Isikeli 48:1-35
48 “Qo na yacadra na yavusa me tekivu ena iyalayala ena vualiku: Na ivotavota nei Tani+ e muria na sala e Eciloni me yaco i Lepo-emaci,*+ e gole i Asaenani kei na iyalayala ni vanua o Tamasiko ena vualiku donui Emaci,+ e kovuta na iyala ni vanua ena tokalau me yaco ina iyala ni vanua ena ra.
2 Na ivotavota nei Aseri+ e tiko ena iyala ni vanua nei Tani, mai na iyala ni vanua ena tokalau me yaco ina iyala ni vanua ena ra.
3 Na ivotavota nei Nafitalai+ e tiko ena iyala ni vanua nei Aseri, mai na iyala ni vanua ena tokalau ina iyala ni vanua ena ra.
4 Na ivotavota nei Manasa+ e tiko ena iyala ni vanua nei Nafitalai, mai na iyala ni vanua ena tokalau ina iyala ni vanua ena ra.
5 Na ivotavota nei Ifireimi e tiko ena iyala ni vanua nei Manasa,+ mai na iyala ni vanua ena tokalau ina iyala ni vanua ena ra.
6 Na ivotavota nei Rupeni e tiko ena iyala ni vanua nei Ifireimi,+ mai na iyala ni vanua ena tokalau ina iyala ni vanua ena ra.
7 Na ivotavota nei Juta e tiko ena iyala ni vanua nei Rupeni,+ mai na iyala ni vanua ena tokalau ina iyala ni vanua ena ra.
8 Ena iyala ni vanua nei Juta, mai na iyala ni vanua ena tokalau ina iyala ni vanua ena ra, moni biuta vakatikitiki na cau e 25,000 na kiupiti* na kena raba,+ me tautauvata kei na balavu ni nodra ivotavota na vo ni yavusa mai na iyala ni vanua ena tokalau ina iyala ni vanua ena ra. Ena tiko e lomadonu na tikina tabu.
9 “Na cau moni biuta vakatikitiki me nei Jiova ena 25,000 na kiupiti na kena balavu, e 10,000 na kena raba.
10 Qo na cau tabu me nodra na bete.+ Ena 25,000 na kiupiti ena vualiku, e 10,000 ena ra, e 10,000 ena tokalau, e 25,000 ena ceva. Ena tiko e lomadonu na tikina tabu i Jiova.
11 Qo ena nodra na bete era vakatabui ena kawa nei Setoki,+ o ira na qarava na nodra itavi vei au, era sega ni gole tani nira gole tani na Isireli kei ira na Livai.+
12 Era na vakaivotavota ena cau ni qele e biu vakatikitiki me ka tabu sara ena nodra iyala ni vanua na Livai.
13 “E toka volekata na nodra iyala ni vanua na bete na nodra ivotavota na Livai, oya e 25,000 na kiupiti na kena balavu, e 10,000 na kena raba. (E 25,000 na kena balavu taucoko, e 10,000 na kena raba.)
14 Mera kua ni volitaka, mera kua ni veisautaka, se solia e dua na ivotavota vinaka ni qele qo, ni ka tabu vei Jiova.
15 “Na vanua e vo oya e 5,000 na kiupiti na kena raba e volekata na iyala ni vanua e 25,000 na kiupiti era na vakayagataka na tiko ena koro+ me tara kina na vale, me vanua veico tale ga. Ena tiko e loma na koro.+
16 Qo na ivakarau ni koro: E 4,500 na kiupiti na iyala ni vanua ena vualiku, e 4,500 na iyala ni vanua ena ceva, e 4,500 na iyala ni vanua ena tokalau, e 4,500 na iyala ni vanua ena ra.
17 Na vanua veico ni koro ena 250 na kiupiti ina vualiku, e 250 ina ceva, e 250 ina tokalau, e 250 ina ra.
18 “Na balavu ni vanua e vo ena tautauvata kei na cau tabu,+ e 10,000 na kiupiti ina tokalau, e 10,000 ina ra. Ena tautauvata kei na cau tabu, na vuaniqele oya ena kedra na qarava tiko na koro.
19 Era na teivaka na yavusa kece ni Isireli era qarava tiko na koro.+
20 “Na cau taucoko e 25,000 na kiupiti, e tautauvata na yasana vava. Moni biuta vakatikitiki qori me cau tabu kei na ivotavota ni koro.
21 “Na ka e vo ena yasa ruarua ni cau tabu kei na ivotavota ni koro ena nona na turaga.+ Ena donuya na iyala ni vanua e 25,000 na kiupiti ina tokalau kei na ra ni cau. Ena tautauvata kei na iyalayala ruarua, ena nona na turaga. Ena tiko e lomadonu na cau tabu kei na tikina tabu ni valenisoro.
22 “Na nodra ivotavota na Livai kei na ivotavota ni koro ena tiko ena loma ni nona ivotavota na turaga. Na nona vanua na turaga ena tiko ena maliwa ni iyala ni vanua nei Juta+ kei na iyala ni vanua nei Penijamini.
23 “O ira na vo ni yavusa, na ivotavota nei Penijamini e tekivu ena iyala ni vanua ena tokalau me yaco ina iyala ni vanua ena ra.+
24 Na ivotavota nei Simioni e volekata na iyala ni vanua nei Penijamini,+ oya ena iyala ni vanua ena tokalau me yaco ina iyala ni vanua ena ra.
25 Na ivotavota nei Isakari+ e volekata na iyala ni vanua nei Simioni, oya ena iyala ni vanua ena tokalau me yaco ina iyala ni vanua ena ra.
26 Na ivotavota nei Sepuloni e volekata na iyala ni vanua nei Isakari,+ oya ena iyala ni vanua ena tokalau me yaco ina iyala ni vanua ena ra.+
27 Na ivotavota nei Kata e volekata na iyala ni vanua nei Sepuloni,+ oya ena iyala ni vanua ena tokalau me yaco ina iyala ni vanua ena ra.
28 Na iyala ni vanua nei Kata ena ceva ena tekivu e Tema+ me yaco ina wai e Meripaci-ketesa,+ e lako yani ina Uciwai*+ me yaco sara ina Wasa Levu.*
29 “Qo na vanua moni vota me nodra ivotavota na yavusa e Isireli,+ qo ena nodra ivotavota,”+ e kaya na Turaga Cecere Duadua o Jiova.
30 “Qo na icurucuru i tuba ena koro: Ena 4,500 na kiupiti me tekivu ena yasana ena vualiku.+
31 na matamatanikoro kece ena vakayacani vei ira na yavusa ni Isireli. Na tolu na matamata ena vualiku, e dua na matamata nei Rupeni, e dua na matamata nei Juta, kei na dua na matamata nei Livai.
32 Na yasana ena tokalau ena 4,500 na kiupiti na kena balavu, e tiko kina e tolu na matamata, e dua na matamata nei Josefa, e dua na matamata nei Penijamini, kei na dua na matamata nei Tani.
33 Na yasana ena ceva ena 4,500 na kiupiti, e tolu na matamata, e dua na matamata nei Simioni, e dua na matamata nei Isakari, e dua na matamata nei Sepuloni.
34 Na yasana ena ra ena 4,500 na kiupiti na kena balavu, e tolu na kena matamata, e dua na matamata nei Kata, e dua na matamata nei Aseri, e dua na matamata nei Nafitalai.
35 “E 18,000 na kiupiti na yasana taucoko. E vakayacani na koro ena siga oya me Tiko e Kea o Jiova.”*+
iVakamacala e ra
^ Se “na icurucuru i Emaci.”
^ Oya na Mediterranean.
^ Oya na Waimaca o Ijipita.
^ “Jiova-sama.”
