ESO era tukuna ni tabu meda tarogi koya na Kalou. Era na rairai nanuma ni veibeci ke da taroga vua na Kalou na vuna e vakatara kina se sega eso na ka me yaco. Vakacava e va tale ga qori na nomu rai?

Ke vaka kina, de dua o na kurabui ni o na vulica ni levu na tamata vinaka era tarogi koya na Kalou. Dikeva mada qo eso na taro era tarogi koya kina:

Na turaga yalodina o Jope: “A cava era sa bula tiko kina nai valavala ca, ka yaco me ra qase, io, ka ra vutuniyau mai?”​—Jope 21:7.

Na parofita yalodina o Apakuki: “Sa vakaevei li ni kemuni sa mai raici ira kina na dauvakacaca, ka tiko lo ni sa tilomi koya sa yalododonu ko koya na tamata ca?”​—Apakuki 1:13.

Jisu Karisito: “Noqu Kalou, noqu Kalou, na cava oni sa biuti au kina?”​—Maciu 27:46.

Ke o wilika na tikina wavolita ni veitikinivolatabu qori, o na sega vakadua ni raica ni cudru na Kalou o Jiova * ena gauna era taroga kina mai vu ni lomadra na taro va qori. E macala e keri ni dau vakalaivi ira eso mera dau talaucaka na lomadra. Kena ivakaraitaki, ena sega ni cudruvi keda na Kalou nida kerei koya me vakacegui keda ena veika eda gadreva vakayago meda bulabula kina. E marau me vakarautaka na veika eda gadreva dina. (Maciu 6:11, 33) E yalorawarawa tale ga me vakarautaka na ivakasala ena taqomaka na noda vakasama kei na lomada. (Filipai 4:6, 7) O Jisu mada ga e tukuna vei ratou na nona tisaipeli: “Kerekere tiko ga, ena qai soli vei kemuni.” (Maciu 7:7) Na veitikina wavolita ni vosa ni yalayala i Jisu e vakaraitaka ni sega wale ga ni tukuna tiko na noda rawata na veika vakayago, ia na kena saumi tale ga eso na taro bibi.

Vakacava ke soli vei iko na galala mo tarogi koya na Kalou, na taro cava e toka qo e ra o na via tarogi koya kina?

• E vakainaki beka na noqu bula?

• Ena vakacava na kequ ituvaki niu sa mate?

• Na cava o vakalaiva kina meu sotava na rarawa?

Me vaka ni “vakavuna na Kalou na volai ni iVolatabu kece” o na kunea na isaunitaro e vakarautaka ena nona Vosa, na iVolatabu. (2 Timoci 3:16) Dikeva mada na vuna era tarogi koya kina eso ena taro era toka e cake kei na isaunitaro e vakarautaka na iVolatabu.