Vakamacalataka mada nomu isususu.

E dau cula ivava o tamaqu, o tinaqu e dau cakacaka ena iteitei. Ia au a vinakata meu dua na saenitisi. Dua na ka na noqu dau qoroya na totoka ni senikau, manumanuvuka kei na manumanu lalai era tu e yasa ni neitou vale. Au nanuma kina ni bulia na ka kece qori e dua e vuku cake vei keda na tamata.

O dau vakabauta ni tiko na Dauveibuli?

Sega. Ia au se tekivu lomatarotarotaka na ka me baleta na Kalou niu se gone. A mate vakasauri o tamaqu ena mateniuto, au mani vaqaqa, ‘Na cava e vakalaiva kina na rarawa kei na mate o koya a Bulia na ka totoka kece ga?’

A saumi na nomu taro ena veika vakasaenisi o vulica?

Sega. Niu sa dua na saenitisi e dau dikeva na veika bula, au tekivu dikeva na ka e baleta na mate​—na cakacaka ni nodra mate kei na nodra buli ena kena gauna donu na sela ni yagoda. Qori e duidui sara mai na kena mate na sela bulabula ni yago qai dau vakavuna na vuvuce ni yago kei na kena sega ni mavo rawa na mavoa. Ena vica ga na yabaki sa oti, era sega sara ni kauaitaka vakabibi na saenitisi na cakacaka ni sela qori, dina ga ni bibi ena noda bula.

Ena sala cava e bibi kina na nodra mate kei na nodra buli na sela ena kena gauna donu?

E buli na yagoda mai na vica vata na tirilioni na sela somidi. E dodonu mera mate kece na sela qori qai sosomitaki. E duidui na balavu ni gauna era bula kina na sela yadua; eso era sosomitaki ni oti ga e vica na macawa, eso tale e sosomitaki ni oti e vica na yabaki. Ena vinakati gona e dua na ituvatuva vereverea e yagoda me rawa ni veiraurau tiko ga kina na cakacaka ni nodra mate kei na nodra buli na sela vou ena kena gauna donu.

 Na leqa cava e rawa ni yaco?

E laurai ena so na vakadidike, ni gauna e sega ni mate kina na sela ena kena gauna donu, ena rawa ni vakavuna na kenisa se dua na mataqali sasala ni yago na rheumatoid arthritis. Ena yasana adua, ke ra mate na sela ni bera na gauna mera mate kina, ena rawa ni vakavuna na mate na Parkinson se na Alzheimer. Noqu vakadidike e okati tale ga kina na kena vaqarai na sala mera wali kina na mate qori.

Na cava o dikeva rawa ena nomu vulica na nodra mate kei na nodra buli na sela?

Meu tukuna na ka dina e vereverea sara ga vei au. Na cakacaka vakatubuqoroqoro qo e dusia ni o koya e bulia e vinakata sara ga meda bulabula vinaka. Ia au se lomatarotarotaka ga, Na cava eda rarawa kina da qai mate? Au se sega ni kunea na kena isau.

O vakadeitaka ni dua e bulia na cakacaka ni nodra mate kei na nodra buli na sela ena kena gauna donu?

Io. Au qoroya sara ga na vereverea ni kena cakacaka na noda sela, ia na vakatubuqoroqoro ni kena cakacaka e vakaraitaka na vakasakiti ni vuku. Au vakabauta ni qo na vuku ni Kalou. Au vakayagataka na iloilo kaukaua e dau vakalevutaka na ka, meu vakadikeva e levu na ituvatuva vereverea ni yagoda e vukea me vakayacori kina na cakacaka qori. Eso na ituvatuva vereverea qori e rawa ni vakavuna mera mate totolo na sela ke gadrevi. Koya gona, na sela era na vakamatei ira ga vakataki ira. E buli vakamatau na nodra cakacaka na sela, qai vakatubuqoroqoro dina.

O lomatarotarotaka tu e liu na ka me baleta na Kalou kei na veika rarawa. O qai kila vakacava na kena isau?

E rua na itabagone iVakadinadina i Jiova erau gole yani e vale ena 1991, au mani tarogi rau se cava eda mate kina. Erau vakaraitaka vei au na kena isau mai na iVolatabu: “Ena vuku ni dua ga na tamata e curu kina i vuravura na ivalavala ca kei na mate ena vuku ni ivalavala ca.” (Roma 5:12) Ke a talairawarawa vua na Kalou na imatai ni tagane, ke a rawa ni bula tawamudu. Au liaca ni qori e salasalavata sara ga kei na ka au vulica ena noqu vakadidike. Sa qai matata vei au ni a sega ni inaki ni Kalou me mate na tamata. E voleka ni sela kece ni yagoda e dau sosomitaki, au kila kina ni rawa nida bula tawamudu.

O vakadeitaka vakacava ni Vosa ni Kalou na iVolatabu?

Au vulica na ka e tukuna na iVolatabu me baleta na Kalou ena Same 139:16: “Ni’u sa vaka na vulovulo wale sa kunei au na matamuni, ia sa volai kece sara na tikiqu e na nomuni vola.” Niu dau dikeva na veika bula, au vulica na itukutuku matailalai ni noda bula e volai tu ena noda sela. A kila vakacava na daunisame ni volai tu na keda itukutuku? Na levu ga ni noqu vulica na iVolatabu, au sa qai vakadeitaka kina ni uqeta sara ga na Kalou na kena volai.

O vukei vakacava mo kila na ka e vakavulica na iVolatabu?

A sureti au e dua na iVakadinadina i Jiova me vakavulici au ena iVolatabu. Au sa qai kila na vuna e vakalaiva kina na Kalou meda sotava na rarawa. Au vulica tale ga, me vaka e tukuna na iVolatabu, ni sa nakita tu na Kalou me na ‘vakaotia vakadua na mate.’ (Aisea 25:8) Ena rawarawa sara vua na Dauveibuli me veisautaka na ituvatuva vakasakiti ni yagoda me uasivi meda rawa ni marautaka kina na bula tawamudu.

O vakayagataka vakacava na ka o vulica mai na iVolatabu mo vukei ira kina eso tale?

Au sa dua na iVakadinadina i Jiova ena 1995, me tekivu mai na gauna ya au saga meu dau wasea vei ira kece au sotava na ka au vulica mai na iVolatabu. Kena ivakaraitaki, dua na noqu itokani vakacakacaka a rarawataka sara ga na nona vakamatei koya ga o ganena. E vakavuvulitaki ena nona lotu, ni Kalou ena sega ni vosoti ira era vakamatei ira ga. Ia au vakaraitaka vua na inuinui ni veivakaturi e volai tu ena iVolatabu. (Joni 5:​28, 29) A lomavakacegu sara ga ni kila ni kauaitaki keda na Dauveibuli. Ena ituvaki va qori, au raica kina ni kena wasei na ka dina ena iVolatabu vei ira eso tale e veivakacegui sara vakalevu mai na noqu dauveivosakitaka na veika vakasaenisi!