Cava O Vulica Vei Jisu

Me Baleta na Kalou Dina

O cei beka na yacana?

A vakavuvulitaka o Jisu na yaca ni Kalou. E kaya: “O koya mo dou qai masu vakaoqo: Tama i keimami mai lomalagi, Me vakarokorokotaki na yacamuni.” (Maciu 6:9) E tukuni ena iVolatabu ni yaca ni Kalou o Jiova. (Same 83:18) Ena nona masu vei Tamana e kaya o Jisu me baleti ira nona imuri: “Ka’u sa vakatakila vei ira na yacamuni.”​—Joni 17:26.

O cei o Jiova?

Vakatokai Jiova o Jisu me “Kalou dina duaduaga” ni a buli keda. (Joni 17:3) Kaya o Jisu: “Dou a sega beka ni wilika, ko koya sa buli rau e nai vakatekivu sa bulia ga na tagane kei na yalewa.” (Maciu 19:4) E kaya tale ga: “A Yalo na Kalou.” (Joni 4:​24) Kena ibalebale eda sega ni rawa ni raica na Kalou.​—Lako Yani 33:​17-​20.

 Cava e vinakata vei keda na Kalou?

Ni tarogi Jisu e dua se cava na ivakaro bibi duadua, a sauma: “[N]ai matai ni vakaro kecega, Mo rogoca, na Isireli: O Jiova na noda Kalou Ko Jiova sa dua bau: ia mo lomani Jiova na nomu Kalou e na lomamu taucoko, kei na yalomu taucoko, kei na nomu nanuma kece, kei na nomu kaukauwa kece. Na kenai karua oqo, Mo lomana na kai nomu me vaka ko sa lomani iko.”​—Marika 12:​28-​31.

Eda na vakaraitaka vakacava nida lomana na Kalou?

A tukuna o Jisu: ‘Au lomani Tamaqu.’ Vakaraitaka vakacava qori? E kaya, “Au sa dau kitaka kece sara na ka e vakarota vei au.” (Joni 14:​31, VV) Kaya tale ga: “[Au] sa kitaka tikoga na ka sa vinakata ko koya.” (Joni 8:​29) Noda vulica na veika me baleta na Kalou ena vakamarautaki koya. Kaya o Jisu ena nona masu me baleti ratou nona tisaipeli: “Sai koya oqo na bula tawa mudu, me ra kilai kemuni na Kalou dina duaduaga.”​—Joni 17:3; 1 Timoci 2:4.

Sala cava eda na kila kina na Kalou?

Noda dikeva na veika e bulia. Kena ivakaraitaki, kaya o Jisu: “Dou raica na manumanu vuka; ni ra sa sega ni dauveikabukaburaki, se dautamusuka, se daukumuna vata ki na lololo; a sa vakani ira na Tamamudou vakalomalagi. Dou sa sega beka ni yaga vakalevu cake vei ira?” Na lesoni cava e vinakata o Jisu meda vulica e ke? Me kua ni tarova noda qarava na Kalou na nuiqawaqawataki ni veika ni noda bula e veisiga.​—Maciu 6:​26-​33.

Na sala vinaka duadua meda kilai Jiova kina, noda vulica na iVolatabu. Vakatoka o Jisu na ivola qori me “vosa ni Kalou.” (Luke 8:​21) A kaya o Jisu vua na Kalou: “Sa ka dina na nomuni vosa.”​—Joni 17:17; 2 Pita 1:​20, 21.

A veiuqeti o Jisu ena kena vulici na ka dina me baleti Jiova. E tukuna me baleti koya e dua nona tisaipeli: “Sa sega li ni katakata sara na yalodaru, ni datou sa veivosaki kaya e na gau-ni-sala, ni sa vakamacalataka talega vei kedaru nai Vola Tabu?” (Luke 24:32) Meda kila na Kalou, e dodonu meda yalomalumalumu da qai vinakata meda vakavulici. E kaya o Jisu: “Kevaka dou sa sega ni saumaki mai, ka yaco me vaka na gone lalai, dou na sega sara ni curu ki na matanitu vakalomalagi.”​—Maciu 18:3.

Cava e vu ni marau kina noda kila na Kalou?

Ena vukei keda na Kalou meda kila na inaki ni bula. Kaya o Jisu: “Era marau o ira e gu na lomadra mera vulica na vosa ni Kalou.” (Maciu 5:​3, NW) E vakavulici keda o Jiova ena ivakarau ni bula e dodonu meda muria. Tukuna o Jisu, “era sa kalougata [“marau,” NW] cake ga ko ira era rogoca na vosa ni Kalou ka muria!”​—Luke 11:​28, VV; Aisea 11:9.

Me ikuri ni ivakamacala, raica na wase 1 ni ivola Na Cava Sara Mada e Kaya na iVolatabu? *

[iVakamacala e ra]

[iYaloyalo ena tabana e 20]

“[Au] sa vakatakila vei ira na yacamuni.”​—Joni 17:26

[iYaloyalo ena tabana e 20]

Eda vulica na veika baleti Jiova ena veika e bulia kei na iVolatabu