E laurai ena dua na vakadidike ni voleka ni dua na ikatolu ni lewenivanua era vakawelei nira takoso ena gaunisala osooso nira vakarogo sere, veivosaki ena mobail kei na so tale na ka. Koya e rerevaki duadua na vakauitukutuku ena mobail. E dikevi ni o ira era cakava qori e rauta ni 18 na pasede na dede ni nodra takoso e gaunisala qai voleka ni vakavataki na nodra sega ni muria na veisau ni cina mera qai takoso, era takoso tale ga ena vanua cala se takoso nira sega ni veiraiyaki.

Era kau ena nodra vale ni vakatevoro na “juju” na yalewa era vesu mai Nigeria mera volitaki i Urope ra qai vakaukauataki mera bubuluitaka nira saqamua. Era cakava qo na dauvolitaki tamata mera lewai ira na yalewa, era vakarerei ira nira na totogitaki vei ira na timoni ke ra sega ni dina ena ka era bubuluitaka.

Nira kere cakacaka tale e rauta ni le 5 ina 10 na pasede na lewenivanua mai Sipeni, era sega ni vola na koroi era rawata kei na nodra kila vakacakacaka de nanumi ni sa rui sivia tale na ka era kila.

E laurai ena veimatanitu se qai vakatorocaketaki tiko nira mate e va na milioni e veiyabaki, ni leqa na nodra yatevuso nira ceguva na kubou ni sitovu buka e lomanivale e sega na kena ikuvukuvu. Era kaya na dauvakadidike ni kasi e kaburaka na sitovu buka se sitovu koala e tautauvata kei na kasi gaga ni tavako.