Tsɛmbuafo a obu atsɛntsenenee aber nyina na obobu atsɛn pa wɔ ber a ɔfata mu.” Ebɛnadze ntsi na Jehovah hyɛ hɛn nkuran dɛ yɛmfa afofor hɔn bɔn nkyɛ hɔn na yennya no mu gyedzi dɛ obobu atsɛntsenenee?

8. Sɛ hɛn enyi sɔ ehumbɔbɔr a Jehovah da no edzi kyerɛ hɛn no a, ɔbɛka hɛn ma yaayɛ dɛn?

⁸ Sɛ yɛdze afofor hɔn bɔn kyɛ hɔn a, yɛda no edzi dɛ hɛn enyi sɔ ehumbɔbɔr a Jehovah da no edzi no. Jesus ne mfatoho kor bi mu no, ɔkaa dɛ nna akowaa bi dze no wura kaw kɛse bi a onntum nntua. Naaso, owura no dze akowaa no ne kaw no kyɛɛ no. Jesus dze Jehovah totoo dɛm owura no ho. Akowaa a wɔdze ne kaw kyɛɛ no no ennhu ne nyɛnko akowaa bi a nna ɔdze no kaw kakraabi no mbɔbɔr. (Matt. 18:23-35) Nna ebɛnadze na Jesus pɛ dɛ yesua fi mfatoho yi mu? Sɛ hɛn enyi sɔ ehumbɔbɔr kɛse a Jehovah da no edzi kyerɛ hɛn no a, ɔbɛka hɛn ma hɛn so yɛdze afofor hɔn bɔn aakyɛ hɔn. (Ndw. 103:9) Mfe pii a abɛsen kɔ no, Ɔweɔn-Aban no kaa dɛ: “Sɛ yɛdze mpɛn dodow a yɛdze hɛn nuanom hɔn bɔn akyɛ hɔn no toto mpɛn dodow a Jehovah nam Christ do ehu hɛn mbɔbɔr, na ɔdze hɛn bɔn akyɛ hɛn no ho a, hɛndze no nndu Jehovah nedze no ho beebiara.”

9. Woananom na Jehovah hu hɔn mbɔbɔr? (Matthew 6:14, 15)

⁹ Sɛ yɛdze afofor hɔn bɔn kyɛ hɔn a, Jehovah so dze hɛn dze bɛkyɛ hɛn. Hɔn a wohu nkorɔfo mbɔbɔr no, Jehovah so hu hɔn mbɔbɔr. (Matt. 5:7; Jas. 2:13) Jesus kaa iyi ho asɛm pefee aber a nna ɔrekyerɛ n’esuafo no mbrɛ wonsi mbɔ mpaa no. (Kenkan Matthew 6:14, 15.) Sɛ yɛhwɛ asɛm a Jehovah kaa kyerɛɛ no somfo nokwafo Job no a, yenya esuadze a ɔtse dɛmara wɔ mu. Nna Job n’anyɛnkofo baasa, Eliphaz, Bildad, nye Zophar akeka nsɛm bi ma ayɛ Job yaw paa. Naaso, Jehovah kaa kyerɛɛ Job dɛ ɔmbɔ mpaa mma hɔn. Aber a ɔyɛɛ dɛm no, Jehovah hyiraa no.​—Job 42:8-10.

10. Sɛ yɛdze obi noho ebufuw hyɛ hɛn mu a, ebɛn ɔhaw na obotum aba hɛn do? (Ephesusfo 4:31, 32)

¹⁰ Sɛ yɛdze obi noho ebufuw hyɛ hɛn mu a, yɛhaw hɛnara hɛnho. Ebufuw tse dɛ adzesoa a no mu yɛ dur. Ntsi sɛ Jehovah ka kyerɛ hɛn dɛ mma yɛmmfa ebufuw nnhyɛ hɛn mu a, nna ɔkyerɛ dɛ ɔmmpɛ dɛ yɛdze adzesoa biara to hɛnho do, mbom ɔpɛ dɛ hɛn asomu dwe hɛn. (Kenkan Ephesusfo 4:31, 32.) Jehovah tu hɛn fo dɛ yɛmma ‘ebufuw ntɔ, na yengyaa akoma bɔn.’ (Ndw. 37:8) Sɛ yɛdze dɛm afotu yi yɛ edwuma a ɔbɔboa hɛn paa. Sɛ yɛdze obi noho ebufuw hyɛ hɛn mu a, obotum aka hɛn apɔwmudzen nye hɛn adwen. (Mbɛ. 14:30) Nyimpa a ɔyɛɛ hɛn bɔn no dze, ɔrennka no wɔ kwan biara do. Sɛ yɛdze obi ho ebufuw hyɛ hɛn mu a ɔtse dɛ yɛanom poison, hɛnara na yeboku hɛnho na nyimpa no dze hwee rennyɛ no. Iyi ntsi sɛ yɛdze afofor hɔn bɔn kyɛ hɔn a, nna hɛnara na yɛreyɛ hɛn kra yie. (Mbɛ. 11:17) Hɛn asomu bɔdwe hɛn na yɛdze enyigye bɔkɔ do asom Jehovah.

11. Ebɛn asɛm na Bible no ka wɔ afofor a yɛbɛyɛ hɔn bɔn dze etua hɔn bɔn do kaw no ho? (Romefo 12:19-21)

¹¹ Jehovah na ɔwɔ hokwan dɛ otua bɔn do  kaw. Jehovah mmaa hɛn hokwan dɛ sɛ obi yɛ hɛn bɔn a yɛnyɛ bi ntua no kaw. (Kenkan Romefo 12:19-21.) Yɛyɛ nyimpa a bɔn wɔ hɛnho na mbrɛ Jehovah hu ndzɛmba no, nnyɛ dɛm na yehu no. Iyi ntsi yerunntum mmbu atsɛn pɛpɛɛpɛr dɛ mbrɛ Jehovah bu atsɛn no. (Heb. 4:13) Afei so, ɔtɔ da a, mbrɛ yesi tse nka wɔ ndzɛmba ho no ma otum yɛ dzen ma hɛn dɛ yebobu atsɛn a ɔtsen. Jehovah maa James kaa dɛ: “Nyimpa ebufuw nnyɛ Nyankopɔn tsenenee ho edwuma.” (Jas. 1:20) Ɔsɛ dɛ yenya awerɛhyɛmu dɛ Jehovah bɛyɛ dza ɔtsen na ɔbɔhwɛ dɛ obobu atsɛntsenenee ama obiara.

12. Yebesi dɛn akyerɛ dɛ yɛwɔ ahotodo dɛ Jehovah bu atsɛntsenenee?

¹² Sɛ yɛdze afofor hɔn bɔn kyɛ hɔn a, ɔkyerɛ dɛ yɛwɔ ahotodo dɛ Jehovah bu atsɛntsenenee. Sɛ yegyaa dza woesi biara mu ma Jehovah a, ɔkyerɛ dɛ yɛwɔ ahotodo dɛ obotum esiesie ɔhaw biara a bɔn dze aba no. Nyankopɔn no wiadze fofor no mu no, nsɛm a woesisi wɔ hɛn asetsena mu a ɔma yedzi awerɛhow no, ‘yɛrennkaa na ɔremmba hɛn adwen mu bio’ dabiarada. (Isa. 65:17) Naaso, sɛ ɔba no dɛ bɔn a obi dze ayɛ hɛn no ahaw hɛn paa so ɛ, ana obotum ayɛ yie dɛ yebeyi yaw na ebufuw no efi hɛn mu? Nyew. Ma yɛnhwɛ dza binom ayɛ a wɔaboa hɔn ma woetum ayɛ dɛm.

13-14. Ebɛnadze na Tony na José hɔn asɛm no ama esua afa bɔnfakyɛ ho?

¹³ Enuanom beberee wɔ hɔ a, afofor yɛɛ hɔn adze ma ɔhaaw hɔn paa, naaso wosii gyinae dɛ wɔdze bɛkyɛ hɔn. Ebɛn mfaso na wonyae fii dza wɔyɛe no mu?

¹⁴ Dɛ nhwɛdo no, Tony * wɔ Philippines. Mfe pii ansaana ɔrebɛyɛ Jehovah Dasefo no, ɔtsee dɛ ɔbarimba bi a wɔfrɛ no José eku no nua panyin. Dɛm aber no nna Tony nnka mbra koraa na ɔyɛɛ dɛ ɔbɛyɛ no bi ahyɛ ananmu. Wɔkyeer José na wɔdze no kɔtoo efiadze. Ekyir yi, woyii José fii efiadze. Aber a Tony tsee no, ɔkaa ntam dzii nsew dɛ ɔbɔhwehwɛ no na oeeku no bi. Iyi ntsi ɔkɔtɔɔ itur dɛ ɔdze boku no. No mu hɔ ara na Jehovah Adasefo hyɛɛ ase dɛ wɔnye no rusua adze. Tony kaa dɛ: “Bible no a musuae no maa muhun dɛ ɔsɛ dɛ mesesa mo suban na me ndzeyɛɛ. Nna iyi hwehwɛ dɛ miyi  afofor ho ebufuw fi mo mu.” Ber kɔr do no, wonumaa Tony na ekyir yi ɔbɛyɛɛ asafo mu panyin. Ɔwɔ mu ara na ɔtsee dɛ José so abɛyɛ Jehovah Dasefo, na iyi yɛɛ no nwanwa paa! Ewiei koraa no, aber a wohyiae no, wɔyɛɛ hɔnho etuu na Tony kaa kyerɛɛ José dɛ ɔdze no bɔn akyɛ no. Tony kaa dɛ bɔn a ɔdze kyɛe no maa n’enyi gyee araa ma nna onnhu dza ɔnnka mpo. Jehovah hyiraa Tony wɔ ne pɛ mu a ofii dze bɔn kyɛe no ho.

15-16. Ebɛnadze na Peter na Sue hɔn asɛm no ama esua afa bɔnfakyɛ ho?

¹⁵ Afe 1985 mu no, nna Peter na Sue wɔ Ahendzi Asa do a woritsie Bible mu ɔkasa. Awerɛfir mu ara na ɔtopaa bi towee. Ɔbarimba bi na ɔdze dɛm ɔtopaa no kɛhyɛɛ Ahendzi Asa do hɔ! Sue piraa kɛse paa ma ɔkaa n’asowa na n’enyiwa. Afei so nna ɔnntse biribi no hua mpo. * Asɛm a nna Peter na Sue taa bisa hɔnho nye dɛ, ‘Woana paa na ɔyɛɛ dɛm ewurkadze yi?’ Mfe bi ekyir no, wɔkyeer nyimpa bɔn a ɔdze ɔtopaa no kɛhyɛɛ hɔ no, na wɔkaa dɛ ɔnkɛda efiadze no nkwa nda nyina. Nna ɔnnyɛ Jehovah Dasefo. Aber a wobisaa Peter na Sue dɛ wɔdze nyimpa no no bɔn akyɛ no no, dza wɔkae nye dɛ: “Jehovah kyerɛkyerɛ hɛn dɛ sɛ yɛdze obi noho ebufuw hyɛ hɛn mu a, obotum ahaw hɛn apɔwmudzen, hɛn adwen nye mbrɛ yesi tse nka wɔ ndzɛmba ho. Ntsi ahyɛse no ara na yɛserɛɛ Jehovah dɛ ɔmboa hɛn ma yenyi nyimpa no noho ebufuw mfi hɛn mu na yɛmbɔ hɛn bra.”

¹⁶ Aso aber nyina na ɔyɛ mberɛw ma hɔn dɛ wobeyi nyimpa no ho ebufuw efi hɔn mu? Oho. Wɔtoaa hɔn asɛm no do dɛ: “Ɔtɔ da a, dza ɔtoo Sue no ma yehyia ɔhaw wɔ hɛn asetsena mu, na iyi tum ma hɛn bo fuw kakra. Naaso, sɛ ɔba dɛm a yɛmmfa hɛn adwen nnsi asɛm no do pii na iyi boa hɛn ma yeyi ebufuw no fi hɛn mu ntsɛm. Yebotum efi hɛn akoma mu aka dɛ, daakye bi sɛ owudzifo no bɛyɛ Jehovah Dasefo a, yɛbɛyɛ no awaawaa etuu. Dza osii no ama yeehu dɛ sɛ yɛdze Bible mu afotusɛm yɛ edwuma a, ɔma hɛnho tɔ hɛn paa. Na mfaso a ɔma yenya so dze, wɔnnka!  Afei so yenyim dɛ ɔrennkyɛr Jehovah beyi ɔhaw nyina efi hɔ, na iyi ma hɛn akoma tɔ hɛn yamu.”

17. Ebɛnadze na Myra n’asɛm no ama esua afa bɔnfakyɛ ho?

¹⁷ Aber a Myra bɛyɛɛ Jehovah Dasefo no, nna ɔawar awo mba beenu. No kun no dze, ɔammbɔsom Jehovah. Ekyir yi, banyin no kɔbɔɔ edwaman na ogyaa ebusua no hɔ. Myra kaa dɛ: “Aber a mo kun gyaa hɛn hɔ no, ɔyɛɛ me yaw paa na dɛmara na nyimpa piinara tse nka aber a hɔn dɔfo bi eyi hɔn tokyen no. Ɔtɔɔ mo do, nna menngye nndzi, mo werɛ howee, mo bo fuwii, na metsee nka mpo dɛ mara na mayɛ.” Ɔwɔ mu dɛ woguu awar no dze, naaso nna ɔda ho ara dzi yaw wɔ dza no kun yɛe no ho. Myra dze kaa ho dɛ: “Metsee nka dɛm abosoom pii, na muhun dɛ iyi resɛɛ ebusuabɔ a menye Jehovah na afofor wɔ no.” Seseiara, asɛm a Myra ka nye dɛ oeyi banyin a nna ɔwar no no ho ebufuw efi no mu na ɔmmpɛ dɛ asɛm bɔn biara bɔto no. Dza ɔpɛ mpo nye dɛ daakye bi ɔbɛba abɛyɛ Jehovah Dasefo. Myra dze enyigye rohwɛ daakye kwan. Ɔwɔ mu dɛ ɔyɛ baatankor dze, naaso oetum aboa ne mba beenu no ma wɔrosom Jehovah. Yɛrekasa yi, Myra nye ne mba no na hɔn mbusua dze enyigye rosom Jehovah.

18. Jehovah nye Ɔtsɛmbuafo a ɔkyɛn biara. Ebɛn awerɛhyɛmu na iyi ma yenya?

¹⁸ Ɔnnyɛ hɛn na yɛbɛkyerɛ mbrɛ ɔsɛ dɛ wobu nkorɔfo atsɛn. Iyi a yenyim no ma hɛn enyi gye paa! Jehovah nye Ɔtsɛmbuafo a ɔkyɛn biara na ɔno na ɔyɛ n’edwuma dɛ obu atsɛn. (Rom. 14:10-12) Ɔsɛ dɛ yenya awerɛhyɛmu dɛ Jehovah nyim dza ɔyɛ papa na bɔn. Ntsi aber nyinara obobu atsɛn pa. (Gen. 18:25; 1 Ahe. 8:32) Jehovah rennyɛ biribi a ɔnntsen da!

19. Ebɛnadze na yɛrohwɛ kwan dɛ Jehovah a ɔyɛ atsɛntsenenee Egya no bɛyɛ?

¹⁹ Yɛdze enyigye rohwɛ kwan dɛ ber bi bɛba a, Jehovah beyi ɔhaw a hɛn sintɔ nye bɔn dze aba no nyina efi hɔ koraa. Dɛm aber no, ɔhaw na yaw a yɛrefa mu nyina befi hɔ koraa. (Ndw. 72:12-14; Nyi. 21:3, 4) Yɛrennkaa no bio. Naaso, kesi dɛ dɛm aber no bɛba no, yɛwɔ hokwan dɛ yesuasua Jehovah na yɛdze afofor hɔn bɔn kyɛ hɔn. Iyi yɛ hokwan a Jehovah dze ama hɛn na hɛn enyi sɔ paa.