ADZESUA 60
Kɔ Do Ara Hyɛ Enye Jehovah Ntamu Ebusuabɔ No Mu Dzen
Dze besi ha yi dze, esua Jehovah ho adze pii. Dɛm ndzɛmba yi nyina ama abɔdɔ Jehovah kɛse paa, na bi mpo a ehyira woho do ama no ma woenuma wo. Sɛ innyae nntuu dɛm anamɔn no mpo a, bi a edze esi w’enyi do dɛ ɔrennkyɛr biara, ebɛyɛ dɛm. Naaso sɛ wonuma wo a, nna innwiei; pii wɔ hɔ a ɔsɛ dɛ eyɛ na ama enye Jehovah ntamu aakɔ do ayɛ kamakama daa. Ebɛyɛ no dɛn?
1. Ebɛnadze ntsi na ɔsɛ dɛ ekɔ do ara hyɛ enye Jehovah ntamu ebusuabɔ no mu dzen?
Ɔsɛ dɛ yɛbɔ mbɔdzen paa ama yɛnye Jehovah ntamu ebusuabɔ no mu aayɛ dzen da biara. Ebɛnadze ntsi a? Bible no ma yehu dɛ iyi ho hia “amma yaammfom emmfi” Jehovah ho. (Hebrewfo 2:1, Baebor) Ebɛnadze na obotum aboa hɛn ma yɛdze nokwardzi aasom Jehovah da biara? Ndzɛmba a obotum aboa hɛn no mu bi nye dɛ yɛbɛyer hɛnho ayɛ pii wɔ asɛnka edwuma no mu. Afei so yebotum afa akwan ahorow bi do ayɛ pii wɔ Jehovah no som mu. (Kenkan Philippifo 3:16.) Jehovah a ebɔsom no no nye adze a mfaso wɔ do kyɛn biribiara!—Ndwom 84:10.
2. Ebɛnadze bio na ɔsɛ dɛ ekɔ do yɛ?
Ɔwɔ mu, ɔrennkyɛr biara na eesua buukuu yi ewie dze, naaso suban afofor pii wɔ hɔ a ɔsɛ dɛ eda no edzi dɛ Christiannyi. Iyi ntsi, Bible no tu hɛn fo dɛ ɔsɛ dɛ “yɛhyɛ suban fofor” no. (Ephesusfo 4:23, 24, NWT) Aber a ekɔ do sua Nyankopɔn n’Asɛm na ekɔ asafo nhyiamu no, ibohu Jehovah no suban ahorow ho adze pii. Sɛ ihu mbrɛ Jehovah tse a, bɔ mbɔdzen ara suasua no wɔ w’abrabɔ mu. Nsakyer biara a ohia dɛ eyɛ no, bɔ mbɔdzen ara yɛ ama Jehovah n’enyi aagye.
3. Jehovah besi dɛn aboa wo ma eenya nkɔdo?
Bible no ka dɛ: “Nyankopɔn . . . nankasa bɛma hom edzi mu, egyina pintsinn, ɔbɛhyɛ hom dzen, na obesi hom pi.” (1 Peter 5:10, Baebor) Ndzɛmba bɔn botum asɔ hɛn nyina ahwɛ. Naaso dza yehia na ama yeetum egyina hɛn nan do pintsinn no, Jehovah dze ma hɛn. (Ndwom 139:23, 24) Ɔabɔ anohoba dɛ ɔbɛma wo ɔpɛ na ahoɔdzen a edze bɔsom no, na eedzi no nokwar.—Kenkan Philippifo 2:13.
PƐNSAPƐNSA MU KƆ EKYIR
Ma yɛnhwɛ ndzɛmba a ibotum ayɛ ama aakɔ do ara ahyɛ enye Jehovah ntamu ebusuabɔ no mu dzen nye mbrɛ Jehovah behyira wo.
4. Enye wo Nyɛnko Jehovah nkɔ do ara mbɔ nkɔmbɔ
Mpaabɔ na Bible adzesua ama abɛyɛ Jehovah ne nyɛnko. Ebɛn kwan do na dɛm ndzɛmba kor yi ara so botum aboa wo ma aabɛn no kɛse paa?
Ma yɛnkenkan Ndwom 62:8, na yensusu asɛmbisa yi ho:
-
Sɛ erobɔ mpaa a, ɔsɛ dɛ ebɔ no dɛn na ama enye Jehovah ntamu anyɛnkofa no mu aayɛ dzen?
Ma yɛnkenkan Ndwom 1:2, na yensusu asɛmbisa yi ho:
-
Sɛ erekenkan Bible no a, ebɛyɛ no dɛn na ama enye Jehovah ntamu anyɛnkofa no mu aayɛ dzen?
Sɛ wankotsee rusua adze a, ebɛnadze na ibotum ayɛ ama eenya adzesua no do mfaso kɛse? Ma yɛnhwɛ VIDEO yi, na ibohu ndzɛmba bi a ibotum ayɛ. Yewie a, yebosusu nsɛmbisa a odzidzi do no ho.
-
Nsɛm a ɔwɔ video no mu hendze na ibotum dze ayɛ edwuma?
-
Ebɛn ndzɛmba na epɛ dɛ isua ho adze?
5. Fa ndzɛmba a ɔbɛma ayɛ pii wɔ Jehovah no som mu sisi w’enyiwa do
Sɛ edze ndzɛmba a ɔbɛma ayɛ pii wɔ Jehovah no som mu sisi w’enyiwa do a, ɔbɛma enya nkɔdo. Ma yɛnhwɛ VIDEO yi, na yensusu asɛmbisa a odzi do no ho.
-
Wɔ video no mu no, ebɛn kwan do na dza Cameron dze sisii n’enyi do wɔ Jehovah no som mu no boaa no?
Nnyɛ hɛn nyina na yebotum etu akɛtsena ɔman fofor do akɛka asɛmpa no. Naaso hɛn nyina botum dze ndzɛmba bi esisi hɛn enyi do wɔ Jehovah no som mu. Ma yɛnkenkan Mbɛbusɛm 21:5, na hwɛ ndzɛmba ahorow a ibotum dze esisi w’enyi do wɔ . . .
-
asafo no mu.
-
asɛnka mu.
Ebɛn kwan do na afotusɛm a ɔwɔ kyerɛwsɛm yi mu no botum aboa wo ma eedu dza edze esi w’enyi do no ho?
Ndzɛmba bi a ibotum dze esisi w’enyi do
-
Ibotum ama wo mpaabɔ eetu mpon.
-
Kenkan Bible mu no nyina.
-
Bɔ mbɔdzen hu obiara a ɔwɔ w’asafo no mu.
-
Enye obi nhyɛ Bible adzesua ase.
-
Ibotum ayɛ akwampaae boafo anaa daa kwampaaefo.
-
Sɛ eyɛ banyin a, yer woho bɛyɛ asafo mu somfo.
6. Ibotum enya enyigye daa!
Ma yɛnkenkan Ndwom 37:29, na yensusu asɛmbisa yi ho:
-
Ebɛnadze na ibotum ayɛ ama eenya enyigye ndɛ dze ekesi daa?
DZA ESUA
Kɔ do ara hyɛ enye Jehovah ntamu ebusuabɔ no mu dzen na fa botae ahorow a ɔbɛma ayɛ pii wɔ Jehovah no som mu no sisi w’enyi do. Sɛ eyɛ dɛm a, ibotum enya enyigye daa!
Mbobɔdo
-
Ebɛnadze ntsi na ibotum enya awerɛhyɛmu dɛ Jehovah bɔboa wo ma aasom no nokwar mu?
-
Ebɛn ndzɛmba na eyɛ a ɔbɛma enye Jehovah ntamu anyɛnkofa no mu ayɛ dzen?
-
Sɛ edze ndzɛmba a ɔbɛma ayɛ pii wɔ Jehovah no som mu sisi w’enyi do a, obesi dɛn aboa wo ma aabɛn Jehovah kɛse?
HWEHWƐ PII KA HO
Ndzɛmba ebien yi mu hendze na Jehovah n’enyiwa sɔ—dɛ ebɛyɛ adze kɛse kor bi dze akyerɛ dɛ edɔ no, iwie a, nna aatow w’adwen mu, anaa ebɔkɔ do edzi no nokwar?
Sɛ obi yɛ Jehovah no somfo nokwafo mpo a, biribi botum asɛɛ n’enyigye. Sɛ biribi dɛm to wo a, hwɛ adze a ibotum ayɛ ama w’enyi aasan agye.
Sua Adze Na Dwendwen Ndzɛmba A Isua No Ho Ama W’enyi Aasan Agye (5:25)
Ibesi dɛn dze botae ahorow esisi w’enyi do wɔ Jehovah no som mu na eedu ho?
“Fa Nyankopɔn Som Mu Botae Ahorow Hyɛ Jehovah Enyimnyam” (Ɔweɔn-Aban, July 15, 2004)
Ebɛnadze ntsi na ɔsɛ dɛ Christiannyi biara ma noho kokwaa, na ibesi dɛn ayɛ dɛm?
“Hom Nyer Homho Ama Homho Akokwaa—Jehovah Ne Da Kɛse No Abɛn” (Ɔweɔn-Aban, May 15, 2009)
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
