E ulumatua i Tui Saula o Jonacani, e tagane qaqa ni vala. E kaya o Tevita ni totolo cake mai na ikeli qai kaukaua sara mai na laione. Dua na siga e raica o Jonacani e 20 na kai Filisitia ena dua na delana. E kaya sara vei koya e cola tiko nona iyaragi: ‘Daru na valuti ira ga ke solia o Jiova e dua na ivakatakilakila. Ke ra bolei kedaru, daru na qai kila ni dodonu me daru vala.’ Era kailavaka na kai Filisitia: ‘Mai, meda vala!’ Erau mani cabe, rau ravuti ira na sotia.

Ni ulumatua o Jonacani, e rawa ni sosomitaki tamana ena veiliutaki vakatui. Ia e kila ni digitaki Tevita o Jiova. E sega ni vuvutaki koya, erau veitokani vinaka ga. Rau yalataka me rau veitaqomaki. E mani solia vei Tevita o Jonacani na nona isulu  balavu, iseleiwau, dakaititi kei na beleti me ivakatakilakila ni nodrau veitokani.

Ni drovaki Saula tiko o Tevita, e lako vua o Jonacani qai kaya: ‘Mo kaukaua, mo yaloqaqa. E digitaki iko o Jiova mo veiliutaki. E kila vinaka tu o tamaqu.’ O na via veitokani kei na dua e vakataki Jonacani?

E dau bolemate o Jonacani me vukei Tevita. E kila ni via vakamatei Tevita o Tui Saula, mani kaya vei tamana: ‘O na valavala ca ke o vakamatei Tevita, e sega ni dua nona cala.’ E cudru sara ga o Saula. Ena vica na yabaki tarava e qai mate o Saula kei Jonacani ena ivalu.

Ni sa mate o Jonacani, e vaqarai Mefiposeci o Tevita, na luvei Jonacani. Ni rau sota, e tukuna vua: ‘Keirau veitokani vinaka kei tamamu, au na qaravi iko ena vo ni nomu bula. O na tiko ena noqu vale, o na kana tale ga ena noqu teveli.’ E sega vakadua ni guilecavi Jonacani o Tevita, na nona itokani.