Isikeli 36:1-38
36 “O iko na luve ni tamata, mo parofisaitaka na ka e baleta na veiulunivanua e Isireli, mo kaya, ‘Moni rogoca na vosa i Jiova o kemuni na veiulunivanua e Isireli.
2 Qo na ka e kaya na Turaga Cecere Duadua o Jiova: “Era kaya vei kemuni na meca, ‘Ae! Sa noda meda taukena na vanua cecere makawa!’”’+
3 “Ia mo parofisai, mo kaya, ‘Qo na ka e kaya na Turaga Cecere Duadua o Jiova: “Nira vakalalai kemuni, era valuti kemuni mai na veiyasana kece mera taukeni kemuni o ira na bula* mai na veimatanitu, era veitalanoataki kemuni tiko ga na lewenivanua, era vakaucacataki kemuni,+
4 ia moni rogoca na veiulunivanua e Isireli na nona vosa na Turaga Cecere Duadua o Jiova! Qo na ka e kaya na Turaga Cecere Duadua o Jiova ina veiulunivanua, ina veidelana, ina veiuciwai, ina veibuca, ina vanua e vakarusai,+ kei na koro lala kece era kovea ra qai vakalialia na veimatanitu voleka era bula,+
5 e kaya vei ira na Turaga Cecere Duadua o Jiova: ‘Au na vosataki ira na lewe ni veimatanitu era bula, vaka kina o Itomi taucoko ena noqu cudru waqawaqa,+ era taura ena marau levu na noqu vanua me nodra, era vosabeca,+ mera taura na kena vanua veico mera kovea.’”’+
6 “Ia mo parofisaitaka na ka e baleta na vanua o Isireli, mo kaya ina veiulunivanua kei na veidelana, ina veiuciwai kei na buca, ‘Qo na ka e kaya na Turaga Cecere Duadua o Jiova: “Raica! Au na vosa ena noqu cudru kei na noqu cudru levu nira vakalialiai kemuni na veimatanitu.”’+
7 “Qo na ka e kaya na Turaga Cecere Duadua o Jiova: ‘Au laveta na ligaqu meu bubuluitaka nira na vakamaduataki na veimatanitu voleka.+
8 Ia o kemuni na veiulunivanua e Isireli, oni na vakatubura na tabamuni, oni na vua me kedra na noqu tamata na Isireli+ nira sa voleka ni lesu mai.
9 Niu tokoni kemuni, au na golevi kemuni, oni na teivaki ena sorenikau.
10 Au na vakalevutaki ira na nomuni tamata, na vuvale taucoko i Isireli, o ira kece, ena tawani tale na veikoro,+ ena tara tale na irusarusa.+
11 Io, au na vakalevutaki ira na nomuni tamata kei na nomuni manumanu,+ era na tubu, era na vakaluveni. Au na vakavuna moni tawani tale me vaka e liu,+ au na vakavutuniyautaki kemuni vakalevu ni vakatauvatani e liu,+ oni na qai kila ni o yau o Jiova.+
12 Au na tuberi ira na tamata, na noqu tamata na Isireli mera lakovi kemuni, era na taukeni kemuni.+ Oni na nodra ivotavota, oni na sega tale ni vakavuna mera yava.’”+
13 “Qo na ka e kaya na Turaga Cecere Duadua o Jiova: ‘Nira kaya tiko vei kemuni, “O iko na vanua o dau vakamatei ira na lewenivanua, o kauta tani na luvedra na nomuni matanitu,”’
14 ‘ia o na sega tale ni vakamatei ira na lewenivanua, se vakavuna me yava na nomu matanitu,’ e kaya na Turaga Cecere Duadua o Jiova.
15 ‘Au na sega tale ni vakadonuya mera vakacacani iko na veimatanitu, se mera vakalialiai iko na lewenivanua,+ o na sega tale ni vakatarabetaka na nomu matanitu,’ e kaya na Turaga Cecere Duadua o Jiova.”
16 E vosa tale vei au o Jiova, e kaya:
17 “O iko na luve ni tamata, ni tiko na vuvale ni Isireli ena nodra vanua era vakadukadukalitaka ena nodra ivalavala kei na ka era cakava.+ Na nodra ivalavala e vaka na dukadukali ni matenivula.+
18 Au mani cudruvi ira vakalevu nira vakadavea na dra ena vanua,+ era vakadukadukalitaka tale ga na vanua ena nodra matakau vakasisila.*+
19 Au vakasavi ira kina ina veimatanitu, au cemuri ira ina veivanua.+ Au lewai ira me vaka na nodra ivalavala kei na ka era cakava.
20 Ia nira lako yani ena veimatanitu qori, era beca na yacaqu tabu na lewenivanua,+ era kaya me baleti ira, ‘Qo o ira na tamata i Jiova, ia era sa biuta na nona vanua.’
21 O koya gona, au na kauaitaka na yacaqu tabu e beca na vuvale ni Isireli ena veimatanitu era lako kina.”+
22 “Ia mo kaya vua na vuvale ni Isireli, ‘Qo na ka e kaya na Turaga Cecere Duadua o Jiova: “Kemuni na vuvale ni Isireli, au sega ni yavala ena vukumuni ia ena vuku ga ni yacaqu tabu oni beca ena veimatanitu oni lako kina.”’+
23 ‘Au na vakarokorokotaka sara ga na yacaqu lagilagi+ e vakarogocataki ena veimatanitu, oni vakarogocataka ena kedra maliwa, era na qai kila na veimatanitu ni o yau o Jiova,’+ e kaya na Turaga Cecere Duadua o Jiova, ‘ni oni vakarokorokotaki au e matadra.
24 Au na kauti kemuni mai na veimatanitu, au na soqoni kemuni mai na veivanua kece meu kauti kemuni ina nomuni vanua.+
25 Au na kureitaka vei kemuni na wai savasava, oni na savasava,+ au na vakasavasavataki kemuni mai na nomuni dukadukali kece+ kei na nomuni matakau vakasisila kece.+
26 Au na solia vei kemuni e dua na yalo vou,+ au na biuta e lomamuni e dua na yalo vou.+ Au na kauta tani mai yagomuni na yalovatu,+ meu solia vei kemuni e dua na yalo malumu.*
27 Au na biuta e lomamuni na yaloqu, au na vakavuna moni muria na noqu ivakaro,+ oni na dei kina, oni na vakayacora na noqu lewa.
28 Oni na qai tiko ena vanua au solia vei ira na tukamuni, oni na noqu tamata, au na nomuni Kalou.’+
29 “‘Au na vakabulai kemuni mai na nomuni dukadukali kece, au na kaciva na covuata meu vakalevutaka, au na sega ni kauta yani vei kemuni na dausiga.+
30 Au na vakalevutaka na vuanikau kei na vuaniqele mera kua ni vakalialiai kemuni tale na veimatanitu ena vuku ni dausiga.+
31 Oni na nanuma na nomuni itovo ca kei na ivakarau ca, oni na vakasisilataki kemuni ena nomuni cala kei na nomuni itovo sevaki.+
32 Ia moni kila qo: Au sega ni cakava qo ena vukumuni,’+ e kaya na Turaga Cecere Duadua o Jiova. ‘Moni madua, moni velavela ena nomuni ivalavala, kemuni na vuvale ni Isireli.’
33 “Qo na ka e kaya na Turaga Cecere Duadua o Jiova: ‘Ena siga au vakasavasavataki kemuni kina mai na nomuni cala kece, au na vakadonuya me tawa tale+ na veikoro, ena tara tale na irusarusa.+
34 Ena tei tale na vanua lala e biu tu mera raica kece na tavali.
35 Era na kaya na lewenivanua: “E vaka na were o Iteni na vanua lala,+ e viribaiti me tawani na koro kece a rusa, e lala, e basu.”+
36 Era na qai kila na vo ni veimatanitu volekati kemuni ni o yau ga o Jiova, au tara na ka e basuraki, au teivaka tale ga na vanua e lala tu. O yau sara ga o Jiova, au tukuna, au cakava.’+
37 “Qo na ka e kaya na Turaga Cecere Duadua o Jiova: ‘Au na vakadonuya mera masuti au na vuvale ni Isireli meu cakava qo vei ira: Au na vakalevutaki ira me vaka na qelenisipi.
38 Me vaka na qelenisipi tabu, me vaka na qelenisipi mai Jerusalemi* ena gauna ni nona soqo,+ era na tawana na koro kece sa rusa tu na isoqosoqo levu ni lewenivanua,+ era na qai kila ni o yau o Jiova.’”
iVakamacala e ra
^ Ipe., “ivovo, o ira na kena vo.”
^ Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
^ Oya, o koya e muria totolo na veidusimaki ni Kalou.
^ Se rawa ni, “Me vaka e vica vata na qelenisipi me cabori e Jerusalemi.”
