Era ogaoga na iVakadinadina i Jiova e Bulgaria mera vakavulici ira eso tale ena ka dina me baleta na Kalou, kei na nona Vosa na iVolatabu. Tekivu ena 2000, e vica vata na drau na iVakadinadina i Jiova e veiyasa i vuravura era toki mera lai veivuke e Bulgaria. Cava eso na ka dredre era sotava nira toki mera lai vunau ena dua tale na vanua? E yaga vakacava nodra toki? Qo eso na ka era tukuna na toki e Bulgaria.

 O Darren e tiko e Igiladi, e kaya: “Dau neirau isausau me keirau lai veiqaravi ena vanua e vinakati vakalevu kina na veivuke. Oti neirau vakamau kei Dawn, keirau toki i Lodoni me keirau veivuke ena yalava vosa vakaRusia. Sa vakavica neirau tuvanaka me keirau toki e vanua tani, ia e sega ni yaco ena vuku ni so na ituvaki. Keirau nanuma ni na sega ni rawa ni keirau lako. Ia e qai kaya e dua neirau itokani ni rawa ni veisau na ituvaki, e rawa tale ga ni keirau toki.” Rau vaqara sara o Darren kei Dawn na vanua e vinakati vakalevu kina na veivuke, e rawa tale ga ni rau toki kina. Rau mani toki i Bulgaria ena 2011.

 Na nodra ivakaraitaki eso era toki ena so tale na vanua, e uqeti ira eso tale mera cakava tale ga qori. Kena ivakaraitaki, o Giada e tiko e Itali kei watina o Luca. E kaya: “Au dau sotavi ira na tacida gugumatua era veiqaravi e Sauca Amerika, kei Aferika. Au qoroya na nodra mamarau, kei na veika era sotava. Qori e vukei au meu veisautaka noqu isausau vakayalo.”

 Ratou tiko e Czech Republic o Tomasz, Veronika kei na luvedrau o Klara kei Mathias. Ena 2015, ratou toki vakavuvale i Bulgaria. Cava e uqeti ratou me ratou toki? E kaya o Tomasz: “Keitou dau vakasamataka vakabibi na nodra ivakaraitaki eso era toki i vanua tani, wili kina o ira na wekai keitou. Keitou vakasamataka tale ga na veika era sotava. E uqeti keitou dina na marau era vakila, keitou dau veivosakitaka tale ga vakavuvale.” Ratou sa marautaka tiko na vuvale qo na nodratou cakacaka vakavunau ena nodratou yalava vou ena siti o Montana, e Bulgaria.

 A toki tale ga e Bulagaria o Linda e dua na tacida yalewa. E kaya: “Au gade e Ecuador ena vica vata na yabaki sa oti, au qai sotavi ira na toki yani kina mera lai vunau. Au vakasamataka ni rawa tale ga meu lai veiqaravi ena vanua e vinakati kina na veivuke.” E uqeti rau tale ga o Petteri kei Nadja mai Finiladi, na nodra ivakaraitaki eso tale. Rau kaya: “Era tiko ena neirau ivavakoso eso na dautukutuku gugumatua, era toki e vanua tani mera vukei ira vakayalo eso tale. Era dau mamarau nira vakamacalataka na vica vata na yabaki era veiqaravi tu kina. Era kaya ni qori na gauna marautaki duadua.”

 O ira na via veivuke e vanua tani ena vinakati mera tuvatuvanaki vinaka. (Luke 14:28-30) E kaya o Nele mai Belgium: “Gauna au vakasamataka tiko kina na veiqaravi ena dua tale na vanua, au na masulaka, qai vakawilika na kena ulutaga ena noda ivola. Au dau vakasamataka vakavinaka, kei na ka meu cakava me rawa niu toki kina.”

 O Kristian kei Irmina e dua na veiwatini mai Poladi, e sivia ni ciwa na yabaki nodrau sa tiko e Bulgaria. E yaga vakalevu vei rau nodrau lewena na iwasewase lailai vosa vakaBulgaria ni rau se tiko e Poladi. Era dau uqeti rau na lewe ni nodrau iwasewase lailai, ra vukei rau tale ga me rau kila na vosa qori. Rau kaya: “Ni o tu vakarau mo veiqaravi, o Jiova ena vakarautaka na ka kece o gadreva. Ni o kaya vei Jiova, ‘O yau qo! Moni talai au!’ o na cakava na ka o nanuma o na sega ni rawata.”—Aisea 6:8.

 O Reto kei Cornelia, e dua na veiwatini mai Suwitisiladi. Rau vakatulewataka me rau bula rawarawa ga me rawa ni rau toki. Rau kaya: “Ni bera ni keirau toki, keirau lai dua na macawa e Bulgaria me rawa ni keirau kila vinaka na ituvaki ni vanua. E yaga tale ga vei keirau na nodrau ivakasala e dua na veiwatini daukaulotu rau tiko e kea.” Rau muria sara na veiwatini na ivakasala qori. Sa sivia qo e 20 na yabaki nodrau veiqaravi tiko e Bulgaria.

 O ira na via toki e vanua tani e dodonu mera vakamatauni ira ena veisau ni ituvaki, kei na ka dredre era rawa ni sotava. (Cakacaka 16:9, 10; 1 Korinica 9:19-23) E levu e dau dredre vei ira mera vulica e dua na vosa vou. E kaya o Luca, sa cavuti oti mai: “Ena gauna ni soqoni, keirau dau taleitaka me keirau vakamacala ena neirau vosa ga. Dua na gauna sa bau dredre sara ga me keirau vakarautaka na neirau ivakamacala ena vosa vakaBulgaria! Keirau vakai ira tale na gone, ia o ira mada ga e vinaka cake tale na nodra ivakamacala mai vei keirau.”

 E kaya o Ravil e tiko mai Jamani: “E veivakaocai toka nida vulica e dua na vosa vou. Ia au dau vakasamataka tu ga, ‘Kua ni taura vakabibi ke cala na ka o tukuna.’ Na ituvaki dredre au sotava, au raica me vaka ga e tiki ni noqu veiqaravi vei Jiova.”

 E kaya o Linda sa cavuti oti mai: “E dredre meu vulica e dua na vosa vou. E sega ni rawarawa gona noqu vulica na vosa vakaBulgaria, eso na gauna au sa via soro. O na galili ni o sega ni vosa vei ira na lewenivanua, qai sega ni kila na ka era kaya tiko. Me rawa niu kaukaua tiko ga vakayalo, au vulica na ka kece ena vosa vakaSuwiteni. Ia na nodra veivuke na mataveitacini au sa kila na vosa vakaBulgaria.”

 E sega tale ga ni rawarawa nida nanumi ira tale mai na wekada, kei ira na noda itokani. E kaya o Eva e toki kei watina o Yanis i Bulgaria: “Ni se qai tekivu, dua na ka noqu galili. Keirau mani veivosaki vakalevu kei ira na itokani, kei na neirau vuvale. Keirau saga tale ga me so tale neirau itokani vou.”

 E levu tale na veika dredre e dau vakilai. O Robert kei Liana rau a tiko e Suwitisiladi, rau mani toki i Bulgaria. Rau kaya: “E dredre sara ga vei keirau na nodra ivakarau vakavanua kei na nodra vosa e Bulgaria. Keirau sega tale ga ni vakarautaki keirau tu ena draki batabata.” Ia ni donu tiko ga na nodrau rai, rau qai mamarau, e rawa kina ni rau veiqaravi e Bulgaria ena 14 na yabaki sa oti.

 E uqeti keda o Lilly meda veiqaravi ena vanua e vinakati vakalevu kina na veivuke. E kaya: “Keu sega ni toki, au na sega ni vakila na nona veivuke o Jiova vei au. Noqu vukei ira eso tale e rawa kina niu volekati Jiova, au vakila tale ga na marau kei na lomavakacegu.” E kaya tale ga na watina o Ravil: “Qo e dua na gauna marautaki ni rawa nida kilai ira kina na tacida gugumatua ena so tale na vanua. Era sa kenadau tale ga ena veivakavulici ena iVolatabu. E levu sara na ka au vulica vei ira.”

 Na nodra vakuai ira e levu mera veiqaravi, e vuavuaivinaka kina na nodra vunautaka “na itukutuku vinaka . . . ni Matanitu ni Kalou ena veiyasa i vuravura.” (Maciu 24:14) Nodra yalorawarawa eso mera toki i Bulgaria era vakadinadinataka kina ni o Jiova e solia vei ira na ka era gadreva, qai vakayacora tale ga na ka kece era lalawataka.—Same 20:1-4.