iKarua ni Joni 1:1-13
1 O yau na qase, au volavola tiko vua na marama digitaki. Au volavola tale ga vei ira na luvena. Au lomani ira dina, sega ni o yau ga, o ira tale ga era sa mai kila na ka dina,
2 ena vuku ni ka dina sa tiko vei keda, ena tu vei keda me tawamudu.
3 Ena tiko kei keda na loloma soli wale, na yalovinaka, kei na vakacegu ni Kalou na Tamada, salavata kei na loloma kei na dina i Jisu Karisito na Luvei Tamada.
4 Au marau vakalevu niu raica ni so na luvemu era se muria tiko na ka dina+ me vaka a vakaroti keda kina o Tamada.
5 Oya na vuna au kerei iko kina, na marama digitaki, meda veilomani. (Au sega ni vola tiko yani vei iko e dua na ivunau vou, na ivunau ga mai na ivakatekivu.)+
6 Qo na ibalebale ni loloma, meda muria tiko ga na nona ivunau.+ Na ivunau oni a rogoca mai na ivakatekivu, oya moni veilomani tiko ga.
7 Sa levu na dauveivakacalai e vuravura,+ o ira na sega ni vakabauta ni a mai tamata o Jisu Karisito.+ Qo na dauveivakacalai kei na meca i Karisito.+
8 Moni qarauna me kua ni yali vei kemuni na ka keitou a oga kina, ia moni rawata kina na kemuni isau taucoko.+
9 O koya yadua e gole tani qai sega ni dei tiko ga ena ivakavuvuli i Karisito, e sega ni dauveiqaravi ni Kalou.+ O koya e dei tiko ga ena ivakavuvuli qo e dauveiqaravi ni Kalou, e tisaipeli tale ga i Luvena.+
10 Ke dua e lako yani vei kemuni qai sega ni kauta yani na ivakavuvuli qo, ni kua ni vakacurumi koya ina nomuni vale+ se vakabula vua.
11 O koya e vakabula vua sa vakaivotavota ena nona ivalavala ca.
12 E levu na ka au via vola yani vei kemuni, ia au sega ni via volavola tiko ga yani ena pepa kei na iqi, au vinakata meu lako yani vei kemuni meda lai veivosaki sara ga, moni marau kina vakalevu.
13 Era loloma yani vei iko na luvei tuakamu, o koya na digitaki.
