iMatai ni Veigauna 17:1-27
17 Ni tiko ga o Tevita ena nona vale,* e kaya sara vei Necani+ na parofita: “Au sa tiko qo ena vale sitari+ ia na kato ni veiyalayalati i Jiova e tiko ga ena ilati ni valelaca.”+
2 E kaya o Necani vei Tevita: “Moni cakava ga na ka e lomamuni, ni tiko vata kei kemuni na Kalou dina.”
3 Ena bogi tiko ga oya e vosa vei Necani na Kalou, e kaya:
4 “Lai tukuna vua na noqu dauveiqaravi o Tevita, ‘Qo na ka e kaya o Jiova: “O na sega ni tara na vale meu tiko kina.+
5 Niu a sega ni tiko ena dua na vale ena siga au kauti Isireli tani mai kina me yacova na siga qo, au tiko ga ena valelaca ina valelaca, mai na dua na valeniveitavaki ina dua tale.*+
6 Ena gauna taucoko au lako vata kina kei ira kece na Isireli, vakacava au a tukuna e dua na vosa vua e dua na turaganilewa ni Isireli au lesia me vakatawai ira na noqu tamata, au kaya: ‘Na cava oni sega ni tara kina e dua na noqu vale sitari?’”’
7 “Qo na ka mo tukuna vei Tevita na noqu dauveiqaravi, ‘Qo na ka e tukuna o Jiova ni lewe vuqa:* “Au kauti iko mai na vanua veico mo kua ni muria na qelenisipi, mo mai nodra iliuliu na noqu tamata na Isireli.+
8 Au na tiko vata kei iko ena vanua kece o lakova,+ au na muduki ira kece na kemu meca mai matamu,+ au na vakarogoya na yacamu me vaka na yacadra na tamata rogo e vuravura.+
9 Au na vakarautaka e dua na vanua meu vakatikori ira kina na noqu tamata na Isireli, era na tiko e kea, era na sega ni vakasosataki tale, era na sega ni vakasaurarataki ira tale na tamata ca me vaka e liu,+
10 ena siga au lesi ira kina na turaganilewa mera lewai ira na noqu tamata na Isireli.+ Au na vakamalumalumutaki ira na kemu meca kece.+ Au tukuna tale ga vei iko, ‘Ena tara o Jiova e dua na vale* me nomu.’
11 “‘“Ni oti nomu gauna mo lai tiko kei ira na nomu qase, au na vakatubura na nomu kawa e taravi iko, e dua na luvemu tagane,+ au na vakataudeitaka na nona veiliutaki.+
12 O koya ga ena tara e dua na noqu vale,+ au na vakataudeitaka na nona idabedabe vakatui me tawamudu.+
13 Au na tamana ena luvequ o koya.+ Au na sega ni kauta tani vua na dei ni noqu loloma,+ me vaka au kauta tani vei koya e liu vei iko.+
14 Au na lesi koya ena noqu vale kei na noqu matanitu me tawamudu, ena tawamudu+ tale ga na nona idabedabe vakatui.”’”+
15 E tukuna vei Tevita o Necani na vosa kece kei na raivotu taucoko qo.
16 E curu sara i loma o Tui Tevita, e dabe ena mata i Jiova qai kaya: “O cei o yau kemuni Jiova na Kalou? Na cava na noqu vuvale moni kauti au mai kina me yacova qo?+
17 E sega ni o koya ga qori, kemuni na Kalou, oni tukuna tale ga na ka me baleta na nona vuvale na nomuni dauveiqaravi ena veigauna se bera mai,+ oni raici au me vaka e dua na turaga me vakacerecerei tale, kemuni Jiova na Kalou.
18 Na cava tale me tukuna vei kemuni na nomuni dauveiqaravi o Tevita ni oni rokovi au, oni kila vinaka na nomuni dauveiqaravi?+
19 Kemuni Jiova, oni vakayacora na ka levu kece qo ena vukuna na nomuni dauveiqaravi me salavata kei na lomamuni ni oni vakatakila na nomuni cecere.+
20 Kemuni Jiova, e sega ni dua e vakataki kemuni,+ e sega tale ni dua na Kalou o kemuni ga,+ na ka kece keimami rogoca e daliga i keimami e vakadeitaka qori.
21 Na matanitu cava tale e vuravura e vakataki ira na nomuni tamata na Isireli?+ E lako na Kalou dina qai vakabulai ira mera nona tamata.+ Oni vakarogoya na yacamuni ni oni cakava na ka lelevu kei na ka vakatubuqoroqoro,+ oni vakasavi ira na veimatanitu e matadra na nomuni tamata+ oni vakabula mai Ijipita.
22 Oni digitaki ira na nomuni tamata na Isireli mera nomuni tamata tiko ga,+ o kemuni Jiova oni nodra Kalou.+
23 Qo kemuni Jiova me dina mada ga me tawamudu na ka oni yalataka me baleta na nomuni dauveiqaravi kei na nona vuvale, moni vakayacora me vaka oni yalataka.+
24 Me tudei* mada ga qai vakacerecerei na yacamuni+ me tawamudu, mera tukuna kina na tamata, ‘O Jiova ni lewe vuqa na Kalou ni Isireli, e nodra Kalou na Isireli,’ me vakataudeitaki e matamuni na vuvale i Tevita na nomuni dauveiqaravi.+
25 O kemuni ga na noqu Kalou oni vakatakila vua na nomuni dauveiqaravi na inaki ni nomuni tara vua e dua na vale.* Qori na vuna e doudou kina na masu vei kemuni na nomuni dauveiqaravi.
26 Ia qo kemuni Jiova, o kemuni ga na Kalou dina, oni yalataka na ka vinaka qo vua na nomuni dauveiqaravi.
27 Moni taleitaka mada ga, moni vosa vakalougatataka na vuvale ni nomuni dauveiqaravi me tu ga e matamuni me tawamudu, ni o kemuni ga Jiova oni vakalougatataka, ena kalougata me tawamudu.”
iVakamacala e ra
^ Se “valenitui.”
^ Se rawa ni, “mai na vanua e biri kina na valelaca ina dua tale, se mai na dua na itikotiko ina dua tale.”
^ Qo na mataivalu vakalomalagi.
^ Se “veiliutaki.”
^ Se “yalodina.”
^ Se “veiliutaki.”
