NA RAI NI IVOLATABU
Yago ni Kalou
E yago vakacava na Kalou?
“E yalo na Kalou.” —Joni 4:24.
KA E KAYA NA IVOLATABU E tukuni ena iVolatabu ni yalo na Kalou. (2 Korinica 3:17)
E cecere sara o koya, eda na sega ni rawa ni vakatauvatani keda kei koya. E kaya na 1 Timoci 1:17 ni “Tui ni veitabagauna kece, o koya e sega ni rusa rawa, e tawarairai.” E tukuna tale ga na iVolatabu: “E sega ni dua e se bau raica na Kalou ena dua na gauna.”—1 Joni 4:12.
Ni sa rui cecere na Dauveibuli eda na sega ni kila rawa na kena irairai. E kaya na Aisea 40:18: “Ia dou na qai vakatautauvatataka na Kalou kei cei? se dou na vakatauvatani koya kei na cava?” Na vakasakiti mada ga ni lomalagi kei vuravura e sega ni vakatauvatani rawa kei na Kalou Kaukaua Duadua.—Aisea 40:22, 26.
Ia e tiko eso na ibulibuli vuku era rawa ni raica na Kalou, ra vosa tale ga vua. E rawa vakacava qori? Nira kabula tale ga vakayalo, ra qai tiko mai lomalagi. (1 Tui 22:21; Iperiu 1:7) E kaya o Jisu me baleti ira na ibulibuli vakasakiti qori, era vakatokai mera agilosi: “[Era] dau tu ga ena mata i Tamaqu mai lomalagi.”—Maciu 18:10.
E bula e veivanua kece na Kalou?
“Me va qo na ivakarau ni nomuni masu: ‘Tamai keimami mai lomalagi.’”—Maciu 6:9.
KA E KAYA NA IVOLATABU E sega ni vakavuvulitaka na iVolatabu ni bula ena veivanua kece na Kalou, me vaka e dua na igu tawarairai.
Ia eda kila ena vosa i Jisu ena Maciu 6:9 kei na 18:10, ni bula dina na Kalou, e “Tamada,” e tiko mai lomalagi, qori na nona ‘itikotiko tudei.’—1 Tui 8:43, NW.
Ni voleka ni mate o Jisu, a tukuna: “Au na biuti vuravura meu lesu vei Tamaqu.” (Joni 16:28) Ni sa vakaturi ena yago vakayalo, a lesu tale na Karisito i “lomalagi . . . me rairai ena mata ni Kalou.”—Iperiu 9:24.
E bibi meda kila na itukutuku qori me baleta na Kalou. Na cava na vuna? Dua oya ni bula dina na Kalou, e rawa nida kilai koya da qai toro voleka vua. (Jemesa 4:8) Kena ikarua, na noda kila na ka dina me baleta na Kalou eda na taqomaki mai na sokalou lasu, me vaka na qaravi matakau. E kaya na 1 Joni 5:21: “Ragone, ni qarauna na qaravi matakau.”
Eda ucuya vakacava na Kalou?
“A sa bulia na tamata na Kalou mei tovo vata kei koya; e nai tovo ni Kalou sa buli koya ko koya; na tagane kei na yalewa sa buli rau ko koya.” —Vakatekivu 1:27.
KA E KAYA NA IVOLATABU Eda rawa ni vakatotomuria na itovo ni Kalou, me vaka na loloma, lewadodonu kei na vuku.
E kaya mada ga na iVolatabu: “Moni vakatotomuria na Kalou ni oni luvena lomani, moni veilomani tale ga.”—Efeso 5:1, 2.
A solia tale ga na Kalou vei keda na galala ni vakatulewa, meda vakatulewataka na ka e dodonu mai na ka e cala, meda vakaraitaka tale ga na loloma ena levu na sala. (1 Korinica 13:4-7) E tu tale ga na noda dui taledi, eda rawa ni marautaka na veika eda raica, da qai qoroya na ka e tu wavoliti keda. Koya e bibi sara nida buli meda gadreva na veika vakayalo, qori na noda vulica na ka e baleta na Dauveibuli kei na nona inaki.—Maciu 5:3.
Sala ena yaga kina vei iko na ka dina ena iVolatabu. Na levu ga ni noda vulica na veika me baleta na Kalou da qai vakatotomuri koya, eda na muria tale ga na ivakarau ni bula e vinakata. Nida cakava qori eda na marau vakalevu, eda na vakila tale ga na vakacegu dina. (Aisea 48:17, 18) Io, e kila na Kalou nida na taleitaka na nona itovo talei, ena uqeti ira na tamata yalomalumalumu mera torovi koya, qai dusimaki ira ena sala ena basika ina bula tawamudu.—Joni 6: 44; 17:3.
Rawa ni o Wilika Tale ga
SAUMI NA TARO VAKAIVOLATABU
E Dua ga na iGu Tawarairai na Kalou?
Na iVolatabu e tukuna ni bulia na ka kece na Kalou, ia vakacava e bau kauaitaki keda?
SAUMI NA TARO VAKAIVOLATABU
Vakacava e tu e Veivanua na Kalou?
Vakacava e kaya na iVolatabu ni tu e veivanua na Kalou? O vakadeitaka vakacava ni tiko na itikotiko ni Kalou, qai kauaitaki iko tale ga?
SAUMI NA TARO VAKAIVOLATABU
Sa Bau Dua e Raica na Kalou?
Vakacava e veisaqasaqa na iVolatabu ni tukuna “e sega ni dua na tamata sa raica na Kalou,” oti e tukuna tale ga ni o Mosese e “raica na Kalou ni Isireli”?
