Taniela 3:1-30
-
iVakatakarakara koula nei Tui Nepukanesa (1-7)
-
Vakarota me sokaloutaki na ivakatakarakara (4-6)
-
-
Beitaki na tolu na Iperiu ni ratou talaidredre (8-18)
-
“Keitou na sega ni qarava na nomuni kalou” (18)
-
-
Biu ena lovo bukawaqa (19-23)
-
Vakabulai vakacakamana mai na bukawaqa (24-27)
-
Vakacaucautaki na nodratou Kalou na Iperiu (28-30)
3 E bulia o Nepukanesa na tui e dua na ivakatakarakara* koula e 60 na kiupiti* na kena cere, e 6 na kiupiti* na kena raba. E vakaduria o koya ena buca o Tura ena yasana o Papiloni.
2 E talatala o Tui Nepukanesa mera soqoni vata na vakailesilesi liu ni yasana, o ira na iliuliu, o ira na kovana, o ira na daunivakasala, o ira na dauniyau, o ira na turaganilewa, o ira na vakailesilesi ni mataveilewai, kei ira kece na iliuliu ni veiyasana mera lako yani ina soqo ni kena sevutaki na ivakatakarakara e vakaduria o Tui Nepukanesa.
3 Era mani soqoni yani na vakailesilesi liu ni yasana, o ira na iliuliu, o ira na kovana, o ira na daunivakasala, o ira na dauniyau, o ira na turaganilewa, o ira na vakailesilesi ni mataveilewai, kei ira kece na iliuliu ni veiyasana ena kena sevutaki na ivakatakarakara e vakaduria o Tui Nepukanesa. Era lai duri ena mata ni ivakatakarakara e vakaduria o Nepukanesa.
4 E kacivaka ena domolevu na daukacikacivaki: “Oni vakaroti na lewe ni veivanua, na veimatatamata, kei na duivosavosa,
5 ni oni rogoca ga na rorogo ni davui,* na paipi, na sica, na api lailai, na ivakatagi vakawa, na pakipaipi, kei na vo ni iyaya kece ni vakatagi, moni tekicuva moni sokaloutaka na ivakatakarakara koula e vakaduria o Tui Nepukanesa.
6 O koya e sega ni tekicuva me sokaloutaka, ena biu sara ina lovo bukawaqa.”+
7 Ia nira rogoca ga na lewe ni veivanua kece na rorogo ni davui, na paipi, na sica, na api lailai, na ivakatagi vakawa, na pakipaipi, kei na vo ni iyaya kece ni vakatagi, era tekicuva kece na lewe ni veivanua, na veimatatamata, kei na duivosavosa mera sokaloutaka na ivakatakarakara koula e vakaduria o Tui Nepukanesa.
8 Era mani lako yani ena gauna oya eso na Kalitia mera beitaki* ratou na Jiu.
9 Era kaya vei Tui Nepukanesa: “Moni bula balavu mada ga na tui.
10 Oni a vakarota na tui mera tekicuva na tamata kece mera sokaloutaka na ivakatakarakara koula nira rogoca ga na rorogo ni davui, na paipi, na sica, na api lailai, na ivakatagi vakawa, na pakipaipi, kei na vo ni iyaya kece ni vakatagi,
11 o koya e sega ni tekicuva me sokaloutaka, me biu ina lovo bukawaqa.+
12 Ia o ratou na Jiu oni lesia me ratou lewa na ka me baleta na yasana o Papiloni: o Setareki, o Mesake, kei Apeteniko.+ O ratou na tagane qo eratou beci kemuni na tui. Eratou sega ni qarava na nomuni kalou, eratou sega ni via sokaloutaka na ivakatakarakara koula oni vakaduria.”
13 E waqa sara ga na cudru nei Nepukanesa, e vakarota me kau yani o Setareki, o Mesake, kei Apeteniko. Eratou kau sara yani na tagane qo vua na tui.
14 E kaya vei ratou o Nepukanesa: “I Setareki, Mesake, kei Apeteniko, e dina oya, ni dou sega ni qarava na noqu kalou+ dou qai bese ni sokaloutaka na ivakatakarakara koula au vakaduria?
15 Ia qo ni dou rogoca na rorogo ni davui, na paipi, na sica, na api lailai, na ivakatagi vakawa, na pakipaipi, kei na vo ni iyaya kece ni vakatagi, ke dou via tekicuva mo dou sokaloutaka na ivakatakarakara au bulia, ena vinaka sara oya. Ke dou bese ni sokaloutaka, dou na biu sara ina lovo bukawaqa. O cei na kalou me vakabulai kemudou mai ligaqu?”+
16 Eratou kaya vua na tui o Setareki, o Mesake, kei Apeteniko: “Kemuni Nepukanesa, e sega ni yaga me keitou tukuna tale vei kemuni e dua na ka me baleta na ka qo.
17 Ke va qori kemuni na tui, ena vakabulai keitou mai na lovo bukawaqa na Kalou keitou qarava tiko, ena vakabulai keitou tale ga mai ligamuni.+
18 Ia ke sega kemuni na tui, moni kila tiko ni keitou na sega ni qarava na nomuni kalou, se sokaloutaka na ivakatakarakara koula oni vakaduria.”+
19 E qai cudruvi Setareki vakalevu, Mesake, kei Apeteniko o Nepukanesa, e veisau na irairai ni matana vei ratou mani vakarota me vakavitutaki na katakata ni lovo me sivia na ivakarau ni kena katakata.
20 E vakarota o koya eso na tagane qaqa era lewe ni nona mataivalu mera vesuki Setareki, Mesake, kei Apeteniko me ratou biu ina lovo bukawaqa.
21 Eratou vesu na tagane qo ni ratou dara tu ga na nodratou isulu balavu, na nodratou isulu, na nodratou isala, kei na so tale na nodratou isulu, ratou qai biu ina lovo bukawaqa.
22 Ni kaukaua na ivakaro ni tui qai vakatakatai vakasivia na lovo, eratou mani mate ena yameyame ni bukawaqa na tagane eratou kauti Setareki yani, Mesake, kei Apeteniko.
23 Ia o ratou na tolu na tagane qo, o Setareki, Mesake, kei Apeteniko eratou lutu yani ena loma ni lovo bukawaqa ni ratou vesu tu.
24 E qai domobula o Tui Nepukanesa, e duri vakasauri, e kaya vei ira na nona vakailesilesi liu: “Eda vesuka e tolu na tagane da qai biuti ratou ena loma ni bukawaqa?” Era kaya vua na tui: “Io, kemuni na tui.”
25 E kaya: “Raica! Au raica e va na tamata ni ratou veilakoyaki tiko ena loma ni bukawaqa, eratou sega ni vesu, eratou sega ni mavoa, na kena ikava e vaka na irairai ni luvedra na kalou.”
26 E toro yani o Nepukanesa ena katuba ni lovo bukawaqa, e kaya: “I Setareki, Mesake, kei Apeteniko, o kemudou na tamata ni Kalou Cecere Duadua,+ dou lako mai tuba, dou lako mai ke!” Eratou biuta mai na loma ni bukawaqa o Setareki, o Mesake, kei Apeteniko.
27 Era raici ratou na tagane qo na vakailesilesi liu ni yasana, o ira na iliuliu, o ira na kovana, kei ira na vakailesilesi lelevu ni tui era soqo vata e kea,+ ni sega ni kama na yagodratou na tagane qo,+ e sega ni kama e dua na drauniuludratou, e sega mada ga ni veisau na irairai ni nodratou isulu balavu, eratou sega tale ga ni boikamakama.
28 E mani kaya o Nepukanesa: “Me vakacaucautaki na Kalou nei Setareki, Mesake, kei Apeteniko+ ni tala mai na nona agilosi me vakabulai ratou na nona tamata. Eratou nuitaki koya, eratou saqata na vosa ni tui, eratou qai bolemate ni ratou sega ni via qarava se sokaloutaka e dua tale na kalou, na nodratou Kalou+ duadua ga.
29 Au vakatura gona e dua na lewa, ni dua na matatamata, lewe ni veimatanitu, se duivosavosa e tukuna e dua na ka me saqata na Kalou i Setareki, Mesake, kei Apeteniko me musumusulaki, me vukici tale ga na nona vale me valelailai* ni lewenivanua, ni sega tale ni dua na kalou e veivakabulai me vakataki koya qo.”+
30 E qai vakacerecerei Setareki, Mesake, kei Apeteniko na tui ena yasana o Papiloni.+
iVakamacala e ra
^ Se “matakau.”
^ Ipe., “ileu.”
^ Se “vakaucacataki.”
^ Se rawa ni, “ibenubenu, ibinibini denimanumanu.”
