“E ririkotaki vakalevu na kena sa vakaleqai tiko na nodra vakasama na itabagone. E laurai ni vu sara ga ni leqa qori na sala ni veikilai ena internet.”​—Dr. Vivek Murthy, na iliuliu ni tabana ni bula e Merika, New York Times, June 17, 2024.

 Ia sala cava e rawa nira taqomaki luvedra kina na itubutubu ena leqa e rawa nira sotava ena sala ni veikilai ena internet? E tu ena iVolatabu na ivakasala yaga.

 Dikeva mada qo eso na ivakavuvuli vakaivolatabu.

 “O koya e yalomatua e vakasamataka na nona ilakolako kece.”​—Vosa Vakaibalebale 14:15.

 Ni o kila na leqa e rawa ni yaco ena sala ni veikilai ena internet, e sega ni kena ibalebale ya mo sa yalana sara ga nona vakayagataka qori o luvemu. Ia ni bera ni vakayagataka mo vakadeitaka mada i liu ni sa rawa ni yalomatuataka nona vakayagataka kina na nona gauna, digia vinaka na nona itokani, me kila tale ga na sala me taqomaki koya kina ena ka e rawa ni vaka vu leqa vua.

•   Mo kila eso tale na ka me baleta na sala ni veikilai ena internet, wilika na ulutaga “E Dodonu me Vakayagataka o Luvequ?” kei “Vukei Luvemu iTabagone me Qarauna Nona Vakayagataka na Internet.”

 “Vakayagataka vakavinaka na nomuni gauna.”​—Efeso 5:16.

 Ke o vakadonuya me vakayagataka o luvemu na sala ni veikilai ena internet, biuta eso na lawa ena sala me vakayagataka kina qai vakamacalataka vua na sala ena yaga kina vua na lawa qori. Mo raica tiko eso na nona ivakarau, qori e dua tale ga na sala o rawa ni vukei koya kina me vakalailaina nona vakayagataka na sala ni veikilai ena internet.

•   Me rawa ni kila o luvemu na sala me qaqarauni kina ena sala ni veikilai ena internet, vakayagataka na droini yavala Qaqarauni ni o Vakailala ena Internet.

 E kaya na iVolatabu nida donuya tu qo na gauna ena “vakilai kina e levu na ka dredre.” (2 Timoci 3:​1-5) Ia e vakarautaka tale ga na ivakasala yaga ena vukei keda meda vosota. E sivia ni 20 na ulutaga vakaivolatabu me baleti ira na itubutubu kei ira na gone e tiko ena ulutaga mate ni vakasama vei ira na itabagone.