Isikeli 17:1-24
17 E vosa tale vei au o Jiova, e kaya:
2 “O iko na luve ni tamata, mo tukuna e dua na vosa vakatautauvata kei na vosa vakaibalebale me baleta na vuvale ni Isireli.+
3 Mo kaya, ‘Qo na ka e tukuna na Turaga Cecere Duadua o Jiova: “E lako yani i Lepanoni+ e dua na ikeli levu,+ e tiko na tabana lelevu babalavu, e levu na vutina, e duiroka, qai betia na sovu ni sitari.+
4 E betia na sovuna me kauta ina vanua ni veivoli,* mani tea ena koro era tiko kina na dauveivoli.+
5 E mani kauta eso na sorenikau ni vanua,+ e tea sara ena qele bulabula. E tea me vaka na vuniwilou ena bati ni wai levu.
6 E tubu me vunivaini leka bulabula,+ e tubu i loma na drauna, e tubu tiko e rukuna na wakana. E mani dua na vunivaini, e vakatabana lalai, e tete na tabana.+
7 “‘“E lako mai e dua tale na ikeli levu,+ e tiko na tabana lelevu babalavu.+ E qai sala totolo yani vua na waka ni vaini qo, e sala tani mai na vanua e tei toka kina, e tubu yani vua na drauna me vakasuasuataka.+
8 E tei tu ena vanua vinaka ena bati ni wai levu, me tubu na tabana me vua, me dua na vunivaini totoka.”’+
9 “Mo kaya, ‘Qo na ka e tukuna na Turaga Cecere Duadua o Jiova: “Vakacava, ena tubu vinaka? E dua ena kauta tani na wakana,+ me vakacacana na vuana, me malai na tabana?+ Ni sa rui madu, ena sega ni gadrevi me cavuivuvutaka e dua na liga kaukaua se dua na ilala levu.
10 Ena tubu vinaka ni talaci? Ena sega ni malai kece ni liwava na cagi na tokalau? Ena malai ga ena vanua e tei toka kina.”’”
11 E vosa tale vei au o Jiova, e kaya:
12 “Yalovinaka, mo tukuna ina vuvale talaidredre, ‘Oni kila na ibalebale ni ka kece qo?’ Mo kaya, ‘Raica! E lako i Jerusalemi na tui Papiloni qai kauta na kena tui kei ira na kena turaga i Papiloni.+
13 E kauta tale ga e dua na kawa vakatui,+ e veiyalayalati vata kei koya me bubului.+ E mani kauti ira na turaga ni vanua,+
14 me vakalolovirataki kina na matanitu, me kua ni vakacerecerei, ena tiko ga na matanitu ni dei ena nona veiyalayalati.+
15 Ia e qai talaidredre vua na tui+ ni talai ira na nona italai i Ijipita mera kauta mai na ose+ kei na dua na mataivalu levu.+ Vakacava, ena rawata kina e dua na ka? Ena drovaka na itotogi o koya e vakayacora qo? Ena dro bula ni beca na veiyalayalati?’+
16 “‘“Niu bula dina tiko,” e kaya na Turaga Cecere Duadua o Jiova, “ena mate o koya e Papiloni, na vanua e tiko kina na tui* e buli koya* me tui, e sega ni dina ena nona bubului qai beca na nona veiyalayalati.+
17 Na mataivalu kaukaua nei Fero kei na nona ilala sotia ena sega ni yaga ena ivalu,+ ni vakaduri na bai kei na bainivalu me vakamatea e levu.
18 E sega ni dina o koya ena nona bubului qai beca na veiyalayalati. E yalayala oti* o koya, ia e vakayacora na ka kece qo, ena sega ni dro bula.”’
19 “‘Ia qo na ka e kaya na Turaga Cecere Duadua o Jiova: “Niu bula dina tiko, au na sauma vua* na ca ni nona sega ni dina ena noqu bubului+ qai beca na noqu veiyalayalati.
20 Au na balata vua na noqu lawa, ena coko ena noqu lawa ni vakasasa.+ Au na kauti koya i Papiloni, au na lewai koya e kea ni sega ni yalodina vei au.+
21 Era na bale ena iseleiwau o ira kece na nona sotia era dro, o ira na bula era na veiseyaki ina veiyasana kece.*+ Oni na qai kila ni o yau o Jiova, au tukuna qori.”’+
22 “‘Qo na ka e kaya na Turaga Cecere Duadua o Jiova: “Au na kauta na sovu ni sitari cecere+ meu tea, au na betia mai sovuna e dua na tabana malumu,+ au na tea sara ga ena dua na ulunivanua cecere qai rewaicake.+
23 Au na tea ena ulunivanua cecere ni Isireli, ena tubu na tabana, ena vua, ena dua na sitari vakaitamera.* Era na tiko e rukuna na veimataqali manumanuvuka, era na vakaruru ena yaloyalo ni drauna.
24 Era na qai kila na kau kece ni vanua ni o yau o Jiova, au vakalolovirataka na vunikau cecere, au vakacerecerea na kau lolovira,+ au vakamadutaka na kau drokadroka, au vakabulabulataka na kau malai.+ O yau o Jiova au tukuna, au vakayacora.”’”
iVakamacala e ra
^ Ipe., “vanua o Kenani.”
^ Oya o Nepukanesa.
^ Oya o Setekaia.
^ Ipe., “solia oti na ligana.”
^ Ipe., “sauma e uluna.”
^ Ipe., “ina matanicagi kece.”
^ Se “totoka.”
