ESUADZE 23

Wɔyɛ Dɛn Kyerɛw Hɛn Nwoma Ahorow No na Wɔkyerɛ Ase?

BƆ

Akyerɛw Dwumadzibea, U.S.A.

South Korea

Armenia

Burundi

Sri Lanka

Mbrɛ ɔbɛyɛ na yeetum akã “asɛmpa” no akyerɛ “aman nye mbusuakuw nye kasa nye nkorɔfo” no, yɛyɛ Bible ho nwoma ahorow wɔ kasa bɔbor 750 mu. (Nyikyerɛ 14:6) Yɛyɛ dɛn yɛ edwuma kɛse a ɔtse dɛm yi? Yɛnam akyerɛwfo a wɔwɔ nsaase ahorow do na ɔsorsor ɔman a wofifi mu, nye kasa asekyerɛfo kuw bi a woetu hɔnho akyɛ a hɔn nyinara yɛ Jehovah Adasefo no mboa do na yɛyɛ iyi.

Wodzi kan kyerɛw no wɔ Borɔfo kasa mu. Akwankyerɛ Kuw no na ɔhwɛ Akyerɛw Dwumadzibea a ɔwɔ hɛn wiadze nyina edwumayɛbea tsir no dwumadzi do. Dɛm dwumadzibea yi na ɔhwɛ akyerɛwfo a wɔsom wɔ hɛn edwumayɛbea tsir nye hɛn edwumayɛbea nkorbata ahorow bi no hɔn dwumadzi ahorow do. Osiandɛ hɛn akyerɛwfo no fi aman ahorow do ntsi ɔma yenya nsɛm a ɔfa nyimpa a ɔsorsor hɔn amambra ho, na iyi ma nyimpa dodowara enyi gye hɛn nwoma ahorow no ho.

Wɔdze dza wɔakyerɛw no mona kasa asekyerɛfo. Wɔhwɛ nsɛm a wɔakyerɛw no mu, wɔtsentsen no na wɔpen do. Afei, wɔdze fa kɔmpiwta do kɛma kasa asekyerɛfo ekuw a wɔwɔ wiadze nyina ma wɔhwɛ kyerɛ ase, kenkan dza wɔakyerɛ ase no mu, na wɔsan hwɛ dɛ biribiara yɛ pɛpɛɛpɛr anaa. Wɔbɔ mbɔdzen dɛ wɔbɛma nsɛm a wɔbɛpaw no ayɛ “dza wɔakyerɛw no tɔɔtsennyɛ mu, mekyerɛ, nokwar nsɛm” na ama hɔn kasaa mu dze no nye Borɔfo dze no eehyia pɛpɛɛpɛr.—Ɔsɛnkafo 12:10.

Wɔdze kɔmpiwta dzi dwuma ma edwuma no kɔ ntsɛntsɛm. Kɔmpiwta runntum nnsi edwuma a akyerɛwfo nye kasa asekyerɛfo yɛ no ananmu. Naaso, hɔn edwuma no botum akɔ ntsɛntsɛm aber a wɔdze kɔmpiwta do dwumadzi ahorow nye nhwehwɛmu nwoma ahorow ridzi dwuma no. Jehovah Adasefo ahyehyɛ kɔmpiwta do dwumadzi bi a wɔfrɛ no Multilanguage Electronic Publishing System (MEPS). Iyi ma wotum kyerɛw nsɛm wɔ kasa ɔhaha pii mu, wɔhyehyɛ nsɛm dze mfonyin kã ho, na ɔyɛ krado dɛ wobetsintsim.

Ebɛnadze ntsi na yekũ hɛnho yɛ dɛm edwuma yi nyinara, mpo dze yɛ nwoma wɔ kasa a nyimpa mpem kakraabi na wɔkã mu no? Osiandɛ ɔyɛ Jehovah n’apɛdze dɛ “wɔgye nyimpa nyina nkwa, na wɔba nokwar no no ho nyimdzee mu.”—1 Timothy 2:3, 4.