Ndaansa yi, wimu ayɛ hyew akyɛn mber biara a abɛsen kɔ, na iyi ama atoyerɛnkyɛm pii so esisi. Mbrɛ wimu tsebea no ayɛ no ama nyimpa pii rebrɛ. Ɔwodze hwɛ dza amandzɛɛbɔ bi ka fa ho:

•   “Wɔhyɛɛ ase dɛ wɔreyɛ wimu a ɔreyɛ hyew ho kyerɛwtohɔ no, mfe 174 nye yi, naaso wɔ kyerɛwtohɔ a wɔyɛɛ no wɔ June bosoom yi mu no da no edzi dɛ ɔhyew a ɔbae no kyɛn bosoom a abɛsen kɔ biara.”​—National Oceanic and Atmospheric Administration, U.S. Department of Commerce, July 13, 2023.

•   “Italy, Spain, France, Germany, Poland nye Sicily na Sardinia supɔw nyina rihyia ɔhyew a no mu yɛ dzen paa na wɔhwɛ kwan dɛ ɔhyew no ano bɛyɛ dzen ekodu 48°C [118°F]. Iyi botum ayɛ ɔhyew a n’ano yɛ dzen paa a wɔayɛ ho kyerɛwtohɔ wɔ Europe.”​—European Space Agency, July 13, 2023.

•   “Aber a asaase no do reyɛ hyew no, yɛhwɛ kwan dɛ nsu a no mu yɛ dzen bɛtaa atotɔ, na iyi bɛma nsuyirii a otum sɛɛ adze paa esisi.”​—Stefan Uhlenbrook, director of hydrology, water and cryosphere at the World Meteorological Organization, July 17, 2023.

 Sɛ etse amandzɛɛbɔ a ɔfa wimu a ɔreyɛ hyew yi ho asɛm a, ɔyɛ a ɔbɔ wo hu anaa? Ɔwodze ma yɛnhwɛ dza Bible no ka fa dɛm asɛm yi ho.

 Nyew. Bible no kaa ndzɛmba ahorow bi a obesisi wɔ hɛn aber yi do ho asɛm, na wimu a ɔreyɛ hyew nye wimu tsebea a ɔresesa nye ndzɛmba ahorow a ɔtsetse dɛm no so ka ho bi. Dɛ nhwɛdo no, Jesus kaa too hɔ dɛ, yebohu ‘ndzɛmba a ɔyɛ hu’ anaa dɛ mbrɛ nkyerɛasee fofor bi ka no “ndzɛmba a ɔyɛ nwanwa na ɔma akomatu” besisi. (Luke 21:11; Good News Translation) Wimu a ayɛ hyew no ama nyimpa bebree suro dɛ ahwɛ a nyimpa ne ndzeyɛɛ bɛsɛɛ hɛn asaase yi.

 Oho. Nyankopɔn bɔɔ asaase yi dɛ ɔnyɛ hɛn fie na yɛntsena do daa; ntsi ɔremma kwan ma nyimpa biara nsɛɛ no. (Ndwom 115:16; Ɔsɛnkafo 1:4) Nokwasɛm nye dɛ, ɔama yehu dɛ ‘ɔbɛsɛɛ hɔn a wɔsɛɛ asaase no.’​—Nyikyerɛ 11:18.

 Bible no ma yehu dɛ atoyerɛnkyɛm a ndɛ orisisi nyina, Nyankopɔn botum eyi efi hɔ na ɔbɛyɛ so.

•   ‘Nyankopɔn ma ehum taa dzinn, Na asorɛkye no yɛ komm.’ (Ndwom 107:29) Ehum, asorɛkye nye ndzɛmba ahorow a ɔtsetse dɛm nyina no, Nyankopɔn wɔ do tum. Wimu tsebea a ɔresɛɛ a ɔakɛfa atoyerɛnkyɛm ahorow aba no, Nyankopɔn besiesie ne nyina ama hɛn.

•   ‘Ɔwo na ema asaase nya dza ohia, Ema no do adze dɔɔ so na ɔyɛ prɔmprɔm.’ (Ndwom 65:9) Nyankopɔn behyira hɛn asaase yi ma ɔadan paradise.

 Sɛ epɛ dɛ ihu pii fa dza Bible no aka afa mbrɛ Nyankopɔn besi esiesie asaase yi ho a, hwɛ asɛm a wɔato dzin “Who Will Save the Earth?”