1. Ebɛnadze na Nyankopɔn dze maa n’asomfo anokwafo wɔ tsetse mber mu?

 BIBLE no taa ka mbarimba anokwafo bi ho asɛm dɛ nna wɔyɛ dzen. Naaso nna ɔnnyɛ aber nyina na wɔtse nka dɛ wɔyɛ dzen. Sɛ yɛfa Ɔhen David dɛ nhwɛdo a, mber bi wɔ hɔ a, nna ɔtse nka dɛ Nyankopɔn dze no etsim hɔ “dzendzen dɛ bepɔw.” Naaso ɔtɔ da a nna ɔbɔ hu. (Ndw. 30:7) Samson so, sɛ Nyankopɔn no sunsum ba no do a, nna noho yɛ dzen araa ma wɔnnka. Naaso obohun dɛ sɛ onnyi no do a ɔyɛ mberɛw, ‘na ɔyɛ tse dɛ nyimpa biara.’ (Atsɛ. 14:​5, 6; 16:17) Dɛm mbarimba anokwafo yi hɔn asɛm no ma yehu dɛ, nna Jehovah na ɔma hɔn ahoɔdzen.

2. Ebɛnadze ntsi na ɔsomafo Paul kaa dɛ ɔyɛ mberɛw a na ɔyɛ dzen? (2 Corinthfo 12:​9, 10)

² Ɔsomafo Paul so bohun dɛ ohia Jehovah no hɔ ahoɔdzen. (Kenkan 2 Corinthfo 12:​9, 10.) Hɛn mu pii wɔ hɔ a, yarba retseetsee hɛn. Paul so kɔr tsebea a ɔtse dɛm mu. (Gal. 4:​13, 14) Ɔtɔ da so a, nna ɔyɛ dzen ma no dɛ ɔbɛyɛ dza ɔtsen. (Rom. 7:​18, 19) Ɔno da nkyɛn a, nna ɔyɛ a ɔbɔ hu, osiandɛ nna onnyim dza ɔbɔto no daakye. (2 Cor. 1:​8, 9) Naaso sɛ nna Paul yɛ mberɛw a na ɔyɛ dzen. Ebɛnadze ntsi na yɛreka dɛm? Siantsir nye dɛ Jehovah maa Paul ahoɔdzen a ohia no, na ɔhyɛɛ no dzen.

3. Ebɛn nsɛmbisa na yebosusu ho wɔ adzesua yi mu?

³ Hɛn so, Jehovah aka dɛ ɔbɛhyɛ hɛn dzen. (1 Pet. 5:10) Naaso, sɛ Jehovah bɛhyɛ hɛn dzen a, gyedɛ hɛn so yɛbɔ hɛnho mbɔdzen. Sɛ yɛbɛyɛ mfatoho a, kaar bi botum etu a, ɔsɛ dɛ obi a ɔreka kaar no yɛ biribi ansaana kaar no etu. Jehovah so ayɛ krado dɛ ɔbɛma hɛn ahoɔdzen a yehia no, naaso ɔsɛ dɛ yɛyɛ ndzɛmba ahorow a ɔbɛma yeenya mboa a ɔtse dɛm efi no hɔ. Ebɛn ndzɛmba na Jehovah dze ama hɛn a ɔhyɛ hɛn dzen? Sɛ yebenya ndzɛmba a ɔtse dɛm do mfaso a, ebɛnadze na ɔsɛ dɛ yɛyɛ? Sɛ yɛhwɛ mbrɛ Jehovah sii hyɛɛ n’asomfo baasa bi dzen  no a, ɔbɛma yeenya dɛm nsɛmbisa yi ho mbuae. Hɔn nye nkɔnhyɛnyi Jonah, Jesus ne maame Mary, nye ɔsomafo Paul. Afei so, yɛbɔhwɛ dza Jehovah kɔ do yɛ dze hyɛ n’asomfo a wɔwɔ hɔ ndɛ no so dzen.

4. Sɛ Jehovah bɛhyɛ hɛn dzen a, ebɛnadze na ɔsɛ dɛ yɛyɛ?

⁴ Kwan kor a yebotum afa do enya ahoɔdzen efi Jehovah hɔ nye dɛ yɛbɔbɔ no mpaa. Sɛ yɛbɔ mpaa a, Jehovah so bɛma hɛn “tum no ne kɛseyɛ a ɔtra do.” (2 Cor. 4:7) Afei so, sɛ yɛkenkan Bible no na yɛdwendwen ho a, ɔbɛhyɛ hɛn dzen. (Ndw. 86:11) Jehovah ne nsɛm a ɔwɔ Bible mu no, “ahoɔdzen wɔ mu.” (Heb. 4:12) Sɛ ebɔ mpaa na ekenkan Bible no a, ɔbɛhyɛ wo dzen ma eegyina ɔhaw ano na akɔ do enya enyigye wɔ w’asetsena mu. Afei so, sɛ dwumadzi a ɔhyɛ wo nsa wɔ Jehovah no som mu no yɛ dzen ma wo a, ɔbɔboa wo ma eetum ayɛ. Ma yɛnhwɛ dza Jehovah yɛe dze hyɛɛ nkɔnhyɛnyi Jonah dzen.

5. Nna ebɛnadze ntsi na nkɔnhyɛnyi Jonah hia nkuranhyɛ?

⁵ Nkɔnhyɛnyi Jonah kɔr tsebea bi mu a nna ohia nkuranhyɛ paa. Jehovah maa no dwumadzi bi a nna ɔyɛ dzen. Dɛm dwumadzi no maa ɔbɔɔ hu ntsi oguanee. Aber a oruguan no, ɔkɔfoow po do hɛn bi, na wɔnam kwan do rokɔ no, ehum kɛse bi tui ma po no do yɛɛ begyabegya. Iyi ntsi nkyɛ ɔno na hɔn a wɔwɔ hɛn no mu no reyɛ ahwer hɔn nkwa. Iyi maa woyii Jonah too po no mu, na nam kɛse bi bɛmeen no. Nna nam ne yamu a ɔakɛhyɛ no yɛ hu, na ɔtse dɛ mbrɛ n’enyidado nyina asa! Ehwɛ a, nna ebɛnadze na ɔrokɔ do wɔ n’adwen mu? Nna n’adwen yɛ no dɛ oewu ewie anaa? Anaadɛ nna n’adwen yɛ no dɛ Jehovah apow no? Ekyingye biara nnyi ho dɛ nna Jonah ayɛ basaa paa.

6. Sɛ yɛhwɛ asɛm a ɔwɔ Jonah 2:​1, 2, 7 no a, ebɛnadze na ɔhyɛɛ Jonah dzen aber a nna ɔhyɛ nam no ne yamu no?

⁶ Aber a Jonah hyɛ nam no ne yamu no, ebɛnadze na ɔyɛe dze hyɛɛ noho dzen? Adze kor a ɔboaa no nye dɛ ɔbɔɔ mpaa. (Kenkan Jonah 2:​1, 2, 7.) Ɔwɔ mu dɛ nna Jonah ayɛ Jehovah no do asoɔdzen dze, naaso onuu noho na ɔbrɛɛ noho adze na onyaa awerɛhyɛmu dɛ Jehovah betsie ne mpaabɔ. Afei so, ɔdwendween Kyerɛwnsɛm no mu nsɛm bi ho. Ebɛnadze ntsi na yebotum aka dɛm? Nsɛm a ɔkae wɔ ne mpaabɔ no mu a wɔayɛ ho kyerɛwtohɔ wɔ Jonah tsir 2 no, ɔnye nsɛm bi a ɔwɔ Ndwom nwoma no mu no hyia. (Dɛ nhwɛdo no, fa Jonah 2:​2, 5 toto Ndwom 69:1; 86:7 ho.) Nsɛm a ɔkae no ma yehu dɛ nna Jonah nyim nsɛm a ɔwɔ dɛm kyerɛwnsɛm no mu yie. Kyerɛwnsɛm no mu nsɛm a ɔdwendween ho no boaa no ma onyaa awerɛhyɛmu dɛ Jehovah bɔboa no. Ekyir yi, Jehovah maa nam no kɛfee Jonah too asaase kesee do. Dɛm aber yi dze, nna ɔayɛ krado dɛ ɔbɛyɛ edwuma a Jehovah dze ahyɛ ne nsa no.—Jonah 2:10–3:4.

7-8. Ebɛnadze na ɔhyɛɛ onua bi a ɔwɔ Taiwan dzen ma otumii gyinaa ne haw ahorow ano?

⁷ Sɛ yerihyia ɔhaw ahorow a, Jonah n’asɛm no botum aboa hɛn ma yeegyina ano. Ɔwodze ma yɛnhwɛ hɛn nua bi a wɔfrɛ no Zhiming b a ofi Taiwan. Yarba bi a no mu yɛ dzen retseetsee no. Afei so, osian ne gyedzi ntsi, n’ebusuafo retan n’enyi ma ɔnnyɛ agor koraa. Naaso adze a ɔboa no ma otum gyina ne haw no ano nye dɛ, ɔbɔ mpaa na osua adze so. Ɔkaa dɛ: “Sɛ ɔyɛ na mihyia ɔhaw a, meyɛ basaa araa ma ɔyɛ dzen ma me mpo dɛ mubosua adze.” Naaso ɔmma iyi mmbu n’abaw mu. Ɔtoaa n’asɛm no do dɛ: “Midzi kan bɔ Jehovah mpaa. Ɔno ekyir no, medze earphone hyehyɛ m’asowa mu tsie asafo ndwom. Ɔtɔfabi a, motow dzi ekyir kesi  dɛ m’ahom bɛka moho. Ɔno ekyir no mutum sua adze.”

⁸ Adze a Zhiming sua no boa no ma otum gyina ɔhaw a ohyia no ano. Dɛ nhwɛdo no, ɔkɛyɛɛ oprehyɛn bi a ɔyɛ hu, na aber a noho rotɔ no no, nɛɛse bi kaa kyerɛɛ no dɛ no bɔgya mu nkwambowa kɔkɔɔ no wɔ famu, ntsi no ho behia dɛ wɔma no bɔgya. Naaso, anafua a adze rebɛkye ma wɔaayɛ no oprehyɛn no, ɔkenkaan akyerɛbaa bi a wɔyɛɛ no dɛm oprehyɛn no bi ho asɛm. Aber a ɔkenkaan akyerɛbaa no n’asɛm no, obohun dɛ nna akyerɛbaa no no bɔgya mu nkwambowa kɔkɔɔ no wɔ famu koraa kyɛn nedze no. Naaso ɔanngye bɔgya, na noho tɔɔ no. Akyerɛbaa no n’asɛm no hyɛɛ Zhiming ne gyedzi dzen ma ɔkɔr do dzii Jehovah nokwar.

9. Sɛ ɔhaw a irihyia no ama w’abaw mu ebu mpo a, ebɛnadze na ibotum ayɛ? (Hwɛ mfonyin ahorow no so.)

⁹ Sɛ irihyia ɔhaw a, ɔyɛ a eyɛ basaa araa ma ɔyɛ dzen ma wo mpo dɛ ebɔbɔ mpaa? Anaa w’abaw mu bu araa ma ɔyɛ dzen ma wo dɛ ibosua adze? Kaa dɛ Jehovah tse wo ase paa. Ntsi sɛ ebɔ mpaa tsiabaa mpo a, ibotum enya awerɛhyɛmu dɛ Jehovah dze dza ihia no bɛma wo. (Eph. 3:20) Sɛ yaw a erefa mu anaa awerɛhow a iridzi ntsi ɔyɛ dzen ma wo dɛ ibosua adze a, ɔnodze ibotum etsie Bible akenkan anaa asafo nwoma a wɔbɔ tsie no bi. Afei so, sɛ itsie asafo ndwom anaa ehwɛ video ahorow a ɔwɔ jw.org do no a, ɔbɔboa wo paa. Jehovah pɛ dɛ ɔhyɛ wo dzen, naaso sɛ ɔbɛyɛ dɛm a, gyedɛ ebɔ no mpaa na isua Bible no. Sɛ ebɔ Jehovah mpaa na ekenkan Bible no nye asafo nwoma dze hwehwɛ wo mpaabɔ no ho mbuae a, ɔkyerɛ dɛ epɛ dɛ ɔhyɛ wo dzen.

10. Ebɛnadze na hɛn nuanom Christianfo yɛ dze hyɛ hɛn dzen?

¹⁰ Jehovah botum ama hɛn nuanom Christianfo ahyɛ hɛn dzen. Wobotum ‘akyekye hɛn werɛ pii’ aber a yerihyia ɔhaw bi anaa ɔyɛ dzen ma hɛn dɛ yɛbɛyɛ dwumadzi bi a wɔdze ama hɛn no. (Col. 4:​10, 11) Ber a yehia hɛn nuanom hɔn mboa paa nye ber a yɛakɔ ‘ahokyer mu.’ (Mbɛ. 17:17) Sɛ yɛyɛ mberɛw a, hɛn nuanom Christianfo botum dze dza yehia no ama hɛn, wɔakyekye hɛn werɛ na wɔahyɛ hɛn nkuran ma yaakɔ do edzi Jehovah nokwar. Ɔwodze ma yɛnhwɛ dza nyimpa binom yɛe dze hyɛɛ Jesus ne maame Mary dzen.

11. Nna ebɛnadze ntsi na Mary hia dzenhyɛ?

 ¹¹ Nna no ho hia paa dɛ wɔhyɛ Mary dzen. Ɔwodze dwen ho hwɛ. Aber a ɔbɔfo Gabriel kaa kyerɛɛ Mary dɛ ɔbɔwo Nyankopɔn ne Ba no, ehwɛ a ɔtsee nka dɛn? Ɔbɛyɛ dɛ asɛm no tɔɔ no do paa. Siantsir nye dɛ nna obenyinsen aber a ɔnnwaree. Afei so, nna onnyi nyimdzee biara wɔ mbatsetse ho osiandɛ nna ɔnnwoo da. Naaso nna ɔsɛ dɛ ɔtsetse abofra a ɔbɛba abɛyɛ Messiah no. Nna Mary nye banyin biara nndaa da, ntsi nna obesi dɛn akyerɛkyerɛ iyi nyina mu akyerɛ Joseph?—Luke 1:​26-33.

12. Dɛ mbrɛ Luke 1:​39-45 ma yehu no, ebɛn kwan do na Mary nyaa mboa a nna ohia no?

¹² Ebɛnadze na ɔboaa Mary ma onyaa akokodur dze dzii dwuma soronko a Jehovah dze hyɛɛ ne nsa no? Dza ɔboaa no nye dɛ, ɔhwehwɛɛ mboa fii afofor hɔ. Bi nye dɛ, obisaa ɔbɔfo Gabriel dza ɔsɛ dɛ ɔyɛ ama oeetum edzi asodzi a ɔtse dɛm no ho dwuma. (Luke 1:34) Ɔno ekyir no, wɔannkyɛr koraa na otuu kwan kɔr Judah “nkoko nkurow no bi mu” kɛseraa no busuanyi bi a wɔfrɛ no Elizabeth. Dɛm akwantu no boaa no paa. Elizabeth kamfoo Mary, na Jehovah nam no do kaa nkɔnhyɛsɛm bi a ɔhyɛ nkuran faa abofra a Mary nyinsen no no ho. (Kenkan Luke 1:​39-45.) Mary kaa dɛ Jehovah dze “ne basa akyerɛ ahoɔdzen.” (Luke 1:​46-51) Jehovah nam Gabriel na Elizabeth do hyɛɛ Mary dzen.

13. Aber a akyerɛbaa bi a ɔwɔ Bolivia no hwehwɛɛ enuanom hɔ mboa no, ebɛnadze na wɔyɛe dze boaa no?

¹³ Woara so, wo nuanom botum ahyɛ wo dzen tse dɛ Mary. Dɛ nhwɛdo no, nna akyerɛbaa bi a wɔfrɛ no Dasuri a ɔwɔ Bolivia no hia mboa a ɔtse dɛm. Aber a ɔbɛdaa edzi dɛ ne papa enya yarba bi a ɔyɛ hu na wɔgyee no too ayarsabea no, ɔgyee too mu dɛ ɔbɔhwɛ no. (1 Tim. 5:4) Naaso ɔtɔ da a nna ɔyɛ dzen ma no. Ɔkaa dɛ: “Mpɛn pii no, nna metse nka dɛ murunntum nnhwɛ no bio.” Ana ɔhwehwɛɛ mboa fii enuanom hɔ? Ahyɛse no dze, ɔannyɛ dɛm. Ɔdze kaa ho dɛ: “Nna memmpɛ dɛ mebɛhaw enuanom no. Nna ɔyɛ me dɛ ‘Jehovah na ɔdze mboa a mihia no bɛma me.’ Naaso mubohun dɛ, sɛ mamma enuanom ammboa me a, ɔtse dɛ mbrɛ mepɛ dɛ mekyerɛ dɛ mankotsee mubotum edzi me haw no ho dwuma.” (Mbɛ. 18:1) Ntsi Dasuri kyerɛɛw krataa kɛmaa enuanom binom na ɔkyerɛkyerɛɛ ne tsebea no mu kyerɛɛ hɔn. Ɔsanee kaa dɛ: “Mbrɛ enuanom no sii boaa me no dze, munnhu dza mennka mpo. Wɔdze edziban brɛɛ hɛn wɔ ayarsabea hɔ na wɔnye me kenkaan kyerɛwnsɛm ahorow bi dze hyɛɛ me nkuran. Iyi maa m’akoma tɔɔ me yamu, osiandɛ muhun dɛ yɛnnyɛ ankonam. Mbom yɛka Jehovah n’ebusua kɛse no ho. Enuanom a wɔwɔ dɛm ebusua yi mu so, wɔayɛ krado dɛ wɔbɔboa hɛn, wɔbɛkyekye hɛn werɛ na wɔahyɛ hɛn nkuran ma yeetum akɔ do asom Jehovah.”

14. Ebɛnadze ntsi na ɔsɛ dɛ yɛgye mboa fi asafo mu mpanyimfo hɔ?

¹⁴ Kwan kor so nye dɛ Jehovah nam asafo mu mpanyimfo do hyɛ hɛn dzen. Wɔyɛ akyɛdze a Jehovah dze ama hɛn, na ɔnam hɔn do hyɛ hɛn dzen na wɔma hɛnho tɔ hɛn. (Isa. 32:​1, 2) Ntsi sɛ biribi rehaw hɛn a, ɔsɛ dɛ yɛka ho asɛm kyerɛ hɔn. Na sɛ wɔdze mboa ma hɛn a, mma yɛmmpopo hɛn tsir koraa. Jehovah botum afa hɔn do ahyɛ hɛn dzen.

15. Ebɛn enyidado na ɔda Christianfo nyina hɔn akoma do?

¹⁵ Hɛn enyidado a ogyina Bible do no botum ahyɛ hɛn dzen ma yaakɔ do asom Jehovah. (Rom. 4:​3, 18-20) Dɛ Christianfo no, yɛrohwɛ kwan dɛ yɛbɛtsena ase daa. Binom rohwɛ kwan dɛ wɔbɛtsena ase daa wɔ Paradise asaase do na binom so wɔ enyidado dɛ wɔbɔkɔ sor.  Enyidado a yɛwɔ no boa hɛn ma yetum gyina ɔhaw biara a yehyia no ano, yetum kɔ do ka asɛmpa no na yedzi dwuma biara a ɔhyɛ hɛn nsa wɔ Jehovah no som mu no. (1 Thess. 1:3) Dɛm enyidado kor yi ara na ɔhyɛɛ ɔsomafo Paul so dzen.

16. Nna ebɛnadze ntsi na ɔsomafo Paul hia dzenhyɛ?

¹⁶ Nna Paul hia dzenhyɛ. Krataa a ɔkyerɛwee kɛmaa Corinthfo no mu no, ɔdze noho totoo dɛtse awendze a ɔyɛ mberɛw ho. Womiaa no dzendzenndzen, ‘noho kyeer no,’ wɔtaan n’enyi na wɔmaa no do hwee famu. Ɔtɔ da mpo a, nna no nkwa abɛda esian mu. (2 Cor. 4:​8-10) Paul kyerɛɛw dɛm asɛm yi wɔ n’asɛmpatserɛw akwantu a otsia ebiasa no mu. Ɔrekyerɛw dɛm asɛm yi no, nna onnyim dɛ afei mpo na oribehyia ɔhaw akɛse. Wɔboor no, wɔkyeer no, onyaa akwanhyia wɔ po do ma hɛn a wɔtse mu no butuwii, na wɔdze no too efiadze.

17. Dɛ mbrɛ 2 Corinthfo 4:​16-18 ma yehu no, ebɛnadze na ɔboaa Paul ma otumii gyinaa ɔhaw a ohyiae no ano?

¹⁷ Aber a Paul dwendween enyidado a ɔwɔ no ho no, ɔhyɛɛ no dzen ma ogyinaa ɔhaw a ohyiae no ano. (Kenkan 2 Corinthfo 4:​16-18.) Ɔkaa kyerɛɛ Corinthfo no dɛ sɛ ne nyimpadua a enyiwa hu no “roporɔw mpo a,” ɔremma ɔno mmbu n’abaw mu. Paul dze n’adwen sii nhyira a nna obenya no do. Enyidado a nna ɔwɔ dɛ ɔbɛtsena ase daa wɔ sor no yɛ dza “ɔso bor do koraa” kyɛn ɔhaw biara a nna oehyia no. Paul dwendween dɛm enyidado yi ho, na iyi maa nna ɔtse nka dɛ ne nyimpadua no yɛ “fofor daa daa.”

18. Ebɛn kwan do na owusoɛr ho enyidado no hyɛɛ Tihomir na n’ebusua dzen?

¹⁸ Tihomir yɛ hɛn nua bi a ɔwɔ Bulgaria. Ɔno so dwendwen enyidado a ɔwɔ no ho na iyi hyɛ no dzen. Mfe kakraabi a abɛsen kɔ no, no nua kakraba bi a wɔfrɛ no Zdravko nyaa akwanhyia ma owui. Ɔbaa dɛm no, awerɛhow hyɛɛ Tihomir no do araa ma nna ɔyɛ noho hwee a ɔnnyɛ yie. Dza ɔboaa no ma otumii gyinaa ano nye dɛ, ɔnye n’ebusua dwendween mbrɛ owusoɛr no bɛyɛ no ho. Ɔkaa dɛ: “Ɔyɛ a, nna yɛdwendwen beebi a sɛ wonyan Zdravko a yebehyia no, edziban kor a yɛbɛyɛ ama no, nye hɔn a yɛbɔto nsa afrɛ hɔn aba aponto a odzi kan a yɛbɛyɛ ama no  no ase ho. Afei so nna yɛdwendwen nkɔmbɔ a yɛnye no bedzi afa dza osii wɔ ewiei mber mu no ho.” Tihomir kaa dɛ hɔn adwen a wɔdze sii enyidado a wɔwɔ no do no hyɛɛ hɔn ebusua no dzen ma wotumii gyinaa tsebea no ano. Afei so, aboa hɔn ma woenya abotar rotweɔn ber a Jehovah benyan no nua no.

19. Ebɛnadze na ibotum ayɛ dze ahyɛ enyidado a ewɔ no mu dzen? (Hwɛ mfonyin no so.)

¹⁹ Enyidado a ewɔ no, ebɛnadze na ibotum ayɛ dze ahyɛ mu dzen? Dɛ nhwɛdo no, sɛ ewɔ enyidado dɛ ebɛtsena ase daa wɔ asaase do a, ɔyɛ a kenkan mbrɛ Bible no si ka Paradise ho asɛm na dwendwen ho. (Isa. 25:8; 32:​16-18) Ɔyɛ a, twa mbrɛ asetsena bɛyɛ wɔ wiadze fofor no mu ho mfonyin wɔ w’adwen mu. Fa no dɛ ewɔ hɔ. Woananom na ihu hɔn? Ebɛn ndze na etse? Etse nka dɛn? Dza ɔbɔboa wo ma eetum etwa mbrɛ Paradise asetsena bɛyɛ ho mfonyin wɔ w’adwen mu no, ɔyɛ a hwɛ Paradise ho mfonyin ahorow a ɔwɔ hɛn nwoma ahorow mu no. Anaadɛ ibotum ahwɛ ndwom ho video ahorow bi tse dɛ Wiadze Fofor No Mu, Wɔaba Mu Ewie, nye Fa W’enyi Bu. Sɛ yɛtaa gye mber dwendwen wiadze fofor a Nyankopɔn dze ahyɛ hɛn bɔ no ho a, ɔbɔboa hɛn ma yeehu ɔhaw a yerihyia no dɛ ɔyɛ “ahohia harhar” anaa ber tsiabaa bi mu dze. (2 Cor. 4:17) Jehovah nam enyidado a ɔdze ama wo no do bɛhyɛ wo dzen ma eegyina ɔhaw a irihyia no ano.

20. Sɛ yɛyɛ mberɛw mpo a, ebɛnadze na obotum ahyɛ hɛn dzen?

²⁰ Sɛ yɛtse nka dɛ yɛayɛ mberɛw mpo a, “yɛnam Nyankopɔn do bɛyɛ mbanyindze.” (Ndw. 108:13) Ndzɛmba a yebehia ama gyedzi a yɛwɔ wɔ Jehovah mu no akɔ do ayɛ dzen no, Jehovah dze ama hɛn dada. Dɛm ntsi sɛ ihia mboa ama eetum ayɛ dwumadzi bi a ɔhyɛ wo nsa, egyina ɔhaw ano, anaa akɔ do enya enyigye wɔ w’asetsena mu a, fi w’akoma mu bɔ Jehovah mpaa na sua adze fa hwehwɛ no hɔ akwankyerɛ. Ma wo nuanom Christianfo mboa wo. Gye mber dwendwen daakye ho enyidado a ewɔ no ho. Sɛ eyɛ dɛm a, Nyankopɔn n’enyimnyam tum no nyina bɛhyɛ wo dzen, ama eetum akɔ do dze abotar nye dɛw egyina ɔhaw ano.—Col. 1:11.