YADRA TIKO!

Leqa na Kakana e Vuravura ena Vuku ni iValu e Ukraine

SARAVA/ROGOCA

Ena ika19 Me, 2022, era tukuna e sivia ni 75 na vakailesilesi ni matanitu ena Matabose kei Vuravura “ni rawa ni ca sara na leqa ni kakana e vu mai na COVID-19, kei na veiveisau ni draki.” E tukuna na mekesini na Economist ena “vuku ni ivalu e yaco tiko e Ukraine ena rawa ni ca na ituvaki kei vuravura, levu era na rawa ni mate ena viakana.” E parofisaitaka na iVolatabu ni na yaco na leqa ni kakana ena gauna qo. E vakarautaka tale ga na ivakasala meda vosota kina.

Parofisaitaka na iVolatabu na leqa ni kakana

E parofisaitaka o Jisu: “Era na veivaluvaluti na veivanua kei na veimatanitu, ena vakilai na leqa ni kakana.”—Maciu 24:7.
E tukuni ena ivola na Vakatakila e va na dauvodo ose vakaivakatakarakara. E dua na dauvodo ose qori e vakatayaloyalotaka na ivalu. E muri koya tiko e dua tale na dauvodo ose e vakatayaloyalotaka na dausiga na gauna ena vakilai kina na leqa ni kakana, ena saulevu tale ga. “Au raica e dua na ose loa, o koya e vodoka tiko e taura tu e dua na ivakarau. Au rogoca e dua na domo . . . E kaya, ‘Mo sauma e dua na kilo witi ena nomu isau ni cakacaka ena dua na siga! Mo sauma tale ga qori ni o volia e tolu na kilo varile.’”—Vakatakila 6:5, 6, Contemporary English Version.

Sa yaco tiko nikua na parofisai vakaivolatabu me baleta na leqa ni kakana. E vakatoka na iVolatabu na gauna qori me “iotioti ni veisiga.” (2 Timoci 3:1) Mo kila e levu tale na ka ma baleta na “iotioti ni veisiga” kei na va na dauvodo ose, sarava na vidio Veisau o Vuravura me Tekivu Mai na 1914. Wilika tale ga na ulutaga “Cava e Kilai me Baleti Ratou na Dauvodo Ose?”

Sala ena vukei iko kina na iVolatabu

E tiko ena iVolatabu na ivakasala yaga e rawa ni vukei iko mo vosota na veika dredre e vakilai tu nikua, wili kina na saulevu se leqa na kakana. Mo wilika eso na ivakasala yaga vakaivolatabu raica na ulutaga, “Cava mo Cakava ke Vakalailaitaki na Kemu iSau?”
E vakaraitaka tale ga na iVolatabu na noda inuinui ni na veisau na ituvaki qo me vinaka. E yalataka na gauna ‘ena levu kina na covuata e vuravura,’ ena sega tale ga ni dua ena waloloi. (Same 72:16) Mo kila eso tale na ka me baleta na inuinui ena iVolatabu ena veigauna se bera mai kei na vuna mo nuitaka kina, wilika na ulutaga “iNuinui Totoka ena Veigauna se Bera Mai.”