Vola o Joni 6:1-71
6 Oti ya sa qai lako o Jisu ina tai ni Wasa* o Kalili se o Taiperia.+
2 Era muri koya tiko ga e dua na ilala levu+ nira raica na nona cakamana, ya na nona vakabulai ira na tauvimate.+
3 Mani cabeta o Jisu e dua na ulunivanua qai lai dabe toka kina kei ratou na nona tisaipeli.
4 Sa voleka sara tiko nodra soqo ni Lakosivia+ na Jiu.
5 Ni tacake o Jisu, e raica e dua na ilala levu nira lako tiko yani vua, mani kaya vei Filipi: “Ena lai voli mai vei na madrai mera kania o ira qo?”+
6 Ia e tukuna ya me vakatovolei koya kina, ni kila tiko o Jisu na ka ena vakarau cakava.
7 E sauma o Filipi: “Ke ra vakalalai mada ga, ena sega ni rauti ira na madrai e voli ena ruanadrau na dinari.”*
8 E qai tukuna vua e dua nona tisaipeli, o Adriu na taci Saimoni Pita:
9 “E tiko qo e dua na gonetagane e tiko vua e lima na madrai* kei na rua na ika lalai. Ia ena rauti ira vakacava na ilala vakaitamera qo?”+
10 E kaya o Jisu: “Tukuna vei ira mera dabe.” E vanua veico na vanua ya, era mani dabe kece sara e rauta ni 5,000 na tagane.+
11 E taura na madrai o Jisu, e vakavinavinakataka qai vota vei ira na sa dabe tu, vota tale ga na ika lalai ena kena levu era vinakata.
12 Ia nira sa mamau kece e kaya o Jisu vei ratou nona tisaipeli: “Dou kumuna mai na tikitikina sa vo me kua ni maumau.”
13 Eratou mani kumuna na tikitiki ni lima na madrai sa vo mai vei ira na kana, eratou vakasinaita e 12 na basikete.
14 Nira raica na lewenivanua na nona cakamana era kaya: “Qo dina na Parofita e dodonu me lako mai vuravura.”+
15 Ni kila o Jisu nira vakarau lako mai mera vesuki koya, mera buli koya me tui, e lako+ duadua tale yani ina ulunivanua.+
16 Ni sa karobo eratou lako sobu i baravi na nona tisaipeli,+
17 eratou vodo sara i waqa me ratou soko i tai, i Kapenaumi. Sa buto mai na vanua, se bera tiko ga yani vei ratou o Jisu.+
18 E voravora tale ga na wasawasa ni kaukaua na liwa ni cagi.+
19 Ia ni sa rauta e tolu se va na maile* nodratou voce, eratou raici Jisu ni taubale tiko yani e delaniwai, qai volekata yani na waqa, dua na ka nodratou rere.
20 Ia e kaya vei ratou: “Dou kua ni rere! O yau ga qo.”+
21 Eratou mani vakavodoki koya sara i waqa, sa voleka tale ga ni kele yani na waqa ena vanua eratou lako tiko kina.+
22 Ena siga tarava era raica na ilala levu era tu mai tai ni kele tu ga e dua na waqa lailai, e sega tale ga ni vodo vata kei ratou na nona tisaipeli o Jisu, ia eratou soko ga vakataki ratou.
23 Ia era kele yani eso na waqa ni Taiperia volekata na vanua era kana madrai kina ni vakavinavinakataka oti na Turaga.
24 Nira sega ni raici Jisu se o iratou na tisaipeli na ilala levu ya, era mani vodoka nodra waqa mera lai vaqarai Jisu i Kapenaumi.
25 Nira raici koya e tai adua, era kaya vua: “Rapai,+ o lako mai ena gauna cava?”
26 E kaya vei ira o Jisu: “Au tukuna vakadodonu vei kemuni, oni sega ni vaqarai au ena nomuni raica na cakamana, baleta ga na nomuni kania na madrai oni qai mamau kina.+
27 Ni kua ni cakacakataka na kakana e ca rawarawa, na kakana ga e tudei me rawati kina na bula tawamudu,+ ena solia vei kemuni na Luve ni tamata, ni o koya ga qo e vakadonui koya na Kalou o Tamana.”+
28 Era mani kaya vua: “Na cava me keimami cakava, me keimami vakayacora kina na cakacaka e vinakata na Kalou?”
29 E sauma vei ira o Jisu: “Qo na cakacaka e vinakata na Kalou, moni vakaraitaka nomuni vakabauti koya e tala mai.”+
30 Era qai kaya vua: “Na cakamana+ cava o na vakaraitaka me keimami raica qai vakabauti kemuni kina? Na cakacaka cava oni na cakava?
31 Era kania na mana ena vanua talasiga na tukai keimami,+ me vaka ga e volai: ‘E solia vei ira na madrai mai lomalagi mera kania.’”+
32 E qai kaya vei ira o Jisu: “Au tukuna vakadodonu vei kemuni, e sega ni solia vei kemuni o Mosese na madrai mai lomalagi, o Tamaqu ga e solia vei kemuni na madrai dina mai lomalagi.
33 Ni madrai e solia na Kalou o koya e lako sobu mai lomalagi qai solia na bula i vuravura.”
34 Era mani kaya vua: “Turaga, moni solia tiko ga mai vei keimami na madrai qo.”
35 E kaya vei ira o Jisu: “O yau na madrai ni bula. O koya ga e lako mai vei au ena sega sara ni viakana, o koya tale ga e vakaraitaka nona vakabauti au ena sega sara ni viagunu.+
36 Ia au tukuna vei kemuni, oni sa raici au, oni sega ga ni vakabauta.+
37 O ira kece e solia vei au o Tamaqu era na lako mai vei au, o koya tale ga e lako mai vei au, au na sega sara ni vakatala tani.+
38 Niu lako sobu mai lomalagi+ meu cakava na loma i koya e talai au mai, sega ni lomaqu ga.+
39 Qo na loma i koya e talai au mai, meu kua ni vakayalia e dua vei ira e solia mai vei au, ia meu vakaturi+ ira ena iotioti ni siga.
40 Ni qo na loma i Tamaqu, me bula tawamudu+ o koya yadua e raica na Luvena qai vakaraitaka ni vakabauti koya, au na vakaturi+ koya ena iotioti ni siga.”
41 Era mani vosakudrukudrutaki koya na Jiu ni tukuna: “O yau na madrai e lako sobu mai lomalagi.”+
42 Era qai veikayaka: “Sega ni o Jisu ga qo na luvei Josefa? Eda kila vinaka na tamana kei na tinana.+ E qai kaya ga vakacava, ‘Au lako sobu mai lomalagi’?”
43 E sauma vei ira o Jisu: “Ni kua ni vosakudrukudru.
44 Ena sega ni lako mai vei au e dua ke sega ni vagolei koya mai+ o Tamaqu e talai au mai, au na qai vakaturi koya ena iotioti ni siga.+
45 Era vola na Parofita, ‘Ena vakavulici ira kece o Jiova.’*+ O ira kece era rogoci Tamaqu ra qai vuli vua, era lako mai vei au.
46 Se sega ni dua e raica na Tamaqu,+ o koya ga e lako mai vua na Kalou sa raica na Tamaqu.+
47 Au tukuna vakadodonu vei kemuni, o koya e vakabauta ena bula tawamudu.+
48 “O yau na madrai ni bula.+
49 Era kania na mana na tukamuni ena vanua talasiga, ia era sa mate tale.+
50 Qo na madrai e lako sobu mai lomalagi, o koya e kania ena sega ni mate.
51 O yau na madrai bula e lako sobu mai lomalagi. Ke dua e kania na madrai qo ena bula tawamudu, na madrai au na solia na lewequ ga, me bula kina o vuravura.”+
52 Era qai vosakudrukudru na Jiu, era kaya: “Ena solia vakacava na lewena o ka qo meda kania?”
53 E mani tukuna vei ira o Jisu: “Au tukuna vakadodonu vei kemuni, ke oni sega ni kania na lewe ni Luve ni tamata, moni gunuva tale ga na nona dra oni na sega ni bula.+
54 O koya e kania na lewequ, e gunuva tale ga noqu dra ena bula tawamudu, au na vakaturi+ koya ena iotioti ni siga,
55 ni kakana dina na lewequ qai ka ni gunu dina na noqu dra.
56 O koya e kania na lewequ e gunuva tale ga noqu dra e duavata tiko ga kei au, au duavata tale ga kei koya.+
57 Me vaka ni talai au mai o Tamaqu e bula tiko, au bula tale ga ena vuku i Tamaqu, o koya e kania na lewequ, ena bula tale ga ena vukuqu.+
58 Qo na madrai e lako sobu mai lomalagi. E sega ni kena era kania na tukamuni ra qai mate tale. O koya e kania na madrai qo ena bula tawamudu.”+
59 A tukuna na veika qo ni veivakavulici tiko ena valenisoro e Kapenaumi.
60 Nira rogoca gona qo e levu nona tisaipeli, era kaya: “E dredre me vakabauti na vosa qo, o cei ena muria?”
61 Ni kila o Jisu nira vosakudrukudrutaka qo na nona tisaipeli, e kaya vei ira: “Oni tarabe ena ka qo?
62 Ena vakacava ke oni raica na Luve ni tamata ni lako cake ena vanua a tiko kina e liu?+
63 E vu ni bula+ na yalo ni Kalou, na ka e cakava na tamata e tawayaga ga. Na ka au tukuna vei kemuni e ka vakayalo, e vu ni bula tale ga.+
64 Ia eso vei kemuni era sega ni vakabauta.” Mai na ivakatekivu e kilai ira vinaka na sega ni vakabauta o Jisu, e kilai koya tale ga ena soli koya yani.+
65 E tomana: “Qo na vuna au tukuna kina vei kemuni, ena sega ni lako mai vei au e dua ke sega ni vakadonuya o Tamaqu.”+
66 Ena vuku ni ka qo era suka tale+ kina e levu nona tisaipeli, era sega tale ni qai lako vata kei koya.
67 Mani kaya vei ratou na le Tinikarua o Jisu: “Dou via lako tale ga?”
68 E sauma o Saimoni Pita: “Turaga, me keitou qai lako tale vei cei?+ Na nomuni vosa ga e vosa ni bula tawamudu,+
69 keitou vakabauta, keitou kila tale ga ni o kemuni na Yalosavasava ni Kalou.”+
70 E kaya vei ratou o Jisu: “Au a digitaki kemudou na le tinikarua, se sega?+ Ia e dua vei kemudou e dau vakaucaca.”*+
71 A tukuni Jutasa tiko na luvei Saimoni Isikarioti, ni na soli koya yani, e dua vei ratou na le Tinikarua.+
