Vakatakila e Vola o Joni 3:1-22
3 “Vola vua na agilosi ni ivavakoso e Sariti: Qo na ka e tukuna o koya e tiko vua e vitu na yalo ni Kalou+ kei na vitu na kalokalo:+ ‘Au kila na nomu cakacaka, ni yacamu wale ga na bula, ia o mate.+
2 Mo yadra tiko,+ mo vakaukauataka tale ga na ka sa vakarau mate, niu raica ni o sega ni vakacavara vinaka na nomu cakacaka ena mata ni noqu Kalou.
3 O koya gona, mo nanuma tiko na ka e soli vei iko kei na ka o rogoca, mo muria tiko ga, mo veivutuni.+ Ia ke o sega ni yadra, au na lako yani me vaka na daubutako,+ o na sega sara ga ni kila na aua au na lako yani kina.+
4 “‘Ia era tiko qori e Sariti eso era sega ni vakadukadukalitaka na nodra isulu,+ era na lako vata kei au ena isulu vulavula+ ni ganiti ira.
5 O koya e qaqa,+ ena vakaisulu ena isulu vulavula,+ au na sega sara ga ni bokoca na yacana ena ivola ni bula,+ au na tukuna na yacana vei Tamaqu, vei ira tale ga na nona agilosi.+
6 O koya e vakadaligana me rogoca sara na ka e tukuna na yalo tabu ina ivavakoso.’
7 “Vola vua na agilosi ni ivavakoso e Filatelifia: Qo na ka e tukuna o koya e savasava,+ o koya e dina,+ o koya e tiko vua na ki i Tevita,+ e dolava kina na katuba ena sega ni dua e sogota, qai sogota me kua ni dua e dolava:
8 ‘Au kila na nomu cakacaka—raica! Au sa dolava tu qo e matamu e dua na katuba,+ e sega ni dua e sogota rawa. Au kila ni tiko vakalailai vei iko na kaukaua, o a muria na noqu vosa, o sega ni cakitaka na yacaqu.
9 Raica! Au na vakaroti ira na ilawalawa* i Setani era kaya nira Jiu, ia era sega,+ era lasulasu ga—raica! Au na vakatalai ira yani mera cuva e yavamu, mera kila tale ga niu lomani iko.
10 Ni o muria na ka o rogoca me baleta noqu vosota,+ au na maroroi iko ena gauna ni veivakatovolei+ ena vakilai e vuravura taucoko, mera vakatovolei kina na tiko e vuravura.
11 Au na lako totolo yani.+ Mo taura matua na ka sa tu vei iko, me kua ni dua e taura na nomu isala.+
12 “‘O koya e qaqa—au na lesi koya me duru ena valenisoro ni noqu Kalou, ena sega sara ga ni lako tani mai kina, au na qai vola vua na yaca ni noqu Kalou+ kei na yaca i Jerusalemi Vou+ na nona koro na noqu Kalou, e lako sobu mai lomalagi, kei na yacaqu vou.+
13 O koya e vakadaligana me rogoca sara na ka e tukuna na yalo tabu ina ivavakoso.’
14 “Vola vua na agilosi ni ivavakoso e Leotisea:+ Qo na ka e tukuna na Emeni,+ na ivakadinadina+ yalodina e daudina tale ga,+ na imatai ni ibulibuli ni Kalou:+
15 ‘Au kila na nomu cakacaka, ni o sega ni batabata se katakata. Au diva mo batabata se mo katakata.
16 O koya gona, ni o katakata vakalailai ga o qai sega ni katakata+ se batabata,+ au na luaraki iko mai gusuqu.
17 Ni o kaya, “Au vutuniyau+ qai taukena e levu na iyau, au sega sara ga ni gadreva e dua na ka,” ia o sega ni kila ni o macawa, o vakaloloma, o dravudravua, o mataboko, o luvawale tale ga,
18 au vakasalataki iko mo volia vei au na koula e vakasavasavataki ena bukawaqa mo vutuniyau kina, mo volia tale ga na isulu vulavula mo tokara me kua ni laurai na nomu madua ni o luvawale,+ kei na iboronimata mo boroya kina na matamu+ mo rai rawa.+
19 “‘O ira kece au lomana au vunauca, au vakadodonutaka tale ga.+ O koya gona, mo gumatua qai veivutuni.+
20 Raica! Au sa duri tu e katuba, au tukituki tiko. Ke dua e rogoca na domoqu qai dolava na katuba, au na curu i nona vale, au na vakayakavi vata kei koya, o koya vata kei au.
21 O koya e qaqa,+ au na vakadonuya me dabe vata kei au ena noqu idabedabe vakaturaga,+ me vaka ga niu qaqa au qai dabe+ vata kei Tamaqu ena nona idabedabe vakaturaga.
22 O koya e vakadaligana me rogoca sara na ka e tukuna na yalo tabu ina ivavakoso.’”
iVakamacala e ra
^ Kir., “valenilotu.”
