Ena ika11 ni June, 2022, e sainitaka e rua na lawa na Peresitedi o Vladimir Putin. Oya me tekivu ena ika15 ni Maji 2022, me sa kua tale ni qai vakarurugi o Rusia ena lawa ni Mataveilewai ni Dodonu ni Lewenivanua e Urope (ECHR). Kena ibalebale, na lewa kece e tauca na ECHR ena ika15 ni Maji 2022, sa na sega ni vakabau e Rusia. Qori e okati tale ga kina na lewa e tauca na ECHR ena ika7 ni June. E tukuni kina ni cala na nona vakatabuya o Rusia na nodra cakacaka na tacida, qai vakaroti me tinia na nona veilewaitaki ira tiko. Me sereki ira tale ga na tacida era vesu tiko, qai vakasuka na vale kece e vesuka, se me sauma e $63 na milioni na ilavo ni Merika.

E dau raica na Komiti ni Minisita e lewena na matabose na Council of Europe, me muri na lewa e tauca na ECHR ena vanua era vakarurugi kina. Tekivu mai na 1996, sa lewena tu na matabose qori o Rusia.

Ena ika15 ni Maji 2022, e tukuna o Rusia ni sega ni qai via lewena tale na matabose qori. Ena siga tarava, sa sega ni qai okati o Rusia me lewe ni matabose. Oti qori e tukuni vei Rusia ni a sainitaka e dua na veidinadinati ena gauna a lewena kina na Council of Europe. E tukuni kina ni na vakarurugi tiko ga ena ECHR me yacova na ika16 ni Seviteba 2022.

E saga o Rusia me kua tale ni qai okati ena lewa e tauca na ECHR, mani vakatura e rua na lawa sa cavuti oti mai ena ika7 ni June 2022. A tauca tale ga ena siga qori na ECHR na lewa me tokoni ira kina na tacida e Rusia.

Ena rawa ni vakayagataki na lewa e tauca na ECHR ena mataveilewai era veilewaitaki kina na tacida ena 46 na matanitu era lewena na Council of Europe. Koya e bibi sara, e bokoci tale ga kina na kece e beitaki ira kina na tacida o Rusia. Na lewa e tau qo, e dua na ivakadinadina levu me baleti Jiova e veiyasa i vuravura, e lagiti tale ga kina na yacana!—Same 83:18.