Era Yalorawarawa Mera Gole—ina Veiyanuyanu ena Pasifika
O RENEÉ, e dua na tacida yalewa yabaki 30 vakacaca mai Ositerelia, e susu ena dina. E kaya: “Keitou toki vakalevu ena vanua e vinakati kina na veivuke. Levu na ka rau dau cakava noqu itubutubu me marautaki kina na cakacaka vakaitalatala! Na gauna au sa vakaluveni kina, au vinakata tale ga me rau marautaka na ivakarau ni bula qori na luvequ.”
Na wati Reneé o Shane, e yabaki 30 vakacaca tale ga, e tautauvata nodrau isausau. E vakamacalataka: “Ni sucu na ikarua ni luvei keirau, keirau wilika ena Vale ni Vakatawa ni ratou gole e dua na vuvale ena ceva ni Pasifika me ratou vunau ena yanuyanu o Toga, eratou vodo ena iota. * E uqeti keitou na ulutaga qori me keitou taroga na valenivolavola ni tabana e Ositerelia kei Niusiladi na vanua cava e vinakati kina na veivuke. * E sureti keitou na valenivolavola ni tabana me keitou toki i Toga—na vanua sara ga keitou wilika tiko!”
O Jacob, Reneé, Skye, kei Shane
Rauta ni dua na yabaki nodratou tiko mai Toga o Shane, Reneé, kei na luvedrau o Jacob kei Skye, e yaco veitaravi na tikoyavavala, ratou mani lesu tale i Ositerelia. Ia e dei tiko ga nodratou isausau me ratou vakarabailevutaka nodratou cakacaka vakaitalatala. Ena 2011 eratou toki ena yanuyanu lailai ena Pasifika o Norfolk Island, rauta ni 1,500 na kilomita ena tokalau kei Ositerelia. Vakacava e yaga nodratou toki? E kaya o Jacob sa yabaki 14: “E tokoni keitou o Jiova, e raica tale ga me keitou taleitaka na cakacaka vakavunau!”
VEIQARAVI VAKAVUVALE
Levu na vuvale era yalorawarawa mera veiqaravi ena vanua e vinakati kina na veivuke me vakataki Shane, Reneé, kei rau na gone. Na cava e uqeti ira mera toki?
“Levu era taleitaka na itukutuku vinaka. Keitou vinakata me keitou vakavulici ira wasoma ena iVolatabu.”—Burnett
O Burnett kei Simone, rau yabaki 30 vakacaca, na luvedrau o Eston kei Caleb, dua e yabaki 12, dua e yabaki 9, eratou toki i Burketown na tauni lailai tuyawa e Kuinisiladi mai Ositerelia. E kaya o Burnett: “Era qai dau vunau ga e kea na tacida ena veiyatolu se va na yabaki. Levu era taleitaka na itukutuku vinaka. Keitou vinakata me keitou vakavulici ira wasoma ena iVolatabu.”
O Jim, Jack, Mark, kei Karen
O Mark kei Karen rau yabaki 50 vakacaca, erau veiqaravi ena vica na ivavakoso voleka e Serene mai Ositerelia ni bera ni rau toki kei na luvedrau o Jessica, Jim kei Jack, ena nodra itikotiko na daukelikeli e Nhulunbuy ena Northern Territory. E kaya o Mark: “Au dau taleitaki ira na lewenivanua. Au vinakata gona meu tiko ena vanua e vinakati kina na veivuke ena ivavakoso kei na cakacaka vakaitalatala.” Ia o Karen e lomalomarua me toki. E kaya: “Au qai toki ni uqeti au o Mark kei ira na taciqu. Au marautaka sara ga!”
O Benjamin, Jade, Bria, kei Carolyn
Ena 2011, eratou biuti Kuinisiladi o Benjamin kei Carolyn kei na luvedrau o Jade kei Bria, me ratou lesu i Timor-Leste, dua na vanua lailai ena yanuyanu o Timor mai Idonisia. E kaya o Ben: “Keirau a veiqaravi tu vakapainia lavotaki kei Carolyn mai Timor-Leste. Keirau taleitaka na cakacaka vakaitalatala, era dau veitokoni na mataveitacini. E mosi na yalo i keirau ni keirau sa biubiu. Keirau nakita me keirau lesu tale. Ni rau sucu na gone, e daro na neirau inakinaki, ia e sega ni veisau.” E tomana o Carolyn: “Keirau vinakata me rau maliwai ira na daukaulotu, lewenivuvale e Peceli, kei ira na painia lavotaki. Me rau vulica tale ga e levu na ka.”
VAKAVAKARAU
E tukuna o Jisu vei ratou nona imuri: “O cei vei kemuni e via tara e dua na valececere ena sega ni dabe mada me cakacakataka na kena isau?” (Luke 14:28) E bibi na vakavakarau vinaka ni vakasamataka tiko e dua na vuvale me toki. Na cava e vauci kina?
BULA VAKAYALO:E kaya o Ben: “Keitou via veiqaravi, keitou sega ni vinakata me keitou ikuri ni icolacola. Ni bera gona ni keitou toki, keitou saga me vinaka neitou bula vakayalo. Keitou vakaitavi vakalevu ena cakacaka vakaitalatala kei na so tale na itavi ena ivavakoso.”
E kaya o Jacob sa cavuti oti: “Ni bera ni keitou toki i Norfolk Island, keitou dau vakawilika ena Vale ni Vakatawa kei na Yadra! e levu na kedra italanoa na vuvale era veiqaravi ena vanua e vinakati kina na veivuke. Keitou veitalanoataka na ka dredre era sotava kei na nona tokoni ira o Jiova.” E kaya o Skye na ganena yabaki 11: “Levu na gauna au dau masu vakataki au, au masu tale ga kei rau o Na kei Ta!”
KA O TALEITAKA: E kaya o Reneé: “Ena rawarawa ke keitou tiko volekati ira ga na vuvale kei na itokani. Ia au sega ni via vakasamataka na ka au na biuta tu mai, au vakasamataka ga na yaga ni neitou toki.”
ITOVO: Era vakekeli e levu na vuvale me vakarautaki ira ena nodra itikotiko vou. E kaya o Mark: “Keitou vakawilika vakalevu na veika me baleti Nhulunbuy. Levu na tacida e kea era vakauta mai na niusiveva ni tauni ya me keitou kila kina na ka me baleti ira na lewenivanua kei na nodra itovo.”
E kaya o Shane e toki i Norfolk Island: “Au saga meu vakaraitaka tiko ga na itovo vaKarisito. Au kila ni na rawarawa meu bula ena vanua cava ga keu dau yalomalua, dau dina qai gugumatua.”
VOSOTA NA KA DREDRE
Era dau yalorawarawa o ira na veiqaravi ena vanua e vinakati kina na veivuke, me donu tale ga nodra rai ni yaco eso na ka tawanamaki. Qo eso na kena ivakaraitaki:
E kaya o Reneé: “Au vulica eso tale na ka vou. Ni voravora na wasawasa e Norfolk Island, e sega ni dau kele na waqa ni usa iyaya, dau lailai na kakana qai saulevu. Niu dau vakasaqa, au vulica meu dau maninitaka na ka.” E tukuna na watina o Shane: “Keitou dau lewa vinaka tale ga na ilavo keitou vakayagataka.”
E tukuna na luvedrau o Jacob: “Eratou uabula kece na lewe ni neitou ivavakoso vou, eratou le vitu, e sega ni dua keirau tabavata! Ia niu cakacaka vata kei ratou ena cakacaka vakavunau, keitou veitokani vinaka sara.”
Qori tale ga na ka e tukuna o Jim e yabaki 21: “Na ivavakoso voleka duadua e Nhulunbuy e 725 vakacaca na kilomita na kena yawa. Keitou sega ni vinakata me keitou calata na soqo ni tabacakacaka kei na soqo ni veiwasewase. Keitou dau yaco totolo yani me keitou marautaka na veimaliwai kei ira na mataveitacini. Qori e gauna guiguilecavi dredre!”
“AU MARAUTAKA NEITOU TOKI MAI!”
E kaya na iVolatabu: “Na veivakalougatataki i Jiova e veivakavutuniyautaki.” (Vkai. 10:22) Era vakadinadinataka qori e levu na tacida era veiqaravi ena vanua e vinakati kina na veivuke.
E kaya o Mark: “Na veivakalougatataki levu duadua oya ni yaga vei ratou na gone na neitou toki. Rau nuidei na luvequ qase ni o Jiova ena tokoni ira na vakaliuca na nona Matanitu. E sega ni rawa ni voli na nuidei qori.”
E kaya o Shane: “Au sa qai veivolekati ga kei watiqu kei rau na gone. Au marau ni ratou dau vakamacalataka nona vakalougatataki ratou o Jiova.” E kaya na luvena o Jacob: “Au na sega ni guilecava rawa. Au marautaka neitou toki mai!”
Rawa ni o Wilika Tale ga
NA VALE NI VAKATAWA (ITABATABA E VULICI)
Era Yalorawarawa Mera Gole—i Myanmar
Na cava e uqeta e levu na iVakadinadina i Jiova mera biuta nodra vanua mera lai veivuke ena tatamusuki vakayalo e Myanmar?
NA VALE NI VAKATAWA (ITABATABA E VULICI)
Era Yalorawarawa Mera Gole i Madagascar
Kilai ira na tacida era toki mera kacivaka na itukutuku vinaka ena yalava levu e Madagascar.
NA VALE NI VAKATAWA (ITABATABA E VULICI)
Era Yalorawarawa—Mera Gole i Taki
Ena 2014, e tuvanaki e Taki na cakacaka vakavunau lavotaki. Na cava e tuvanaki kina? Na cava e rawati?
NA VALE NI VAKATAWA (ITABATABA E VULICI)
Era Yalorawarawa
Ira na tacida yalewa dawai era veiqaravi tiko e vanua tani, era lomalomarua ena imatai ni gauna. Era doudou vakacava mera gole? Na cava era sa vulica nira veiqaravi e vanua tani?
NA VALE NI VAKATAWA (ITABATABA E VULICI)
Era Yalorawarawa Mera Gole—i Ghana | Vulici
E levu na dredre, ia e levu tale ga na veivakalougatataki era vakila o ira na vinakata mera lai veiqaravi ena vanua e gadrevi kina vakalevu na veivuke.
NA VALE NI VAKATAWA (ITABATABA E VULICI)
Era Yalorawarawa Mera Gole—i Rusia
Wilika nodra toki i Rusia na veiwatini kei ira na dawai mera veiqaravi ena vanua e vinakati kina na veivuke. Era vulica mera nuitaki Jiova vakalevu!
