Kyerɛwnsɛm A Christianfo Dze Bɔ Bra nwoma yi bɔboa wo ma eehu kyerɛwnsɛm anaa Bible mu nsɛm a obotum aboa wo ma eegyina ɔhaw ahorow a ihyia no ano. Ɔbɛsan so aboa wo ma eenya Bible mu nsɛm a ibotum dze ahyɛ nkorɔfo nkuran na edze aboa hɔn ma woeesisi gyinae a ɔhyɛ Jehovah enyimnyam. Dza ɔsɛ dɛ eyɛ ara nye dɛ ebɔhwehwɛ asɛntsir a epɛ no, na ama nsɛmbisa na Bible mu nsɛm ɔka ho no aboa wo ma atse asɛm no ase yie. (Hwɛ adakaba a wɔato dzin “ Mbrɛ Ibohu Dza Erohwehwɛ Wɔ Nwoma Yi Mu.”) Ibenya afotusɛm, akwankyerɛ, nye awerɛkyekyer efi Nyankopɔn n’Asɛm no mu. Ebɛsan so enya akoradze a ibotum nye nkorɔfo akyɛ. Bi tse dɛ kyerɛwnsɛm a obotum aboa hɔn a hɔn abaw mu ebu, dza ɔbɔboa nkorɔfo ma woeegyina hɔn haw ahorow ano, afotu na nkuranhyɛsɛm pii.

Nnyɛ kyerɛwnsɛm a ɔfa asɛntsir pɔtsee bi ho no nyina na ibenya wɔ nwoma yi mu. Naaso obotum aboa wo paa aber a ereyɛ nhwehwɛmu no. (Mbɛ 2:​1-6) Sɛ epɛ dɛ etse asɛm bi ase yie a, ibotum ahwɛ marginal references na study notes a ɔwɔ New World Translation of the Holy Scriptures no mu no. Ibotum so dze Nwoma A Jehovah Adasefo Dze Yɛ Nhwehwɛmu anaa Watch Tower Publications Index no edzi dwuma. Iyi bɔboa ma aatse kyerɛwsɛm bi ase yie na eehu mbrɛ ibesi dze edzi dwuma so. Ɔyɛ a bɔ mbɔdzen dɛ ebɔhwehwɛ nwoma ahorow a ɔbae nnkyɛree no mu ama eenya ntseasee afofor yeenya a ɔfa kyerɛwsɛm bi ho no.

Hɛn mpaabɔ nye dɛ Kyerɛwnsɛm A Christianfo Dze Bɔ Bra nwoma yi bɔboa wo ma enya nyimdzee, nyansa, na ntseasee a ɔwɔ Kyerɛw Krɔnkrɔn no mu no. Aber a edze nwoma yi ridzi dwuma no, ɔmbra dɛ ibohu paara dɛ “Nyankopɔn asɛm wɔ nkwa, na ahoɔdzen wɔ mu.”—Heb 4:12.