ESUADZE 7
Ebɛnadze na Yɛyɛ wɔ Hɛn Nhyiamu Ahorow Ase?
New Zealand
Japan
Uganda
Lithuania
Wɔ Christianfo a nna wodzi kan no hɔn nhyiamu ahorow ase no, dza nna wɔyɛ tsitsir nye ndwontow, mpaabɔ nye Kyerɛwnsɛm no a wɔkenkan na wosusũ ho. (1 Corinthfo 14:26) Ibotum ehu biribi a ɔtse dɛmara wɔ hɛn nhyiamu ahorow no ase.
Yenya nkyerɛkyerɛ a ogyina Bible do na mfaso wɔ do. Wɔ dapɛn n’ewiei biara no, asafo biara hyia mu na wɔdze minitsi 30 tsie Bible mu ɔkasa a ɔfa mbrɛ Kyerɛwnsɛm no fa hɛn asetsena nye mber a yɛtse mu yi ho. Wɔhyɛ hɛn nyina nkuran ma yɛhwɛ hɛn Bible no mu dzi ɔkasafo no ekyir. Wɔ ɔkasa yi ekyir no, yɛdze dɔnhwer kor yɛ “Watchtower” Adzesũa. Aber a worususũ asɛntsir bi ho wɔ The Watchtower no mu no, wɔma hɔn a woehyia mu no nyinara kwan ma wɔdze hɔnho hyɛ mu bi. Adzesũa yi boa hɛn ma yɛdze Bible akwankyerɛ yɛ edwuma wɔ hɛn asetsena mu. Hɛn asafo ahorow bɔbor 115,000 a wɔwɔ wiadze nyina no mu biara sũa dɛm asɛm kor yi ara.
Yenya ntsetsee a ɔma yetu mpon wɔ hɛn nkyerɛkyerɛ mu. Yɛsan so hyia mu wɔ dapɛn no mu yɛ nhyiamu a ɔwɔ afã ahorow ebiasa a wɔato dzin Hɛn Asɛnka Nye Christianfo Asetsena. Ogyina nwoma a ɔba bosoom biara a wɔato dzin Asɛnka Nye Asetsena Nhyiamu Dwumadzi Nwoma no mu nsɛm do. Nhyiamu yi ne fã a odzi kan a ɔnye Akoradze A Ofi Nyankopɔn N’asɛm Mu no, boa hɛn ma yɛtse Bible ne fã bi a asafo no mufo edzi kan akenkan wɔ fie no ase. Dza odzi do no nye Tu Mpon Wɔ Asɛnka Edwuma No Mu. Iyi yɛ ɔyɛkyerɛ ahorow a ɔma yehu mbrɛ yebesi nye afofor esusũ Bible no ho wɔ hɛn asɛnka edwuma no mu. Ɔfotunyi bi kã biribi fa hɛn dwumadzi ahorow no ho ma aaboa hɛn ma yeetu mpon wɔ akenkan nye ɔkasa mu. (1 Timothy 4:13) Dza odzi ewiei koraa nye Christianfo Asetsena. Yesusũ mbrɛ yebotum enya Bible mu ngyinadonsɛm do mfaso wɔ hɛn dabiara da asetsena mu no ho. Ɔyɛ asɛmbisa na mbuae a ɔboa hɛn ma yenya Bible no mu ntseasee a no mu dɔ.
Sɛ eba hɛn nhyiamu ahorow no bi a, ekyingye biara nnyi ho dɛ Bible nkyerɛkyerɛ papa a ibenya no wɔ hɔ no bɛyɛ wo nwanwa.—Isaiah 54:13.
-
Ebɛnadze na ibotum ahwɛ kwan dɛ ebɛtse wɔ Jehovah Adasefo nhyiamu ahorow ase?
-
Hɛn dapɛn dapɛn nhyiamu no mu dza ɔwɔ hen na ebɛpɛ dɛ eba bi?
Bi A W'enyi Bɛgye Iyi So Ho
NHYIAMU
Ebɛnadze Na Ɔkɔ Do Wɔ Hɛn Ahendzi Asa Do?
Woara ankasa bɔ mbɔdzen bra na bɔhwɛ dza ɔkɔ do wɔ hɔ.
NSƐM A WƆTAA BISA
Ɔkwan Bɛn Do Na Wɔahyehyɛ Jehovah Adasefo Asafo Ahorow No?
Hwɛ mbrɛ yɛnam nhyehyɛɛ yi do nya akwankyerɛ ahorow.
