E sega ni tukuna na iVolatabu na gauna e tekivu bulia kina na Kalou na lomalagi kei na vuravura, se na balavu ni gauna e bulia kina. E kaya ga: “Ena ivakatekivu, e bulia na lomalagi kei na vuravura na Kalou.” (Vakatekivu 1:1) E sega ni tukuna vakamatata na iVolatabu se yaco ena gauna cava na “ivakatekivu.” Ia e vakamacalataki ena Vakatekivu na veitaravi ni ka e yaco ni bera ni tekivu na ono na siga ni bulibuli.

•  E 24 na aua na siga ni bulibuli?

•  Na cava e yaco ena ono na siga ni bulibuli?

•  E donu na ka vakasaenisi e volai ena Vakatekivu?

•  Gauna cava e buli kina na siga, vula kei na kalokalo?

•  Na cava e tukuna na iVolatabu me baleta na dede ni vuravura?

 Sega. Ni cavuti ena iVolatabu na “siga,” e rawa ni vakaibalebaletaka na duidui gauna, vakatau ena ka e veivosakitaki tiko. Kena ivakaraitaki, e vakamacalataki ena iVolatabu na veika e buli ena dua na siga.—Vakatekivu 2:4.

 E veisautaka na Kalou na vuravura e ‘bera ni vakarautaki qai laladidi’ ina dua na itikotiko e rawa nira bula kina na tamata kei na manumanu. (Vakatekivu 1:2) Sa qai bulia na veika bula e vuravura. E vakamacalataka na iVolatabu e ono na ka e yaco ena siga ni bulibuli:

•  iMatai ni Siga: E cakava na Kalou na rarama me cilava mai na vuravura me wasea kina na siga kei na bogi.—Vakatekivu 1:3-5.

•  iKarua ni Siga: E bulia na Kalou na maliwalala, se wasea na wai ena dela ni vuravura kei na wai e maliwalala.—Vakatekivu 1:6-8.

•  iKatolu ni Siga: Sa qai cakava na Kalou me mamaca na vanua. E bulia tale ga na kau kei na co.—Vakatekivu 1:9-13.

•  iKava ni Siga: E vakavuna na Kalou me rarama mai e vuravura na siga, vula kei na kalokalo.—Vakatekivu 1:14-19.

•  iKalima ni Siga: E bulia na Kalou na veika bula e wai kei na manumanuvuka.—Vakatekivu 1:20-23.

•  iKaono ni Siga: E bulia na Kalou na manumanu e vuravura kei na tamata.—Vakatekivu 1:24-31.

 Ni sa oti na nona bulibuli na Kalou ena ikaono ni siga, sa qai vakacegu mai na nona cakacaka se sa cegu na nona bulibuli.—Vakatekivu 2:1, 2.

 E sega ni vakamacalataki vakasaenisi na itukutuku ni bulibuli ena iVolatabu. Ia e vakamacalataki ga ena sala me matata kina vei ira na dauwiliwili ena gauna mada ga vakaivolatabu, na veitaravi ni ka e bulia na Kalou. E duavata na ka e kaya na iVolatabu kei na veika saenisi me baleta na bulibuli. E kaya o Robert Jastrow e dau dikeva na vuravura kei na maliwalala: “E duidui na ivakamacala, ia e duavata na ka e tu ena maliwalala kei na ka e tukuna na iVolatabu me baleta na itekitekivu ni bula; na veitaravi ni ka e yaco me yacova ni buli na tamata.”

 Sa buli oti tu na siga, vula kei na kalokalo ni tiki ni “lomalagi” ena “ivakatekivu.” (Vakatekivu 1:1) Ia e sega ni laurai mai vuravura na rarama kece qori ni sa rui vavaku na maliwalala. (Vakatekivu 1:2) Sa laurai ena imatai ni siga na rarama, ia e sega ga ni kilai na vu ni rarama. Sa qai rarama vinaka mai na maliwalala ena ikava ni siga. E tukuni ena iVolatabu ni sa qai “vakararamataki vuravura” na siga, vula kei na kalokalo, qori na ka ena raica e dua e bula e vuravura.—Vakatekivu 1:17.

 E sega ni volai ena iVolatabu na dede ni bula ni vuravura. E tukuni ga ena Vakatekivu 1:1 na itekitekivu ni lomalagi kei na vuravura. E sega ni veisaqasaqa qori kei na itukutuku vakasaenisi me baleta na dede ni vuravura.