DAURAIKALOKALO: Eso era vakabauta ni lewa nodra veigauna se bera mai na ituvatuva ni kalokalo ena gauna era sucu kina. Era na tarogi ira na dauraikalokalo, se wilika na horoscope mera kila na ka ena yacovi ira. Me vukei ira tale ga ena ka mera cakava me rawa nira rawaka se taqomaki kina.

DAURAIRAI: Eso era nanuma nira na tukuna na daurairai na ka ena yacovi ira, kei na ka mera cakava. Na ka era rogoca qori era na qai saga na sala mera taqomaki kina, walia na nodra leqa, se mera rawaka.

QARAVI NA TUKADA ERA SA MATE: Eso era vakabauta ni dodonu mera qaravi na tukada era sa mate, se so tale na kalou. Era nanuma nira na taqomaki qai vakalougatataki kina. E kaya o Vani * e tiko mai Vietnam: “Ena vinaka na neitou bula vakavuvale ena gauna qo kei na veigauna se bera mai, keu qaravi ira na tukaqu era sa mate.”

SUCU TALE ENA YAGO VOU: Levu era vakabauta ni na sucu tale e dua ena gauna e mate kina, qai yaco tiko qori vakavica vata. Na veika ca se vinaka era sotava ena gauna qo, e vakatau ena ka era dau cakava tu i liu.

Levu era okata e vica na vakabauta qori me vakatevoro. Ia era se qara tiko ga na kaukaua vuni me vaka na wiliki ni qeteqeteniliga, horoscope, vakayagataki na papa ni vakatevoro na Ouija^®, kei na tuvaimau. Era nanuma nira na kila kina nodra veigauna se bera mai.

Vacava o ira era cakava ra qai vakabauta na ka vakatevoro qori, e vinaka qai dei nodra veigauna se bera mai?

Kena ivakaraitaki o Paula e tiko mai Vietnam. E dau golevi ira na dauraikalokalo, daurairai, e qaravi ira tale ga na tukana era sa mate mera dusimaki koya. Cava e yaco? E kaya: “E leqa noqu bisinisi, levu noqu dinau, keitou veivala vakavuvale, au yalolailai tale ga.”

O Saki e tiko mai Taiwan e vakabauta ni sa lewai oti tu noda bula, kei na sucu tale ni yago vou. E dau kere veivuke vei ira na dauraikalokalo, kei ira na tukana era sa mate. Ia ni dikevi ira vinaka na vakabauta kece qori, e kaya: “Era veisaqasaqa qai vaka vu veilecayaki. E cala mada ga na ka era tukuna na dauraikalokalo ni na yaco. Na sucu tale ga ni yago vou ena sega ni vinaka kina na noda bula, nida sa guilecava noda ivakarau ni bula i liu.”

Me vakai Paula kei Saki, e levu tale ga era qai mai kila ni sega ni vakatau na dei ni noda veigauna se bera mai ena kalokalo, nodra qaravi na tukada era sa mate, lewai oti tu noda bula se sucu tale na yago vou. Kena ibalebale, eda na sega ni rawa ni cakava e dua na ka me vinaka kina noda veisiga nimataka?

Levu era nanuma ni na dei nodra veigauna se bera mai, ke ra saga na vuli torocake kei na bula vutuniyau. Ia na cava era sotava kina?