Ekyingye biara nnyi ho dɛ, Bible mfitsiase nkyerɛkyerɛ a esũa no ahyɛ ɔdɔ a ewɔ ma Jehovah no mu dzen. Sɛ ekɔ do sũa Bible no a, wo dɔ no bɛyɛ kɛse. (1 Peter 2:2) Onnyiewiei nkwa ho enyidado a ewɔ no gyina Nyankopɔn a ibepinkyɛn no dze nam n’Asɛm a ebɔkɔ do esũa no do.​—Kenkan John 17:3; Jude 21.

Ber a ekɔ do nya Nyankopɔn ho nyimdzee no, wo gyedzi bɛyɛ kɛse paa. Gyedzi bɔboa wo ma aayɛ dza ɔsɔ Nyankopɔn enyi. (Hebrewfo 11:1, 6) Gyedzi bɛkã wo ma eenya nnuho na aayɛ nsesã a mfaso wɔ do wɔ w’asetsena mu.​—Kenkan Ndwuma 3:19.

Ma tsebea no tse biara no, ewɔ ɔpɛ dɛ ebɛkã dza esũa no ho asɛm akyerɛ nkorɔfo osiandɛ, hɛn nyina enyi gye ho dɛ yɛbɛkã asɛmpa akyerɛ nkorɔfo. Ber a ekɔ do sũa Bible no, ibohu mbrɛ edze Bible no bɛkyerɛkyerɛ gyedzi a ewɔ wɔ Jehovah nye asɛmpa no mu akyerɛ nkorɔfo.​—Kenkan Romefo 10:13-15.

Nyimpa pii hyɛ ase kã asɛmpa no kyerɛ hɔn anyɛnkofo anaa hɔn ebusuafo. Sɛ ibotum ayɛ dɛm a, ɔsɛ dɛ ema w’enyi da hɔ. Dɛ nkyɛ ebɛkã akyerɛ nkorɔfo dɛ ɔsom a wɔwɔ mu no muo no, kã Nyankopɔn n’anohoba ho nsɛm kyerɛ hɔn mbom. Afei so, ma ɔntsena w’adwen mu dɛ, mpɛn pii no suban papa a ewɔ no nya nkorɔfo do tum sen asɛm a edze w’ano kã.​—Kenkan 2 Timothy 2:24, 25.

Nyankopɔn n’Asɛm a ebɔkɔ do esũa no bɔboa wo ma enye Nyankopɔn ntamu anyɛnkofa no mu aayɛ dzen. Ewiei koraa no, enye Jehovah benya ebusuabɔ soronko. Ibotum abɛyɛ nedze na abɛkã n’ebusua no ho.​—Kenkan 2 Corinthfo 6:18.

Sɛ ekɔ do sũa Nyankopɔn n’Asɛm a, ibotu mpon wɔ no som mu. (Hebrewfo 5:13, 14) Ma Jehovah Adasefo no mu kor nye wo mbosũa Bible no dze nam Ebɛnadze na Bible no Kyerɛkyerɛ Hɛn? nwoma no do. Sɛ ekɔ do sũa Nyankopɔn n’Asɛm a, w’asetsena bowie wo yie.​—Kenkan Ndwom 1:1-3; 73:27, 28.

Asɛmpa no fi Jehovah, Nyankopɔn siarfo no nkyɛn. Sɛ ipinkyɛn no nkorɔfo a, ibotum epinkyɛn no. (Hebrewfo 10:24, 25) Sɛ epɛ dɛ isuo nkwa a ɔyɛ nokwar nkwa no mu a, ɔsɛ dɛ ekɔ do bɔ mbɔdzen dɛ ebɛyɛ dza ɔsɔ Jehovah n’enyi. Nokwasɛm nye dɛ, Nyankopɔn a ibepinkyɛn no no yɛ adze a oye sen biara a ibotum ayɛ.​—Kenkan 1 Timothy 1:11; 6:19.