Me Sauma na iVolatabu

Na Cava ena Yaco ena Siga ni Lewa?

Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.

1. Na cava na Siga ni Lewa?

Me vaka e vakaraitaki ena iyaloyalo ena imatau, era nanuma e levu ni Siga ni Lewa era na tu kina ena mata ni itikotiko vakaturaga ni Kalou e vica vata na bilioni na tamata mera lewai me vaka na nodra valavala​—eso era na vakaicovitaki ena bula e lomalagi, eso tale era na lai vakararawataki i eli. Ia e vakaraitaka na iVolatabu ni inaki ni Siga ni Lewa me vakabulai ira na tamata mai na ivalavala tawadodonu. (Same 96:13) Na Kalou sa digitaki Jisu me Turaganilewa, me vakalesuya tale ga na ivalavala dodonu ina kawatamata.​—Wilika Aisea 11:1-5; Cakacaka 17:31.

2. Ena vakalesui mai vakacava na ivalavala dodonu ena Siga ni Lewa?

Ni nakita na imatai ni tagane o Atama me talaidredre vua na Kalou, a vakadewa kina vei ira nona kawa na ivalavala ca, rarawa kei na mate. (Roma 5:12) Na ka tawadodonu qori ena vakadodonutaka o Jisu ena nona vakaturi ira e vica vata na bilioni era mate tu. E vakaraitaka na Vakatakila ni na yaco qori ena loma ni duanaudolu na yabaki ni veiliutaki i Karisito Jisu.​—Wilika Vakatakila 20:4, 11, 12.

O ira na vakaturi era na lewai, era na sega ni lewai ena ka era cakava ni bera nodra mate, ia ena ka era cakava ena gauna sa na dola kina na “ivolavivigi” e vakamacalataki ena Vakatakila wase 20. (Roma 6:7) E tukuna na yapositolo o Paula ni o ira era vakaturi qori qai soli vei ira na gauna mera vulica na ka e baleta na Kalou, era wili tiko kina na “yalododonu kei ira na sega ni yalododonu.”​—Wilika Cakacaka 24:15.

3. Na cava ena rawati ena Siga ni Lewa?

E levu vei ira na sa mate era se bera ni kila na Kalou o Jiova se qaravi koya, ena soli tale vei ira na gauna mera veisau ra qai caka vinaka. Ke ra caka vinaka, e sa na yaga na nodra vakaturi nira sa na “vakaturi mera bula.” Ia eso vei ira na vakaturi era na sega ni via vulica na veika me baleti Jiova. Na nodra vakaturi o ira qori e sa na yaco mera “vakaturi mera na lewai.”​—Wilika Joni 5:28, 29; Aisea 26:10; 65:20.

Ni cava na duanaudolu na yabaki ni Siga ni Lewa, sa na qai vakalesuya tale o Jiova na bula ni kawatamata me uasivi me vaka ga na nona inaki taumada. (1 Korinica 15:24-28) Sa dua dina na inuinui totoka vei ira kece na talairawarawa! Ena iotioti ni veivakatovolei, na Kalou ena qai sereki Setani na Tevoro mai na qara sega ni vakabotona, a vesu tu kina ena loma ni duanaudolu na yabaki. Ena saga tale o Setani me vakamuai ira na tamata mera vakanadakui Jiova, ia o ira era vorata na veivakamuai i Setani era na marautaka na bula tawamudu e vuravura.—⁠Wilika Aisea 25:8; Vakatakila 20:7-9.

4. Na cava e dua tale na siga ni veilewai ena yaga ina kawatamata?

E vakayagataka tale ga na iVolatabu na vosa ‘siga ni veilewai’ me vakaibalebaletaka na ka ena yaco me vakarusai kina na ituvaki ca ni vuravura qo. Na siga ni veilewai qori ena yaco vakasauri me vaka ga na Waluvu ena siga i Noa, ni a vakarusa e dua na itabatamata ivalavala ca. E marautaki ni sa voleka qo mera vakarusai o ira na “sega ni doka na Kalou” baleta ni na savasava kina na vuravura vou era na “tiko kina na yalododonu.”​—Wilika 2 Pita 3:6, 7, 13.

Me ikuri ni vakamacala, raica na tabana e 213-215 ni ivola Na Cava Sara Mada e Kaya na iVolatabu?, tabaka na iVakadindina i Jiova.

[iYaloyalo ena tabana e 16]

“THE LAST JUDGEMENT,” DROINITAKA O GUSTAVE DORÉ, 1832-1883

[Credit Line]

Engravings by Doré

[iYaloyalo ena tabana e 16]

 [iYaloyalo ena tabana e 17]

[iYaloyalo ena tabana e 17]