E KURABUI sara ga o Torika ni tukuna o vuniwai ni tubu tiko e dua na ka ena mona i watina o Waisele e yabaki 54. * Era kaya na vuniwai ni na vica ga na vula nona bula. E nanuma lesu o Torika: “Au sega sara ga ni vakabauta na itukutuku ya. E vaka ga e nunu kece tu na yagoqu me vica na macawa. Au nanuma ni na yacovi ira ga eso tale na ituvaki ya. Au sega ni bau namaka se tadra me yacovi keirau.”

Eda sega ni vulagi ena ituvaki kei Torika baleta e rawa ni yacovi keda kece. Eda dau qoroya nodra bole e levu mera qarava na nodra lewe ni vuvale e tauvimate bibi. Ena yasana adua, e sega ni dau rawarawa na veiqaravi. Eda na vakaceguya vakacava na lewe ni noda vuvale e tauvimate bibi? Na cava me nanumi tiko me baleta na veiqaravi? Eda na vosota vakacava na veika dredre ena sotavi ena gauna ni veiqaravi? Na cava me namaki ena iotioti ni vica na macawa ni nona bula o koya e tauvimate bibi? Ni bera ni saumi na taro kece qori, meda raica mada na vuna e sega ni dau rawarawa kina na qaravi ira na tauvimate bibi.

Era sa sega ni mate totolo e levu ena gauna qo ni sa totoka sara na vakadidike vakavuniwai. Ena duanadrau na yabaki vakacaca sa oti, e lekaleka na bula ni tamata ena veivanua mada ga sa vakatorocaketaki. Era mate totolo e levu mai na matedewa se vakacalaka. Ni dredre na gole i valenibula, era sa qaravi tu ga e vale e levu era tauvimate bibi me yacova nodra mate.

Sa toso cake nikua na ka era kila na vuniwai ena sala me valuti kina na mate me rawa ni dede na bula. Sa sega ni muduka dole na bula ni tamata eso na mate e dau veivakamatei totolo e liu. Ia ke balavu mada ga na nona bula e dua e tauvimate bibi, na kena mate e rawa ni vakadredretaka nona qaravi koya ga. Sa dredre sara ena gauna qo nodra qaravi na tauvimate bibi, qai veivakaocai.

Ni toso na veiyabaki, e levu era sa qai lai mate ga e valenibula. E levu era sega ni kila e dua na ka me baleta na mate, era se sega tale ga ni raica me mate e dua. Ena rawa ni tu suka e dua me qarava na lewe  ni nona vuvale e tauvimate bibi ke sega ni kila na ka me cakava. Cava e rawa ni caka ena ituvaki va qori?

E laurai ena ka e sotava o Torika ni dau vakavu rarawa dina na nona tauvimate bibi e dua na lewe ni vuvale. E macala ga ni o na lomaocaoca, rere, qai rarawa. Ia o na vakarautaki iko vakacava ina itavi levu o na qarava? A masuta e dua na tamata yalodina ni Kalou: “Ni vakavulici keimami me keimami wilika vakacava na neimami siga me keimami rawata kina na lomavuku.” (Same 90:12) Io, e bibi mo kerei Jiova me vukei iko mo ‘wilika na nomu siga,’ me rawa ni vakayagataki vinaka na vo ni nona gauna ni bula na lewe ni nomu vuvale e tauvimate bibi.

E bibi mo lalawataka vinaka na ka mo cakava. Ke se rawa ni vosa se vakatulewa o koya e tauvimate bibi, e vinaka mo tarogi koya se o cei e vinakata me vakatulewa ena vukuna ke sa na sega ni rawa ni vakatulewa vakataki koya. Me veivosakitaki vakadodonu ke vinakata me lai curu i valenibula, vakayacori vua eso na veiqaravi vakavuniwai, se caka vua eso na ka me yavala tale kina nona icegu ke sa cavuka. Na veivosaki va qori ena donu tiko ga kina nodra rai na lewe ni vuvale, ena sega tale ga ni ora na lomadra ena vakatulewa era cakava ena vukuna na wekadra e tauvimate bibi. Ni caka ena kena gauna totolo duadua na veivosaki qai sega ni vunitaki e dua na ka, era na veitokonitaka vinaka na lewe ni vuvale na nona qaravi o tauvimate. E kaya na iVolatabu: “E seva na ka e nanumi ni sega na veivosaki.”—Vosa Vakaibalebale 15:22.

Dua na nona itavi o koya e qaravi tauvimate, oya me veivakacegui. E bibi me kila o koya e tauvimate nira lomani koya na lewe ni nona vuvale, era tokoni koya tale ga. Ena caka vakacava qori? Wilivola se lagasere, digia na ivola se sere ena vakamarautaki tauvimate qai vakayaloqaqataki koya. Era dau vakila tale ga na vakacegu e levu era tauvimate bibi, ni taura toka na ligadra e dua na lewe ni nodra vuvale se vosa vakayalovinaka vei ira.

E bibi mo kilai ira vinaka na veisiko yani vei tauvimate. E kaya e dua na ripote: “Ena lima na sala eda dau vakila kina na ka, e rawa ni kena iotioti duadua me vakaleqai na daligada. E se rawa tiko ga ni rogoca vinaka na ka o [tauvimate] ke moce mada ga, kua gona ni tukuna e dua na ka o na sega ni tukuna ke yadra tiko.”

Ke rawa, drau masu vata. E kaya na iVolatabu ni ratou sega ni taqea rawa ena dua na gauna na  yapositolo o Paula kei na nona itokani na veika eratou sotava. Eratou sega mada ga ni kila eratou na bula se sega. Eratou qai vukei vakacava? A kerei ira na nona itokani o Paula: “E rawa ni oni tokoni keitou ena nomuni masulaki keitou.” (2 Korinica 1:8-11) Ena veivuke sara vakalevu na masu ena ituvaki e dau vakavu nuiqawaqawa se ni tauvimate bibi e dua.

Eda sega ni dau via vakasamataka na mate. E sega ni kurabuitaki qori ni a sega ga ni dodonu meda mate. A sega ni dodonu me tiki ni noda bula na mate. (Roma 5:12) Sa rauta me vakatokai ena Vosa ni Kalou na mate me “meca.” (1 Korinica 15:26) E sega gona ni cala ke da sega ni vinakata me takali e dua eda dau veivolekati.

Ena yasana adua, eda na sega soti ni lomaleqa ke da sa kila rawa toka na ituvaki ena yaco da qai vakarautaki keda kina. Ena vukei keda tale ga meda kua ni cakava na veika ena kuria tale na nona rarawa o tauvimate. E volai toka ena kato “ iOtioti ni Vica na Macawa” eso na ituvaki me namaki ni rawa ni yaco. E sega ni tukuni nira na sotava kece na ituvaki qori na tauvimate bibi, se ra yaco veitaravi me vaka era tuvani toka ena kato. Ia e levu na tauvimate era vakila eso na veiveisau e cavuti kina.

Ni sa takali na lewe ni noda vuvale eda qarava voli, e vinaka meda veitalanoa kei na dua na noda itokani voleka e via veivuke. De dua ena vinakati me vakadeitaki vei ira na veiqaravi kei na lewe ni vuvale ni sa oti na nona rarawa kei na nona mosi na wekadra a tauvimate bibi tu. E vakadeitaka vei keda na Dauveibuli ni “o ira na mate era sega sara ga ni kila e dua na ka.”​—Dauvunau 9:5.

E bibi mo nuitaka na Kalou ni o qarava voli e dua na lewe ni nomu vuvale e tauvimate bibi, gauna tale ga o lolositaka kina na nona takali. E rawa ni vakayagataki ira eso tale na Kalou mera vakacegui iko ena vosa era tauca kei na ka era cakava. E kaya o Torika: “Au dau marautaka na veivuke e caka vei au. Keirau kurabuitaka tale na levu ni ka keirau vukei kina. Keirau kila vakaveiwatini ni dua na sala ya e tukuna tiko kina o Jiova, ‘Au na vukei kemudrau ena ituvaki drau sotava tiko.’ Au na sega vakadua ni guilecava qori.”

Io, e sega ni dua e vaka na Kalou o Jiova ena nona dau veikaroni. E kila na mosi eda dau vakila kei na noda rarawa ni buli keda. E tu vakarau me veivuke qai veivakayaloqaqataki meda vosota kina na ituvaki eda sotava. Me vaka ga e yalataka, sa voleka sara ni vakaotia na mate qai vakaturi ira na vica vata na bilioni e nanumi ira vinaka tu. (Joni 5:28, 29; Vakatakila 21:3, 4) Ni yaco qori, eda na duavata kei na ka e tukuna na yapositolo o Paula: “O iko mate, i vei na nomu qaqa? O iko mate, i vei na nomu bati gaga?”—1 Korinica 15:55.