• Digitaki koya na Kalou. “O yau, au sa bulia na noqu tui . . . Au na qai solia na veimatanitu me nomu ivotavota kei na iyalayala kei vuravura mo taukena.”—Same 2:6, 8.

• Kawa nei Tui Tevita. “Ni sucu vei keda e dua na gone, e soli vei keda e dua na gonetagane . . . Na tubu ni nona lewa kei na sautu ena sega ni oti, ena idabedabe vakaturaga nei Tevita kei na nona matanitu me vakataudeitaka.”—Aisea 9:6, 7.

• Sucu e Peceliema. “O iko Peceliema . . . , ena lako mai vei iko na iliuliu . . . Ni na rogo o koya me yacova na iyalayala kei vuravura.”—Maika 5:2, 4.

• Cati qai vakamatei. “E beci, eda sega ni dokai koya. . . . E lausua o koya ena vuku ni noda ivalavala ca e butuqaqi ena vuku ni noda cala.”—Aisea 53:3, 5.

• Vakaturi mai na mate qai vakalagilagi. “Oni sega ni biuti au tu ga ena iBulubulu. Oni na sega ni raici koya na nomuni yalodina me raica na qara. . . . Sa tu na marau e ligamuni matau me tawamudu.”—Same 16:10, 11.

E laurai ena ivolatukutuku ni kawatamata ni ganiti Jisu Karisito duadua ga me iLiuliu. E kaya mada ga na agilosi vei Meri na tinai Jisu: “Ena solia vua na Kalou  . . na idabedabe vakaturaga i Tevita na tamana, . . . ena sega ni mudu na nona Matanitu.”—Luke 1:31-33.

E se bera vakadua ni veiliutaki e vuravura o Jisu, ia ena liutaki keda mai lomalagi ni sa Tui ni Matanitu ni Kalou. Na cava e iLiuliu vinaka kina o Jisu? Raica mada na ka e dau cakava ni se bula tu e vuravura.

•   Kauaitaki ira na tamata. O Jisu e dau kauaitaki ira na tagane kei na yalewa, qase kei na gone se mani vakacava na kedra ituvaki kei na nodra isususu. (Maciu 9:36; Marika 10:16) Kena ivakaraitaki, e vakamasuti koya e dua na vukavuka ni kaya: “Ke oni vinakata ni vakasavasavataki au mada.” E tuburi Jisu na loloma qai vakabulai koya.—Marika 1:40-42.

• Vakavulici keda meda vakamarautaka na Kalou. E kaya: “Dou sega ni rawa ni qarava na Kalou kei na iYau.” E kaya tale ga meda vakaraitaka na itovo eda vinakata me vakaraitaki tale ga vei keda, e qai kilai me Vunau Koula. Kuria ya, e vakaraitaka ni Kalou e sega wale ga ni kauaitaka na ka eda cakava, e kauaitaka tale ga na noda rai kei na ivakarau ni lomada. E bibi gona meda lewa vinaka na ivakarau ni lomada me rawa nida vakamarautaka na Kalou. (Maciu 5:28; 6:24; 7:12) E vakabibitaka o Jisu nida na vakila na marau dina, ke da vulica na ka e vinakata na Kalou vei keda, da qai cakava sara.—Luke 11:28.

• Vakavulici keda meda lomani ira eso tale. E veiuqeti na ka e tukuna o Jisu kei na nona itovo. E tara sara ga na lomadra na vakarorogo. E kaya na iVolatabu: “Era vakadrukai na ilawalawa ya ena nona veivakavulici, ni vakavulici ira o koya me vaka e dua e tu vua na lewa.” (Maciu 7:28, 29) E kaya tale ga vei ira: “Lomani ira tiko ga na kemudou meca.” E masulaki ira mada ga era vakavuna nona mate, e kaya: “Tamaqu, vosoti ira era sega ni kila na ka era cakava tiko.”—Maciu 5:44; Luke 23:34.

E ganiti Jisu duadua ga me veiliutaki e vuravura, ni dau veivuke qai veikauaitaki. Ia gauna cava ena tekivu veiliutaki kina?