O Cei o Ira na Nefilimi?
Kena isau vakaivolatabu
Era tuwawa voravora na Nefilimi, era luvedra na agilosi ca era mai veiyacovi kei ira na yalewa ni vuravura ena gauna i Noa. a
E kaya na iVolatabu nira “raica na luve ni Kalou dina na totoka ni kedra irairai na luvedra yalewa na tamata.” (Vakatekivu 6:2) O ira na ‘luve ni Kalou’ qori era kabula vakayalo, era talaidredre vua na Kalou nira “biuta na nodra itikotiko dodonu” mai lomalagi. Era liatamata qai “taura me watidra o koya ga era digitaka.”—Juta 6; Vakatekivu 6:2.
Era sucu ena vakawati qori eso na tamata lelevu. (Vakatekivu 6:4) Era dau veivakasagai na Nefilimi, qai sinai o vuravura ena nodra ivalavala kaukaua. (Vakatekivu 6:13) E vakatokai ira na iVolatabu mera “tamata qaqa ni gauna makawa ra qai tamata rogo.” (Vakatekivu 6:4) E sega ni dua na ka vinaka mera qoroi kina na Nefilimi, era kilai ga ena nodra voravora kei na nodra dau veivakarerei.—Vakatekivu 6:5; Tiko Voli Mai na Lekutu 13:33. b
Rai cala me baleti ira na Nefilimi
Rai cala: Era se bula tiko e vuravura nikua na Nefilimi.
Ka dina: A luvuca o Jiova na vuravura makawa ni sa rui levu kina na ivalavala voravora. Era vakarusai vata kei ira na daucaka ca na Nefilimi. A nanumi Noa ga kei na nona vuvale o Jiova, ratou mani bula ena waluvu.—Vakatekivu 6:9; 7:12, 13, 23; 2 Pita 2:5.
Rai cala: Era tamata na tamadra na Nefilimi.
Ka dina: Era vakatokai na tamadra na Nefilimi mera “luve ni Kalou dina.” (Vakatekivu 6:2) E cavuti tale ga qori ena iVolatabu vei ira na agilosi. (Jope 1:6; 2:1; 38:7) A rawa nira vukici ira na agilosi mera tamata. (Vakatekivu 19:1-5; Josua 5:13-15) Na yapositolo o Pita a cavuti ira “na kabula vakayalo ena valeniveivesu, era a talaidredre ena gauna a wawa voli kina ena vosota na Kalou ena siga i Noa.” (1 Pita 3:19, 20) Ena vakasama vata qori, a vakamacalataka o Juta ni so na agilosi “era sega ni tudei . . . ena nodra vanua nira biuta na nodra itikotiko dodonu.”—Juta 6.
Rai cala: Era agilosi talaidredre na Nefilimi.
Ka dina: Ni laurai na ikotokoto, e kilai mai na ka e tukuni ena Vakatekivu 6:4 nira sega ni agilosi na Nefilimi. Era tamata lelevu, era luvedra na agilosi era liatamata mera veiyacovi kei ira na yalewa e vuravura. Era “taura me watidra” na agilosi “o koya ga era digitaka,” ia e kaya o Jiova ni na vakarusa na vuravura e sega ni doka na Kalou ni oti e 120 na yabaki. (Vakatekivu 6:1-3) E kaya na iVolatabu ni “gauna qori,” era liatamata kina na agilosi ra qai “veiyacovi . . . kei na luvedra yalewa na tamata.” Era sucu kina na “tamata qaqa ni gauna makawa,” o ira na Nefilimi.—Vakatekivu 6:4.
a Na vosa vakaIperiu e vakadewataki me “Nefilimi” e kena ibalebale “Dauveivakabalei.” E kaya na ivola Wilson’s Old Testament Word Studies ni vosa ya e vakaibalebaletaki “vei ira era vakavuna na nodra bale na tamata nira vakayacora vei ira na ivalavala kaukaua se ra butakoci ira.”
b Ni ratou raica na yamata ni Isireli eratou vakamacalataki ena Tiko Voli Mai na Lekutu 13:33 na kedra vakaitamera na kai Kenani, eratou rairai vakasamataki ira sara na Nefilimi era se mate ena vica vata na senitiuri e liu.—Vakatekivu 7:21-23.
Rawa ni o Wilika Tale ga
BALETI KEIMAMI
Kerea mo Sikovi
Veivosakitaka na isau ni dua na nomu taro mai na iVolatabu, se mo vulica eso tale na ka me baleti ira na iVakadinadina i Jiova.