Ke o iVakadinadina i Jiova, vakasamataka mada me tomani iko tu na ovisa ni o vunau e veivale. Qori na ka e sotava o Joseph kei na tolu tale na iVakadinadina i Jiova, ni ratou cakacaka vakavunau tiko ena yanuyanu lalai e Micronesia ena 2017.

 Ni sa yakavi, ratou yaco sara ena dua na yanuyanu e rauta ni 600 era vakaitikotiko kina. E kidavaki ratou e matasawa na mea ni yanuyanu. E vakamacalataka sara o Joseph na ka e yaco: “E kaya na mea ni na kauti keitou e veivale na lori ni ovisa. Keitou qoroqoro sara ga, ia keitou vakamacalataka vua ena veidokai ni keitou na sega ni vodo. Keitou na sikovi ira ga e veivale me vaka na kena ivakarau e dau caka tiko.”

 Ratou mani taubale sara yani, ratou vosa tale ga vei ira e levu. Ratou kaya: “Era veiciqomi, ra qai taleitaka na itukutuku keitou wasea vei ira. Kena itinitini, e sivia tale na gauna keitou vakayagataka ena dua na vale.”

 Ena siga vata qori, e siviti Joseph vakarua na lori ni ovisa, sa qai kele ena ikatolu ni gauna. Ratou kaya sara na ovisa vua me ratou vakasoburi koya ena vale e tarava. E nanuma lesu o Joseph: “Au vakasega vei ratou.” Ia ratou kaya, ‘E lekaleka na gauna e vo, keitou na kauti iko ina vo ni vale.’ Au mani vakadonuya ni se vo e levu na vale meu vunau kina. Ni keitou volekata yani na vale yadua, ratou na kaya vei au na yacadratou na vuvale. Ratou kaya tale ga ke sega ni dua e gole mai katuba, ratou na tabaka na sici vei taukeinivale.”

 Nodratou veivuke, e rawa ni keitou sikova kina na vale kece ena siga tiko ga ya. Keitou solia e levu na ivola, tuvanaki tale ga na gauna me keitou lesuvi ira na tataleitaki. Ratou kaya na ovisa vei Joseph ni ratou “marautaka vakalevu nodratou wasea eso na itukutuku vinaka.”

 Ena yakavi ni ratou biubiu na iVakadinadina i Jiova, ratou yaloyalo na ovisa ena matamamarau, kei na ivola vakaivolatabu e toka e ligadratou.