iMatai ni iVola Vei Ira mai Cesalonaika 5:1-28
5 Ia me baleta na gauna kei na siga sa lokuci, e sega ni gadrevi raveitacini me volai tale yani vei kemuni e dua na ka,
2 ni oni kila vinaka ni na yaco mai na siga i Jiova*+ me vaka sara ga na daubutako ena bogi.+
3 Ena gauna era kaya tiko kina, “Na vakacegu kei na sautu!” ena qai yaco vakidacala vei ira na rusa+ me vaka ga na taratara ni yalewa bukete, era na sega ni dro rawa.
4 Ia o kemuni raveitacini oni sega ni tiko ena butobuto, ena sega kina ni yaco vakidacala vei kemuni na siga ya me vaka vei ira na daubutako,
5 ni oni luve ni rarama kece, oni luve ni siga tale ga.+ Eda sega ni luve ni bogi se luve ni butobuto.+
6 O koya gona, meda kua ni moce me vakataki ira na kena vo,+ ia meda yadra tiko+ da qai yalomatua.+
7 O ira na moce era moce ena bogi, o ira na mateni era mateni tale ga ena bogi.+
8 Ia vei keda na gone ni siga, meda yalomatua tiko da qai dara me isasabai ni sereda na vakabauta kei na loloma, me isala ni uluda na inuinui ni bula+
9 ni sega ni digitaki keda na Kalou meda cudruvi, e digitaki keda ga meda vakabulai+ ena vuku ni noda Turaga o Jisu Karisito.
10 A mate o koya ena vukuda+ meda bula vata kina kei koya,+ se da yadra tiko se da sa moce.*
11 O koya gona, moni veivakayaloqaqataki* tiko, moni veivakauqeti,+ me vaka ga oni sa cakava tiko mai.
12 Ia keitou kerei kemuni raveitacini moni dokai ira na cakacaka vakaukaua ena kemuni maliwa, o ira na vakatawai kemuni ena cakacaka ni Turaga, o ira na dau vakasalataki kemuni,
13 moni dokai ira vakalevu ni lomani ira ena vuku ni nodra cakacaka.+ Ni dau veiyaloni tale ga.+
14 Ena yasana adua, keitou vakamasuti kemuni raveitacini moni vakasalataki* ira na dau murilomadra,+ vosa vakayalovinaka vei ira na yalolailai, vukei ira na malumalumu, vosoti ira na tamata kece.+
15 Raica me kua ni dua e veisausaumitaka na ca,+ sasagataka tiko ga na ka e vinaka vei kemuni kece, vei ira tale ga na kena vo.+
16 Moni marau tiko ga.+
17 Ni kua ni cegu ena masu.+
18 Ni vakavinavinakataka na ka kece.+ Na ka kece qo e loma ni Kalou vei kemuni ena vuku i Karisito Jisu.
19 Ni kua ni bokoca na bukawaqa ni yalo tabu.+
20 Ni kua ni dau beca na parofisai.+
21 Ni vakadeitaka na dina ni ka kece,+ ni taura matua na ka vinaka.
22 Moni yawaka na veimataqali ca kece.+
23 Me taucoko mada ga na nona vakasavasavataki kemuni na Kalou e dau veivakacegui. Me vinaka sara ena ka kece na yagomuni, na lomamuni kei na nomuni bula, moni kua kina ni beitaki ena dua na ka ni sa na tiko na noda Turaga o Jisu Karisito.+
24 O koya e kacivi kemuni e dau dina ena nona vosa, ena vakayacora sara ga.
25 Raveitacini, ni masulaki keitou tiko ga.+
26 Moni kidavaki ira na veitacini kece ena iregu ni veitacini.
27 Au vakaroti kemuni ena yaca ni Turaga moni raica me wiliki na ivola qo vei ira kece na mataveitacini.+
28 Me tiko mada ga kei kemuni na loloma soli wale ni noda Turaga o Jisu Karisito.
