Vei Ira mai Efeso 1:1-23
1 O yau o Paula, na yapositolo i Karisito Jisu me vaka na loma ni Kalou, vei kemuni na yalosavasava oni tiko mai Efeso+ kei kemuni na yalodina oni tisaipeli i Karisito Jisu:
2 Me nomuni mada ga na loloma soli wale kei na vakacegu ni Kalou na Tamada, kei na Turaga o Jisu Karisito.
3 Me vakacaucautaki na Kalou, na Tama ni noda Turaga o Jisu Karisito, ni vakarautaka vei keda e levu sara na ka ni veivakalougatataki vakayalo ena itikotiko vakalomalagi, ena vuku ni noda duavata kei Karisito,+
4 me vaka nona digitaki keda meda duavata kei koya ni bera na ivakatekivu kei vuravura, ya meda dau loloma, meda savasava, meda kua ni tauviduka+ ena mata ni Kalou.
5 Ni digitaki keda e liu+ meda luvena+ ena vuku i Jisu Karisito me vaka na ka e vinakata kei na nona inaki,+
6 me vakacaucautaki kina o koya ena nona loloma soli wale+ vei keda ni solia mai na luvena lomani.+
7 Ena vukuna ga eda sereki kina ena ivoli,+ ya na nona dra e vosoti kina na noda cala+ me vaka na levu ni nona loloma soli wale.
8 E vakaraitaka tale na loloma soli wale qo ni solia vei keda na vuku kei na yalomatua,
9 e vakatakila tale ga vei keda na ka vuni tabu+ me baleta na lomana. E vinaka sara ga vua qo ni vaka na nona inaki
10 me vakarautaka e dua na veiliutaki ena kena gauna lokuci, ya me kumuna vata tale na ka kece vei Karisito, na veika mai lomalagi kei na veika e vuravura.+ Io, mera kumuni kece vua.
11 E lesi keimami tale ga me keimami itaukei vata kei koya ni digitaki keimami e liu+ me vaka na inaki i koya e dau vakayacora na ka kece me vaka na lomana,
12 me keimami vu ni veivakacaucautaki kei na veivakalagilagi vua, o keimami na vakanuinui e liu vei Karisito.
13 Ia oni a vakanuinui tale ga vua ni oni sa rogoca na ka dina, na itukutuku vinaka ni nomuni vakabulai. Ena vukuna oni dregati+ kina ena yalo tabu e yalataki tu mai ni oni vakabauti koya.
14 Na yalo tabu e ivakadei ni noda ivotavota,+ e sereki keda tale ga na tamata ni Kalou+ ena vuku ni ivoli.+ Qo me vakalagilagi, me vakacaucautaki kina o koya.
15 O koya gona, niu rogoca nomuni vakabauta na Turaga o Jisu kei na loloma oni dau vakaraitaka vei ira na yalosavasava,
16 au sega sara ga ni cegu ena noqu vakavinavinakataki kemuni kei na noqu nanumi kemuni ena noqu masu,
17 me solia vei kemuni na vuku na Tama ni lagilagi, na Kalou ni noda Turaga o Jisu Karisito, moni kila rawa kina na ka dina ena vakatakila vei kemuni me baleti koya,+
18 sa vakararamataki na lomamuni moni kila kina na inuinui e kacivi kemuni kina, na ivotavota lagilagi e vakarautaka mera taukena na yalosavasava,+
19 kei na nona kaukaua levu vei keda na vakabauta.+ Na kaukaua vata ga qori
20 e vakaraitaka vei Karisito ni vakaturi koya mai na mate kei na nona vakatikori koya ena ligana imatau+ ena itikotiko vakalomalagi,
21 me cecere sara vei ira na matanitu kece, na lewa kece, na kaukaua kece, na turaga kece, kei na yaca kece,+ ena ivakarau ni bula ena gauna* qo kei na gauna se bera mai.
22 E vakamalumalumutaka tale ga na Kalou na ka kece e ruku ni yavana,+ qai vakacerecerei koya me ulu ni ka kece ena vuku ni ivavakoso,+
23 oya na yagona+ e vakasinaiti ena nona itovo. O koya ga e vakataucokotaka na ka kece.
iVakamacala e ra
^ Se “itabagauna qo.” Raica na iVakamacala ni Vosa.
