A TOVOLEI ena 2014 na isevu ni porokaramu vakavalagi ni tivi e vakatokai na JW Broadcasting. E se veivakayaloqaqataki qai veivakacegui tiko ga na porokaramu qori vei ira e levu e veiyasa i vuravura. Sa vakarautaki na porokaramu ena sivia na 90 na vosa. Kena ivakaraitaki, era marautaka tiko e sivia na 130,000 na dautukutuku e Benin, Côte d’Ivoire, Ghana, kei Togo na kena vakadewataki na broadcasting ena vosa vakaEwe, Ga, kei na Twi (me vaka e laurai toka ena itaba). *

E kaya o Agatha na watina e dua na ivakatawa ni tabacakacaka e Ghana: “Niu rogoci ratou toka na iLawalawa Dauvakatulewa kei na nodratou dauveivuke, e vaka ga ni  vosa tiko vei au o Jiova ena noqu rumu. Au tu ena dua na vanua yawa sara e vuravura, ia au kalougata dina ni porokaramu qo e vakavolekati au vei ira na mataveitacini e veiyasa i vuravura.”

Qo e dua na irogo mai Zambia: “Era sega ni rawaka vinaka sara na mataveitacini, ia era dau saga e levu na ivavakoso mera sarava na JW Broadcasting. Kena ivakaraitaki, na ivavakoso o Misako e rauta ni 20 na maile na kena yawa mai na tauni voleka duadua. E toka ena dua na vanua ni teitei e levu na kena uciwai, qai dau kui na wai ena vulaiuca.” E kaya o Simon e dua na dauveiqaravi a bole me lai veivuke ena ivavakoso o Misako: “E veivula, e dau taubale me rua na aua e dua na tacida me yaco i gaunisala levu, sa qai waraka e kea e dua na ka me vodo kina i tauni me rawa ni lai download mai na broadcasting. E se sega ni bau tiko ena soqoni e dua na turaga e yabaki 70 kei rau na luvena tagane, ia dua na ka nona kurabui nira rawa ni sarava tale ga na tu e nakoro na vidio ena gauna ni soqoni. E kaya na turaga ya, ‘Qo na sala me vulici kina na veika me baleta na Kalou.’”

A vakau mai Rusia e dua na ivola ni vakavinavinaka qai tukuni toka kina: “Sa dua na yabaki neitou sarava tiko na JW Broadcasting, keitou marautaka dina. Oti mada ga na isevu ni porokaramu, keitou vakila ni vakavolekati keitou sara ga vei ira na mataveitacini e veiyasa i vuravura! Sa bau totoka dina! Keitou vakadeitaka ni keitou lewe ni dua na vuvale levu! Keitou dau marau na raici ratou na lewe ni iLawalawa Dauvakatulewa. Dua na ka nodratou sasaga me ratou vakarautaka vei keda na kakana ena kena gauna donu, ratou torovi rawarawa tale ga. Keitou dau vakanamata ina porokaramu kece e veivula. Keitou sa qai sakitaka ga vakalevu na neitou vakatokai me keitou iVakadinadina i Jiova. Vinaka vakalevu! Keitou vakavinavinakataka  na veika veivakurabuitaki erau cakava o Jiova kei Karisito. E veivakayaloqaqataki dina qai veivakacegui!”

Erau kaya o Horst kei Helga, dua na veiwatini itabaqase mai Jamani erau dau tautauvimate: “E wananavu na JW Broadcasting. E vakaukauataki keirau dina na kedra italanoa na mataveitacini e vakaleqai na yagodra. Keirau tautauvimate, ia e uqeti keirau na nodra ivakaraitaki me keirau solia na neirau vinaka taucoko. Keirau vulica ena nona ivakaraitaki na qase ni ivavakoso e paralasi mai tolona lako sobu, nida rawa ni soli ka kece vei Jiova. Ni keirau vakasamataka nodra ivakaraitaki vinaka na mataveitacini qori, keirau sa vakavinavinaka ga vei Jiova keirau qai kerei koya me vakalougatataki ira vakalevu.”

E kaya o Kodi e dua na gonetagane mai Igiladi: “Vinaka, nomuni solia na nomuni gauna kei na nomuni sasaga ena kena vakarautaki na jw.org, JW Broadcasting, kei na vidio me baleti rau o Kelepi kei Sofia. Vinaka na vakarawarawataka na kena kilai na iVolatabu. Au papitaiso niu yabaki walu. Au via veivuke ena tara Vale ni Soqoni ena dua na gauna e muri! Au via lai veiqaravi tale ga e Peceli. Au sa yabaki ciwa qo, au kila ni na sega ni dede sara noqu wawa.”

A vola o Arabella e dua na goneyalewa yabaki walu mai Igiladi: “Vinaka na vidio kei na so tale na ka ni vuli e vakarautaki. E vukei au qori meu kilai Jiova vinaka. E sega ni vakavucesa noqu vulica na veika me baleti Jiova niu vakayagataka na ka e vakarautaki ena jw.org. Oni matai na buli sere ni kilai rawarawa na qaqana. E vukei au tale ga na vidio me baleti Kelepi kei Sofia. Au vakavinavinaka kece vei kemuni, ena nomuni cakacaka vakaukaua.”