A vakani ira vakacakamana na vica na udolu o Jisu ena tokalau ni Wasa o Kalili, a dro tale ga nira via buli koya me tui. Ena bogi tiko ga ya, a taubale ena dela ni wasawasa voravora. A taubale tale ga e delaniwai o Pita, ia e tekivu dromu vakamalua ni lailai nona vakabauta, mani vakabulai koya o Jisu. A vakaruruya na cagi, rairai vakabulai ratou kina nona tisaipeli me kua ni voca na waqa.

E gole o Jisu ena tai adua ni wasawasa ena yasayasa o Kapenaumi. Era mani kunei koya na ilala levu era vakani vakacakamana, era taroga: “O lako mai ena gauna cava?” E vunauci ira o Jisu ena nona kaya nira vaqarai koya ga me rawa nira vakani tale. Sa qai uqeti ira mera “kua ni cakacakataka na kakana e ca rawarawa, na kakana ga e tudei me rawati kina na bula tawamudu.” Era taroga sara: “Na cava me keimami cakava, me keimami vakayacora kina na cakacaka e vinakata na Kalou?”—Joni 6:25-28.

De dua ratou vakasamataka tiko na ka e vinakati ena Lawa, sa qai vakatakila o Jisu na cakacaka e bibi duadua ena nona kaya: “Qo na cakacaka e vinakata na Kalou, moni vakaraitaka nomuni vakabauti koya e tala mai.” E levu na ka sa cakava o Jisu, ia era sega ni vakabauti koya na lewenivanua. Era vinakata me cakamana me rawa nira vakabauti koya. Era taroga: “Na cakacaka cava oni na cakava? Era kania na mana ena vanua talasiga na tukai keimami, me vaka ga e volai: ‘E solia vei ira na madrai mai lomalagi mera kania.’”—Joni 6:29-31; Same 78:24.

Nira vinakata e dua na ivakatakilakila, sa qai vakamacalataka o Jisu o cei e vakavuna na cakamana: “Au tukuna vakadodonu vei kemuni, e sega ni solia vei kemuni o Mosese na madrai mai lomalagi, o Tamaqu ga e solia vei kemuni na madrai dina mai lomalagi. Ni madrai e solia na Kalou o koya e lako sobu mai lomalagi qai solia na bula i vuravura.” Era sega ni kila na ibalebale ni ka e tukuna, era mani kaya: “Turaga, moni solia tiko ga mai vei keimami na madrai qo.” (Joni 6:32-34) Na “madrai” cava e vakaibalebaletaka tiko o Jisu?

E tukuna: “O yau na madrai ni bula. O koya ga e lako mai vei au ena sega sara ni viakana, o koya tale ga e vakaraitaka nona vakabauti au ena sega sara ni viagunu. Ia au tukuna vei kemuni, oni sa raici au, oni sega ga ni vakabauta. . . . Niu sega ni lako sobu mai lomalagi meu cakava ga na lomaqu, na loma i koya ga e talai au mai. Qo na loma i koya e talai au mai, meu kua ni vakayalia e dua vei ira e solia mai vei au, ia meu vakaturi ira ena iotioti ni siga. Ni qo na loma i Tamaqu, me bula tawamudu o koya yadua e raica na Luvena qai vakaraitaka ni vakabauti koya.”—Joni 6:35-40.

Dua na ka nodra cudru na lewenivanua, era vosakudrukudrutaki koya na Jiu. E rawa vakacava me tukuna ni o koya “na madrai e lako sobu mai lomalagi”? (Joni 6:41) Era raici koya me dua ga na luve ni tamata mai na korolevu o Nasareci e Kalili. Era veikayaka: “Sega ni o Jisu ga qo na luvei Josefa? Eda kila vinaka na tamana kei na tinana.”—Joni 6:42.

“Ni kua ni vosakudrukudru,” e sauma yani o Jisu. “Ena sega ni lako mai vei au e dua ke sega ni vagolei koya mai o Tamaqu e talai au mai, au na qai vakaturi koya ena iotioti ni siga. Era vola na Parofita, ‘Ena vakavulici ira kece o Jiova.’ O ira kece era rogoci Tamaqu ra qai vuli vua, era lako mai vei au. Se sega ni dua e raica na Tamaqu, o koya ga e lako mai vua na Kalou sa raica na Tamaqu. Au tukuna vakadodonu vei kemuni, o koya e vakabauta ena bula tawamudu.”—Joni 6:43-47; Aisea 54:13.

Ena nodrau veivosaki kei Nikotimo, a vakamacalataka o Jisu na bula tawamudu qai semata qori kei na nona vakabauti na Luve ni tamata, e kaya: “Mera kua ni rusa kina o ira  na vakaraitaka nodra vakabauti [koya na Luvena e duabau ga e bulia na Kalou], mera rawata ga na bula tawamudu.” (Joni 3:15, 16) Ia sa vosa raraba tiko qo vei ira na lewenivanua, qai vakamacalataka ni rawa nira bula tawamudu ena vukuna, sega ena mana se madrai ni Kalili. Ena rawati gona vakacava na bula tawamudu? E cavuta tale o Jisu: “O yau na madrai ni bula.”—Joni 6:48.

Na kena veivosakitaki voli mai na madrai mai lomalagi e qai lai cava ena veivakavulici i Jisu ena valenilotu mai Kapenaumi.