iMatai ni iVola Vei Ira mai Cesalonaika 3:1-13
3 O koya gona, ni keitou sa sega ni vosota rawa, keitou nanuma ni vinaka me keitou se tiko mada ga e Aceni,+
2 keitou mani talai Timoci+ yani na tacida, e dauveiqaravi ni Kalou ena itukutuku vinaka i Karisito, me vakataudeitaki kemuni, me vakacegui kemuni tale ga ena nomuni vakabauta,
3 me kua kina ni dua e yavalati* ena vuku ni veivakararawataki qo. Ni oni kila ni dodonu me yaco vei keda na ka kece qo.+
4 Ni keitou tiko vata kei kemuni, keitou dau tukuna vei kemuni nida na vakararawataki, me vaka oni kila, qori sara ga na ka a yaco.+
5 Oya na vuna au talai koya yani kina niu sa sega ni rawa ni wawa tale, au via kila sara ga se oni yalodina tiko se sega,+ de sa temaki kemuni na Dauveitemaki+ qai maumau wale na neitou oga ena vukumuni.
6 Ia e se qai yaco mai o Timoci ena nona lesu mai vei kemuni,+ e kauta mai na itukutuku vinaka ni nomuni yalodina kei na nomuni loloma, ni oni se nanumi keitou vinaka tiko ga, oni diva tale ga moni raici keitou me vaka ga na neitou via raici kemuni.
7 O koya gona raveitacini, e dina ni keitou leqa, keitou vakararawataki tale ga, ia e vakacegui keitou na nomuni yalodina.+
8 Qo keitou sa qai bulabula* ga ni oni tudei tiko ena Turaga.
9 Me keitou na vakaraitaka vakacava vua na Kalou na neitou vakavinavinakataki kemuni, kei na marau keitou vakila tiko ena vukumuni?
10 Ena bogi kei na siga keitou vakamamasu tiko mai vu ni loma i keitou me keitou bau raici kemuni,* me keitou solia vei kemuni na veika oni gadreva me baleta na nomuni vakabauta.+
11 Me dusimaka mada ga vakavinaka na neitou ilakolako yani vei kemuni na noda Kalou na Tamada, kei na noda Turaga o Jisu.
12 Kena ikuri, me vukei kemuni mada ga na Turaga moni veilomani sara vakalevu vakataki kemuni,+ moni lomani ira tale ga na kena vo, me vaka ga na neitou lomani kemuni,
13 me dei kina na lomamuni, moni kua ni beitaki ni oni savasava ena mata ni Kalou+ na Tamada ni sa na tiko na noda Turaga o Jisu+ vata kei ira kece na nona yalosavasava.
