Era vola nodra ivola ni vakavinavinaka o ira na cakacaka ena valenibula e Słupca, mai Poladi. Era vakavinavinakataki ira kina na tacida mai Warsaw nira vakauta vei ira na iVolatabu.

Na valenibula qo e dau qaravi ira e levu era tauvi COVID-19. E qai vinakata e dua na vakailesilesi ni valenibula, eso na ivola mera vakayaloqaqataki kina o ira na cakacaka, kei ira na tauvimate. Sa qai vakasamataka mai na vakailesilesi qo, na wati nona itokani o Helena Krupa. E iVakadinadina i Jiova, qai dau taleitaka vakalevu na iVolatabu. E mani kerei koya me vakauta eso na iVolatabu i valenibula.

E tukuna sara o Sister Helena Krupa na itukutuku qori vei ratou nona qase ni ivavakoso. Ratou vakarautaka sara na veika me kau i valenibula. E ono na iVolatabu na New World Translation of the Holy Scriptures, kei na so na ivola vakaivolatabu. Ratou vola tale ga e dua na ivola, ratou qai vakamacalataka kina na duidui ni New World Translation, mai na so tale na ivakadewa ni iVolatabu. Ratou vakabibitaka ni vakayagataki kina na yaca ni Kalou o Jiova.

E qai vola na komiti ni valenibula e dua na ivola ina ivavakoso me “vakavinavinakataka nodratou veivuke, kei na nodratou sasaga vagumatua na tacida me ratou vukei ira na vakaleqai.” E volai tale ga kina: “Ena gauna dredre qo, e levu era lomaleqataka tu nodra bula, vuvale, itokani kei na cakacaka. Ia oni se vakaraitaka tiko ga nomuni veikauaitaki . . . Na nomuni kauaitaka na neimami sasaga, e solia tale e dua na igu me keimami kua ni soro ena matedewa qo. Me keimami qarava vinaka tale ga na neimami tavi, se mani vacava na kena dredre.”

Na vosa ni vakavinavinaka qori, eda kila kina nida rawa ni veivakacegui qai vakayaloqaqataki ira e levu, ena inuinui e vakarautaka vei keda o Jiova ena iVolatabu.—Roma 15:4.