iMatai ni iVola Vei Timoci 3:1-16
3 E dina na itukutuku qo: Ke dua e via qarava na itavi vakaivakatawa,+ e sa vinakata tiko na cakacaka vinaka.
2 E dodonu gona me kua ni beitaki ena dua na ka na ivakatawa, me dua ga na watina, me lewai koya vinaka, me yalomatua,+ me kua ni yakusurasura nona bula, me dau veikauaitaki,+ me yacova na ivakatagedegede ni veivakavulici,+
3 me kua ni daumateni,+ me kua ni voravora, ia me yalorawarawa,+ me kua ni dauveiba,+ me kua ni dau lomana na ilavo,+
4 me lewa vinaka nona vuvale, mera talairawarawa vua na luvena ra qai dokai koya+
5 (ke dua e sega ni qarava rawa nona vuvale, ena qai qarava vakacava na ivavakoso ni Kalou?),
6 me kua ni se qai tisaipeli vou,+ de dokadoka qai tau vua na itotogi e sa tau vua na Tevoro.
7 Kena ikuri, me vinaka na kena irogorogo vei ira e taudaku,+ me kua kina ni vosavakacacataki* se coko ena dai ni Tevoro.
8 O ira tale ga na dauveiqaravi ni ivavakoso e dodonu mera matua, mera kua ni dau vosavosarua,* mera kua ni dau gunu waini vakalevu, mera kua ni kocokoco ena nodra qara na sala mera rawaka ga kina,+
9 mera dei tiko ga ena vakabauta vaKarisito, ya na ka vuni tabu ni Kalou, me savasava tale ga nodra lewaeloma.+
10 Mera vakatovolei tale ga e liu me laurai se ganiti ira se sega na itavi, oti mera qai vakadonui mera veiqaravi, nira sega ni beitaki ena dua na ka.+
11 O ira tale ga na yalewa e dodonu mera matua, mera kua ni dau vakauvosa,+ mera lewai ira vinaka, mera yalodina ena ka kece.+
12 Me dua ga na watina na dauveiqaravi ni ivavakoso, me lewa vinaka na luvena kei na nona vuvale.
13 Ena rogo vinaka o koya e vinaka nona veiqaravi, ena doudou tale ga me tukuna yani na nona vakabauti Karisito Jisu.
14 Au vakanuinui tu meu lako yani vei iko ena dua na gauna ga qo, ia au se volavola mada yani qo
15 deu mani bera, mo kila kina na ivakarau ni bula e rakorako mo vakaitovotaka ena vuvale ni Kalou,+ oya na ivavakoso ni Kalou bula, na duru e tokona na ivakavuvuli dina.
16 E sega ni tukuni rawa na ka vuni tabu ni noda qarava na Kalou: ‘E vakatakilai mai o Jisu ena yago vakatamata,+ e vakadonui ena yago vakayalo,+ e rairai vei ira na agilosi,+ e vunautaki ena veimatanitu,+ e vakabauti e vuravura,+ e ciqomi mai lomalagi ena lagilagi.’
