“Era dau veikauaitaki na iVakadinadina i Jiova, era dau kauaitaki rau tale ga na noqu koli. Dua na siga, e duri volekata tiko na qiqi ni vunau o Elaine, e solia sara na bisikete vei rau na noqu koli. Oti qori, na gauna kece keitou dau volekata kina na qiqi ni vunau, rau dau saga na koli me rau gole kina.

“Oti e vica na vula rau sa taleitaka na koli na kedrau bisikete, au marautaka tale ga na veivosaki vakalekaleka kei ira na iVakadinadina i Jiova. Ia au sega ni via veivosaki vakabalavu. Au sa yabaki 70 vakacaca, au sega tale ga ni kila na ka era vakabauta na iVakadinadina i Jiova. Au rarawataka e levu na lotu, au nanuma ni vinaka cake meu vulica ga vakataki au na iVolatabu.

“Ena gauna qori, au raica eso tale na iVakadinadina i Jiova ena levu na vanua ena siti nira duri volekata na nodra qiqi ni vunau. Era dau veikauaitaki tale ga. Era saga mera sauma vakaivolatabu na noqu taro, qori e vakavuna meu nuitaki ira kina vakalevu.

“Dua na siga e taroga o Elaine, ‘O vakabauta ni isolisoli ni Kalou na manumanu?’ Au kaya, ‘Io, au vakabauta!’ E qai wilika vei au na Aisea 11:6-9. Tekivu qori au sa via vulica na iVolatabu, ia au sega ga ni taura e dua na ivola meu wilika.

“Oti qori, au dau taleitaka meu veivosaki vakalekaleka kei Elaine kei watina o Brent, e veiuqeti dina. Rau vakatututaka meu wilika na Maciu me yaco ina Cakacaka, meu kila kina na ibalebale ni lotu vaKarisito dina. Au cakava sara. Sega ni dede, au sa vuli iVolatabu kei rau na veiwatini ena lomaloma ni yabaki 2016.

“Au dau vakanamata ena noqu vuli iVolatabu e veimacawa kei na soqoni ena Vale ni Soqoni. Au marau vakalevu niu vulica na ka e kaya na iVolatabu. Oti toka ga e dua na yabaki, au sa papitaiso. Au sa yabaki 79 qo, au kila niu sa muria tiko na sala donu. E vakalougatataki au o Jiova ni okati au meu lewe ni nona vuvale e vuravura raraba.”