E kunea o Danielle, e iVakadinadina i Jiova e Sauca Aferika e dua na kato e guilecavi tu ena dua na sitoa ni gunu kofi. E tu e loma ni kato e dua na baosi qai tu kina na ilavo kei na kad ni baqe. E vinakata o Danielle me vakasuka na kato, mani vaqara na itikotiko se naba ni talevoni ni kena itaukei, e kunea ga e dua na yaca ni tagane. E saga me veitaratara sara kei na baqe e vaka akaude kina o taukei ni kato, ia e sega ni kunei koya rawa. E vaqaqara tiko ga, sa qai qirita nona naba e dua na vuniwai ena risiti e tiko ena kato. E mani sauma mai na qiri e dua na marama, qai vakadonuya me solia na naba nei Danielle vua na turaga e itaukei ni kato.

E kidacala na turaga qori ni sa qiriti yani ena ofisi nei vuniwai ni sa kunea o Danielle na nona kato, e via vakasuka tale vua. Ni lai kauta mai, sa tu mai kina o Danielle kei tamana. Rau vakamacalataka sara vua na vuna rau vaqaqara kina me rau vakasuka nona kato. Erau kaya ni rau iVakadinadina i Jiova, rau saga me rau muria na ivakavuvuli vakaivolatabu. Ya na vuna rau saga tiko ga kina me rau daudina.—Iperiu 13:18.

Oti e vica na aua, e vakauta e dua na itukutuku na turaga qori vei Danielle kei tamana me vakavinavinakataki rau tale ni rau vakasuka na nona kato kei na baosi. Qo na ka e vola: “Au vakavinavinakataka vakalevu nomudrau sasaga mo drau vaqarai au. Dua na ka noqu marau niu sotavi iko kei na nomu vuvale, au na sega tale ga ni guilecava nomudrau yalololoma kei na yalovinaka. Qo ga e dua noqu cau ena levu ni noqu vakavinavinaka. Au kila ni drau dau vakuai kemudrau ena levu na ka mo drau qarava kina nomudrau itavi vakalotu. E laurai ena ka drau cakava ni drau tamata vinaka, e kilai qori ena nona daudina o Danielle kei na nona yalodina. Vakadua tale, vinaka sara vakalevu, me vakalougatataka mada ga na Kalou nomudrau cakacaka vakalotu.”

Oti tale e vica na vula, rau sota tale na turaga qori kei tamai Danielle. E talanoataka vei tamai Danielle ni kunea tale ga e dua na baosi ena gauna e volivoli tiko kina. Ni sa kunei koya na marama e itaukei ni baosi, e tukuna sara vua na vuna e vakasuka tale kina. A yali tale ga nona baosi qai vakasuka tale vua e dua e daudina. E kaya: “Na nona daudina qai veikauaitaki ga e dua ena uqeti ira na kena vo mera cakava tale ga qori, ena vakilai kina na marau ena itikotiko.