Jope 2:1-13
2 Sa qai yaco mai na siga mera vakaraitaki ira kina na luve ni Kalou dina*+ ena mata i Jiova,+ bau lai duri tale tu ga o Setani ena kedra maliwa ena mata i Jiova.+
2 E qai tarogi Setani o Jiova: “O lako mai vei?” E kaya vei Jiova o Setani: “Au veilakoyaki qai gade voli mai vuravura.”+
3 E qai tukuna vei Setani o Jiova: “O vakasamataki* Jope tiko na noqu dauveiqaravi? E sega ni dua e vuravura e tautauvata kei koya. E turaga yalododonu ni dau yalodina,*+ e rerevaka tiko ga na Kalou qai sega ni dau goleva na ca. E se taura matua tiko ga nona yalodina,+ veitalia sara nomu via uqeti au meu vakarusai* koya+ ni sega na nona cala.”
4 E kaya vei Jiova o Setani: “Me isau ni kulina na kulina, ena solia na tamata na ka kece e tu vua me bula kina.
5 Ia qo, dodoka mada na ligamuni qai tara sara na suina kei na lewena, ena vosavakacacataki kemuni e matamuni.”+
6 E qai kaya vei Setani o Jiova: “Raica! Sa tu qori e ligamu* o koya! Mo kua ga ni kauta tani na nona bula!”
7 E mani biubiu mai na mata i Jiova o Setani qai vakavuna me tauvi Jope na bo mosimosi,*+ mai na qeteqeteniyavana yaco sara i buradelana.
8 E qai taura o Jope e dua na ivorovoro ni iyaya qele me kari koya kina qai lai dabe toka ena dravusa.+
9 Kena itinitini, qai tukuna vua o watina: “O se taura matua tiko ga nomu yalodina? Vosavakacacataka na Kalou mo mate!”
10 E qai kaya vua o Jope: “O vosa sara tu ga me vaka na yalewa yalowai. E cava, meda sa ciqoma tu ga na ka vinaka mai vua na Kalou dina, qai sega na ka ca?”+ Ena ka kece qo, e sega ni valavala ca o Jope ena tebenigusuna.+
11 Eratou rogoca e tolu na itokani i Jope na leqa kece e bikai koya tu, eratou biubiu sara mai na nodratou dui vanua—o Elifasi+ na kai Temani, o Pilitati+ na kawa i Sua,+ kei Sofa+ na kai Neama. Eratou lai sota me ratou duavata kei Jope ena rarawa, me ratou vakacegui koya tale ga.
12 Ni ratou raici koya tu yani vakayawa, eratou sega tale ni kilai koya. Eratou tagi vakadomoilevu ratou qai dresulaka na nodratou isulu, ratou viritaka i macawa na kuvuniqele, e uludratou tale ga.+
13 Eratou mani dabe kei koya ena qele me siga vitu qai bogi vitu. E sega ni dua e cavuta vua e dua na vosa, ni ratou raica ni sa mosi vakalevu.+
iVakamacala e ra
^ Dua na ivosavosa vakaIperiu e dusi ira na agilosi era luve ni Kalou.
^ Ipe., “katona e lomamu.”
^ Se “sega ni cala qai turaga yalododonu.”
^ Ipe., “tilomi.”
^ Se “tu ena nomu lewa.”
^ Se “na vidikoso.”
