E YAGA na noda dau masu? Io, e tukuna na iVolatabu nira vakila na tamata yalodina ni Kalou na yaga ni nodra dau masu. (Luke 22:40; Jemesa 5:13) Ena yaga vakalevu na masu ena noda bula vakayalo, vakayago, kei na ivakarau ni lomada. Ena sala cava?

Kaya mada o vakaluveni, qai soli vua e dua na iloloma. O na vakavulica me dau toka lo ga vua na nona vakavinavinaka, se me dau vakaraitaka? Nida tukuna na ka e tu e lomada, ena gole vakatabakidua sara ga kina na noda vakasama sa qai uqeti keda ga meda vakavinavinaka. Ena vaka tale ga qori nida vosa vua na Kalou? Io! Qo eso na kena ivakaraitaki.

Masu ni vakavinavinaka. Nida vakavinavinakataki Tamada ena veika vinaka e yaco ena noda bula, e gole vakatabakidua sara ga na noda vakasama ena noda vakalougatataki. Eda vakila na marau dina kei na vakavinavinaka, qai donu tale ga na noda rai.​—Filipai 4:6.

Kena ivakaraitaki: A vakaraitaka o Jisu na nona vakavinavinakataki Tamana ni a rogoca na nona masu qai cakava na ka e kerea.​—Joni 11:41.

Masu ni kere veivosoti. Nida kere veivosoti vua na Kalou ena rawa ni vinaka kina na noda lewaeloma, ena vakaibalebale na noda veivutuni, eda na kauaitaka tale ga kina vakabibi na cala eda cakava. Ena sega ni ora tale tiko na lomada nida vakila na vakacegu.

Kena ivakaraitaki: A vakaraitaka ena masu o Tevita na nona veivutuni kei na nona rarawa.​—Same 51.

Masuti na veidusimaki kei na vuku. Na noda kerea na veidusimaki i Jiova, se me solia vei keda na vuku meda vakatulewa kina vakayalomatua ena rawa nida yalomalumalumu dina. Eda na kila kina ni vakaiyalayala ga na ka eda rawa ni cakava, eda na nuitaka vakalevu kina na Tamada vakalomalagi.​—Vosa Vakaibalebale 3:​5, 6.

Kena ivakaraitaki: A kerea ena yalomalumalumu o Solomoni me dusimaki, me vakavukui tale ga me liutaki Isireli rawa kina.​—1 Tui 3:​5-12.

Masu ena gauna ni leqa. Ke da talaucaka na lomada vei Jiova nida nuiqawaqawa eda na lomavakacegu, eda vakaraitaka tale ga nida nuitaki koya, da sega ni nuitaki keda ga.​—Same 62:8.

Kena ivakaraitaki: A masu o Tui Asa ni sotava e dua na meca rerevaki.​—2 Veigauna 14:11.

Meda masulaka me vinaka na nodra bula o ira era gadreva na veivuke. Nida cakava qori, eda na sega ni nanumi keda ga, sa na qai levu ga na noda veikauaitaki kei na noda veinanumi.

Kena ivakaraitaki: A dau masulaki ratou na nona imuri o Jisu.​—Joni 17:​9-17.

Masu ni veivakalagilagi. Nida vakalagilagi Jiova ena vakasakiti ni nona cakacaka kei na nona itovo, eda na dokai koya qai vakavinavinakataki koya vakalevu. Na noda vakalagilagi Jiova ena masu ena vakavolekati keda vua na Kalou na Tamada.

Kena ivakaraitaki: A vu dina mai lomai Tevita na nona vakalagilagia na Kalou ena veika e bulia.​—Same 8.

E dua tale na veivakalougatataki e salamuria na masu, oya “na vakacegu ni Kalou e uasivia na vakasama kece.” (Filipai 4:7) E ka dina ni veivakalougatataki nida kunea na lomavakacegu ena vuravura ca qo. Ni na yaga sara mada ga ena noda bula vakayago. (Vosa Vakaibalebale 14:30) Ia ena rawati ga na ituvaki qori ena noda sasaga? Se tiko e dua tale na ka e bibi cake?